9 ne btegwe goo re mbyiz kuu nzo yeza, ne gab goo lo re zha: “Lee wiz kuu nabee Zha Nabee lo goo mzin gaxa lo goo”.
10 Per os tsin goo thib yez ta kayaat zha goo, broo goo yeza ne gab goo lo zha:
11 “¡Asta yuyaaz laz goo kuu mke nii nee, tsib neey tsa yaane! Tsa ne re tawlaz goo lee goo mkayaat nee. Per ndoblo ne goo koree: Lee wiz kuu nabee Diox mzin gaxa lo goo.”
12 Tak wlipaa na nin, lee wiz kuu naab Diox kwent lo reta men, lee yalti kuu rid re zha yeza, gak masraa nati nake yalti kuu rid re zha yez Sodoma.
13 ’¡Aka nalatt rid re goo zha yez Corazín! ¡Aka nalatt rid re goo zha yez Betsaida! ¡Aka nalatt rid goo yalti! Os leen yez Tiro ne Sidón gagak re kuu thoz ree kuu ngok lo re goo, ndaʼa wiz gatsee zha mod nak zha ne gagok zha lar kuu nambaat ne gatob zha lo di, tsa galoo zha lee leettsoo zha kwathoz nabil nzo por re falt kuu mtsow zha lo Diox.
14 Kona lee wiz kuu naab Diox kwent lo reta men, lee yalti kuu rid goo gak masraa nati, nake yalti kuu rid re zha yez Tiro ne Sidón.
15 Ne lee re goo zha yez Capernaúm, ¿chu ntsow goo xgab lee goo tsin yibaa? ¡Nagte tata, sinke lee goo tsin asta xann ta nak Hades ta nzo xbi re zha nguth!
16 Tsa nzhab Jesús lo re zha kuu mtaal Jesús re yeza: ―Loka zha kuu kenza kuu gab goo, noga kenza zha kuu nin; ne lee zha kuu kayaat goo noga na nkayaat zha, ne lee zha kuu nkayaat na noga nkayaat zha, zha kuu mtaalʼn.
17 Leettsa mretab re tson galbtsii chop zha kuu mtaal Jesús re yez, kwathoz naley nzo leettsoo re zha, ne nzhab zha: ―Zha Nabee, asta re mbi fyer nzhon diiz lo nee kon yalnabee chaana.
18 Tsa lee Jesús nzhab lo re zha: ―Mwiin lee Maxuuy mrethin yibaa taxal bel bti.
19 ’Mndan yalnabee lo goo, tsa lo goo dits mbeel ne dits mbezhub, ne mndan yalnabee lo goo tsow goo gan lo yalney chaan Maxuuy, ne yent kwan tak goo.
20 Ne ndoblot yo naley leettsoo goo, tak nzhon re mbi fyer diiz lo goo, sinke naley bloo goo leettsoo goo, tak lee le goo nkeʼa yibaa.
21 Ne leeka ora lee Mbi Nayon mtsow kwathoz naley ngoo leettsoo Jesús, ne nzhab Jesús: ―Nzhoolʼn loʼa Xutʼn, Zha Nabee yibaa ne yezlyu, tak mkaatsa koree lo re zha kuu nzhaak, ne lo re zha kuu nyen re kuu, ne mloo luy lo re zha kuu gagt. Xutʼn tabaa mtsow luy tak tabaa nlaaza.
22 ’Reta kwaa mndaa Xutʼn lon. Ne neeka thib zha net cho nakʼn, sinke beeta Xutʼn ne cho nakʼn. Ne neeka thib zha net cho nak Xutʼn, sinke beeta na ne cho nak Xutʼn, ne lo re zha kuu nlazʼn lebee zha Xutʼn, tetsowʼn lebee zha Xutʼn.
23 Tsa mwii Jesús lo re zha kuu ngeteed lo Jesús, ne nzhab Jesús lo re zha: ―Wen nda re zha kuu ngwii re kuu ngwii goo.
24 Tak wlipaa na nin lo goo, tyen re profet ne tyen re rey ngwalaaz gagwii re kuu ngewii goo, per mwiit zhay, ne ngwalaaz zha gagon zha re kuu ngeyon goo per mbint zhay.
25 Tsa lee thib maestr kuu nloo xkiiz Diox, ngwateli ne mnaabdiz lo Jesús, tak nlaaz zha yetsal zha thib kuu keki zha Jesús, tsa nzhab zha: ―Maestr, ¿kwan ndoblo tsowʼn, tsa tsowʼn gan yalnaban kuu thitanax?
26 Jesús mkab ne nzhab: ―¿Kwan nzhab ley? ¿Ne kwan nyena or nlab luy?
27 Lee maestr kuu nloo xkiiz Diox mkab, ne nzhab: ―Ndoblo ke leettsooʼa Diox kon dib ndroo leettsooʼa, ne kon dib yalnaban chaana, ne kon dib yalney chaana, ne kon dib xgaba, ne ndoblo ke leettsooʼa tabena taxal nke leettsooʼa leeka lu. Lv. 19:18; Dt. 6:5
28 Jesús mkab lo zha, ne nzhab: ―Wen mkaba, btsow koree tsa bana.
29 Per lee zha nlaaz gab, nyent zha kona, tsa mnaabdiz zha lo Jesús, ne nzhab zha: ―¿Ne cho nak taben da tsa?
30 Tsa lee Jesús mkab lo zha, ne nzhab: ―Nal tan thib kwent loʼa. Thib zha mroo yez Jerusalén ndyaadla zha yez Jericó, ne mroo chop tson wann lo zha, tsa mlowann re wann chaan zha; ne mkee wanne yek zha ne mtaan wann zha taxal zha nguth.
31 Tsa lee thib ngwleyy mriid tya. Per or mwii ngwleyy zha, beeta mwii ngwleyy lo zha, ne thib lad mriid ngwleyy nda ngwleyy.
32 Ne leeka tata mriid thib zha raz Leví, ne or mwii zha zhaʼa, beeta mwii zha zha, ne mriid zha nda zha.
