Lucas 13:9-28 in Achi

⁹ Queje na ile, mokxa cu ya ni u wach; we n-taj, teʼuri ca cʼatzixic,” xu bij i mocom che. (Queje i tijojbal tzij ile xu bij i Jesus chique.)

¹⁰ I Jesus ca tijin chu cʼutic chique i winak pa molbalʼib pa uxlambal ʼij.

¹¹ Chila ʼo wi jun ixok iwab, dieciócho junab ʼo chic che chi toʼ iwab rumal jun itzel tew. Ire toʼ luclic chic rij rumal, n-ca tiqui ta chu sucʼbaxic rij.

¹² I Jesus, are xrilo, xu siqʼuij ruʼ y xu bij che: —Nan, ya at utzirnak chic che a yobil —coʼon che.

¹³ Teʼuri, xu coj u ʼab puwi; are ʼuri i ixok juntir xsuqʼui rij, y xu jek u cojic u ʼij i Dios.

¹⁴ Are ʼuri i rajʼatzil i molbalʼib xpe roywal che i Jesus man xrutzirsaj i ixok pa uxlambal ʼij. Xu bij chique i winak: —ʼO wakib ʼij che i seman re i chacbal ʼij. Che i wakib ʼij-le, we quiwaj quix cʼunic qui-wutzirsaj iwabib, chix cʼunok. Xui-ri, mi ʼan ile pa uxlambal ʼij —xu bij chique.

¹⁵ Are ʼuri i Kajwal xu laʼ u wach che: —Yix ¡xa queb i palaj! Iwonojel yix, pa uxlambal ʼij qui tor ni jun i chicop, o jun i buru, qui yabej u yaʼ.

¹⁶ We queje qui ʼan ile che jun chicop, mas ca majaw che i ixok-le, chi u muk u xiquin i mam Abraham xak jun iwuʼ yix. Mas ca majaw che ire, ca tortaj na pa cʼax. ʼO chic dieciócho junab che, chi yutʼtal u chʼacul rumal itzel. ¿Xataba n-ʼus taj cakesaj i yobil che we pa uxlambal ʼij? —coʼono.

¹⁷ Are xu bij i Jesus ile, i je aj chʼoʼoj chirij lic xe qʼuix che. Conojel i winak lic que quicotic rumal i nimak tak ʼanic xu ʼan i Jesus.

¹⁸ Teʼuri i Jesus xu bij chique: —I ʼatbal tzij re i Dios ¿wach nawi quin junamsaj ruʼ, sakirsabal-re chiwe wach usucʼ?

¹⁹ Quin junamsaj ruʼ jun ija re mostas chi jun achi cu tic pa rulew. Ca poʼic, ca qʼuiyic, cu rik u nimal pacha jun cheʼ, teʼuri i tzʼiquin quiqui ʼan qui soc che tak u ʼab. (Queje i tijojbal tzij ile xu bij i Jesus chique, sakirsabal-re wach u qʼuiyaric i u ʼatbal tzij i Dios.)

²⁰ I Jesus xak xu bij chique: —I ʼatbal tzij re i Dios ¿wach nawi quin junamsaj ruʼ?

²¹ Are ca cʼun chiquixol i winak, queje pacha coʼon i cunbal re i caxlanwa. Ile, we jun ixok cu chapo, y cu coj oxib almul arin ruʼ, teʼuri ca walij u wach i ʼor ronojel, tupu xa jubiʼ i cunbal ʼo ruʼ. (Xak queje ile coʼon i ʼatbal tzij re i Dios —xu bij i Jesus chique.)

²² I Jesus ʼenam-re pa Jerusalen. Ca tijin chi be, are cupon che jun aldéa, o xak che jun tinimit, ire cu jek u cʼutic chique i winak je ʼo chila.

²³ ʼO jun xtzʼonow che: —Nim laj winak, ¿ne te qʼui que ʼel chupam i qui mac? —coʼono. I Jesus xu bij chique i winak:

²⁴ —Chi ʼana pen i oquic che u xol uchija lotʼlic; coʼon panok je qʼui neri cacaj oquic, péro n-que oc taj.

²⁵ I rajaw ja we u tzʼapim chic i uchija, n-cu jak ta chic chiwe. Yix chi ix ʼo can chi sak qui cʼojcʼa na, y qui bij pan che: “¡Nim laj winak, cha jaka i uchija chake!” qui bij na. Ire xa cu bij chiwe: “¿Pa ix petnak wi yix? Yin n-wetaʼam ta i wach,” coʼono.

²⁶ Teʼuri yix qui bij na: “Yoj ka tijom i ka wa awuʼ, xak i ka yaʼ awuʼ; xak at cʼutun-nak pa ka tinimit,” quix cha che.

²⁷ Ire cu bij tan chic chiwe: “N-wetaʼam taj pa tak ix petnak wi. Chix el na chinwach; xa ix aj ʼanol mal,” cu bij na chiwe.

²⁸ Lic quix oʼ na, lic qui kachʼachʼej ni iware are quiwilo chi yix xa chi sak ix ʼo wi, xak quiwilo chi paja je ʼo wi i mam Abraham, i mam Isaac, i mam Jacob; xak conojel i ujer ajbil u tzij i Dios ʼis je ʼo chila pa cu ʼat wi tzij i Dios.

⁹ Kꞌaxtaj kuya ujiqꞌobꞌalil; noꞌj we na xuya taj, kꞌa ekꞌuchiriꞌ utz kachet bꞌi” xchaꞌ.»

¹⁰ Pa jun qꞌij re uxlanibꞌal ri Jesús kakꞌutun chupa jun sinagoga.

¹¹ Kꞌo kꞌu jun ixoq chiriꞌ e dieciocho lo junabꞌ riꞌ lik kꞌuyukꞌik uꞌanom ri rij ruma jun itzel uxlabꞌixel, yey na utz ta ne kusukꞌupij ribꞌ.

¹² Y ri Jesús echiriꞌ xril rixoq, xusikꞌij apanoq y jewaꞌ xubꞌiꞌij che: —Ixoq, lal kunutajinaq chi che ri yabꞌil kꞌo wi la —xchaꞌ.

¹³ Y xuya ruqꞌabꞌ puwi rixoq; y chupa kꞌu laꞌ la joqꞌotaj rixoq xsukꞌupitajik y xujeqo kuyak uqꞌij ri Dios.

¹⁴ Ekꞌu ri taqanel re ri sinagoga lik xpe royowal chirij ri Jesús ma xkunan chupa ri qꞌij re uxlanibꞌal, y xubꞌiꞌij kꞌu chike ri winaq: —Kꞌo waqibꞌ qꞌij re chak; chupa waꞌ utz kape alaq re kakunax bꞌi alaq, pero lik na ubꞌe taj kakunax alaq chupa ri qꞌij re uxlanibꞌal —xchaꞌ.

¹⁵ Ekꞌu ri Jesús xubꞌiꞌij: —¡Xa kebꞌ palaj alaq! Onoje ralaq ¿na kakir ta nebꞌa alaq ri bꞌoyex y ri buru chupa ri qꞌij re uxlanibꞌal chaꞌ kakꞌam bꞌi alaq chi tijoj yaꞌ? Kaꞌan ne alaq waꞌ chike yey xa e awaj.

¹⁶ Makꞌuwariꞌ taqal che wiꞌxoq katoꞌik, ma rire ralkꞌoꞌal kan ri Abraham, yey e dieciocho lo junabꞌ waꞌ “yututal” ruma ri Satanás. ¿Na utz ta kami riꞌ kesax chupa ri yabꞌil pa ri qꞌij re uxlanibꞌal? —xchaꞌ.

¹⁷ Echiriꞌ xubꞌiꞌij waꞌ ri Jesús, lik xekꞌix konoje ri tzel kebꞌilow re; noꞌj konoje ri winaq lik kekiꞌkot ruma ri kꞌutubꞌal re runimal uchuqꞌabꞌ ri Dios kuꞌan ri Jesús.

¹⁸ Ekꞌuchiriꞌ, xubꞌiꞌij tanchi ri Jesús: «¿Saꞌ rukꞌ kajunimax wi rutaqanik ri Dios?

¹⁹ Riꞌin kanjunimaj rukꞌ juna ijaꞌ re moxtasa, ri xkꞌam bꞌi ruma jun achi y xtikiꞌ chupa ri werta. Ekꞌu riꞌ waꞌ xkꞌiyik y lik xuꞌan bꞌojobꞌik; yey ri tzꞌikin kexikꞌikꞌ che ruwa kaj xkiꞌan kisok puwi taq ruqꞌabꞌ» xchaꞌ.

²⁰ Y xubꞌiꞌij tanchi ri Jesús: «¿Saꞌ rukꞌ kanjunimaj wi rutaqanik ri Dios?

²¹ E jelaꞌ pachaꞌ ri levadura, ma echiriꞌ juna ixoq kuꞌan pam, kutuk jubꞌiqꞌ levadura xoꞌlibꞌal oxibꞌ pajbꞌal harina y ri levadura kusipowirisaj upa ronoje ri qꞌor» xchaꞌ.

²² Echiriꞌ ri Jesús kꞌo chi bꞌe re keꞌek Jerusalem, xikꞌow pa taq tinamit y pa taq aldeas, e riꞌ kakꞌutunik.

²³ Y kꞌo kꞌu jun xbꞌiꞌn che: —Wajawal, ¿xa nawi jujun ri kekolobꞌetajik? —xcha che. Y ri Jesús xukꞌul uwach:

²⁴ «Lik chichꞌikikej iwibꞌ chaꞌ kixok chupa ri nutaqanik che ri okibꞌal xa chꞌutiꞌn uwach, ma kambꞌiꞌij chiwe: Kopon na ri qꞌij echiriꞌ lik e kꞌi ri kakaj kebꞌok bꞌi, noꞌj na kayaꞌtaj ta chike kebꞌok bꞌi.

²⁵ »Ma e kuꞌana pachaꞌ ri rajaw juna ja echiriꞌ kuꞌan juna nimaqꞌij. Echiriꞌ ebꞌokinaq chi konoje ri ebꞌusikꞌim, kutzꞌapij lo ri puerta, y na jinta chi kꞌu junoq kokik. Jekꞌulaꞌ riꞌ ri kikꞌulumaj riꞌix, na kixok ta chubꞌi. Kijeq kꞌu riꞌ kixchꞌaw apanoq: “Qajaw, Qajaw, yaꞌa ko la chiqe kojok bꞌi” kixchaꞌ. »Yey Rire jekꞌuwaꞌ kukꞌul lo uwach chiwe: “Riꞌin na wetaꞌam taj pa ix petinaq wi riꞌix” kacha chiwe.

²⁶ »Ekꞌuchiriꞌ, kijeq ubꞌiꞌxik: “Oj waꞌ kꞌu woꞌqinaq ukꞌ la yey xkꞌutun ne la pa taq ri bꞌe re ri qatinamit” kixcha che.

²⁷ »Noꞌj Rire kubꞌiꞌij lo chiwe: “Paqatzij wi, riꞌin na wetaꞌam taj pa ix petinaq wi riꞌix. Chixela chinuwach, iwonoje ri ix ꞌanal re ri lik itzel uwach” kacha chiwe.

²⁸ »Ekꞌuchiriꞌ, lik kixoqꞌik y kaqichꞌichꞌ ruwi iweꞌ echiriꞌ kebꞌiwil ri Abraham, ri Isaac y ri Jacob kukꞌ konoje ri qꞌalajisanelabꞌ e kꞌo rukꞌ ri Qaqaw pa rutaqanik chilaꞌ chikaj; yey ekꞌu riꞌ riꞌix na jinta piqꞌabꞌ kixok bꞌi kukꞌ.

⁹ Cꞌaxtaj cuya ujikꞌobalil; noꞌj we na xuya taj, cꞌa ecꞌuchiriꞌ utz cachet bi” xchaꞌ.»

¹⁰ Pa jun kꞌij re uxlanibal ri Jesús cacꞌutun chupa jun sinagoga.

¹¹ Cꞌo cꞌu jun ixok chiriꞌ e dieciocho lo junab riꞌ lic cꞌuyuqꞌuic uꞌanom ri rij ruma jun itzel uxlabixel, yey na utz ta ne cusucꞌupij rib.

¹² Y ri Jesús echiriꞌ xril rixok, xusiqꞌuij apanok y jewaꞌ xubiꞌij che: —Ixok, lal cunutajinak chi che ri yabil cꞌo wi la —xchaꞌ.

¹³ Y xuya rukꞌab puwi rixok; y chupa cꞌu laꞌ la jokꞌotaj rixok xsucꞌupitajic y xujeko cuyac ukꞌij ri Dios.

¹⁴ Ecꞌu ri takanel re ri sinagoga lic xpe royowal chirij ri Jesús ma xcunan chupa ri kꞌij re uxlanibal, y xubiꞌij cꞌu chique ri winak: —Cꞌo wakib kꞌij re chac; chupa waꞌ utz cape alak re cacunax bi alak, pero lic na ube taj cacunax alak chupa ri kꞌij re uxlanibal —xchaꞌ.

¹⁵ Ecꞌu ri Jesús xubiꞌij: —¡Xa queb palaj alak! Onoje ralak ¿na caquir ta neba alak ri boyex y ri buru chupa ri kꞌij re uxlanibal chaꞌ cacꞌam bi alak chi tijoj yaꞌ? Caꞌan ne alak waꞌ chique yey xa e awaj.

¹⁶ Macꞌuwariꞌ takal che wiꞌxok catoꞌic, ma rire ralcꞌoꞌal can ri Abraham, yey e dieciocho lo junab waꞌ “yututal” ruma ri Satanás. ¿Na utz ta cami riꞌ quesax chupa ri yabil pa ri kꞌij re uxlanibal? —xchaꞌ.

¹⁷ Echiriꞌ xubiꞌij waꞌ ri Jesús, lic xeqꞌuix conoje ri tzel quebilow re; noꞌj conoje ri winak lic quequiꞌcot ruma ri cꞌutubal re runimal uchukꞌab ri Dios cuꞌan ri Jesús.

¹⁸ Ecꞌuchiriꞌ, xubiꞌij tanchi ri Jesús: «¿Saꞌ rucꞌ cajunimax wi rutakanic ri Dios?

¹⁹ Riꞌin canjunimaj rucꞌ juna ijaꞌ re moxtasa, ri xcꞌam bi ruma jun achi y xtiquiꞌ chupa ri werta. Ecꞌu riꞌ waꞌ xqꞌuiyic y lic xuꞌan bojobic; yey ri tzꞌiquin quexiqꞌuicꞌ che ruwa caj xquiꞌan quisoc puwi tak rukꞌab» xchaꞌ.

²⁰ Y xubiꞌij tanchi ri Jesús: «¿Saꞌ rucꞌ canjunimaj wi rutakanic ri Dios?

²¹ E jelaꞌ pachaꞌ ri levadura, ma echiriꞌ juna ixok cuꞌan pam, cutuc jubikꞌ levadura xoꞌlibal oxib pajbal harina y ri levadura cusipowirisaj upa ronoje ri kꞌor» xchaꞌ.

²² Echiriꞌ ri Jesús cꞌo chi be re queꞌec Jerusalem, xicꞌow pa tak tinamit y pa tak aldeas, e riꞌ cacꞌutunic.

²³ Y cꞌo cꞌu jun xbiꞌn che: —Wajawal, ¿xa nawi jujun ri quecolobetajic? —xcha che. Y ri Jesús xucꞌul uwach:

²⁴ «Lic chichꞌiquiquej iwib chaꞌ quixoc chupa ri nutakanic che ri oquibal xa chꞌutiꞌn uwach, ma cambiꞌij chiwe: Copon na ri kꞌij echiriꞌ lic e qꞌui ri cacaj queboc bi, noꞌj na cayaꞌtaj ta chique queboc bi.

²⁵ »Ma e cuꞌana pachaꞌ ri rajaw juna ja echiriꞌ cuꞌan juna nimakꞌij. Echiriꞌ eboquinak chi conoje ri ebusiqꞌuim, cutzꞌapij lo ri puerta, y na jinta chi cꞌu junok coquic. Jecꞌulaꞌ riꞌ ri quicꞌulumaj riꞌix, na quixoc ta chubi. Quijek cꞌu riꞌ quixchꞌaw apanok: “Kajaw, Kajaw, yaꞌa co la chike cojoc bi” quixchaꞌ. »Yey Rire jecꞌuwaꞌ cucꞌul lo uwach chiwe: “Riꞌin na wetaꞌam taj pa ix petinak wi riꞌix” cacha chiwe.

²⁶ »Ecꞌuchiriꞌ, quijek ubiꞌxic: “Oj waꞌ cꞌu woꞌkinak ucꞌ la yey xcꞌutun ne la pa tak ri be re ri katinamit” quixcha che.

²⁷ »Noꞌj Rire cubiꞌij lo chiwe: “Pakatzij wi, riꞌin na wetaꞌam taj pa ix petinak wi riꞌix. Chixela chinuwach, iwonoje ri ix ꞌanal re ri lic itzel uwach” cacha chiwe.

²⁸ »Ecꞌuchiriꞌ, lic quixokꞌic y cakichꞌichꞌ ruwi iweꞌ echiriꞌ quebiwil ri Abraham, ri Isaac y ri Jacob cucꞌ conoje ri kꞌalajisanelab e cꞌo rucꞌ ri Kakaw pa rutakanic chilaꞌ chicaj; yey ecꞌu riꞌ riꞌix na jinta pikꞌab quixoc bi cucꞌ.