1 Oseso ngko ole waselohonɨmonneꞌno yohono. Aꞌamu Isɨlael somo Anɨtu uhwosopoꞌmentiso oso hofɨko Anɨtuneꞌno hohujo ikinjɨmofahonɨngkofi Anɨtu kako oso aꞌamu homo somo wae nɨhuꞌnahone yaoꞌmentisotaho. Oꞌo, awonoho. Nɨhuꞌnahoneꞌmaho. Oꞌo, ngko huhwoꞌni aꞌamu Isɨlael hwoꞌnyoho. Ngko Apɨlohamɨye imu hwoꞌnyoho. Ngko kakoe kakwoꞌyohwo Jekoupɨye hwomu Mpenyaminɨye temtitofo mtaꞌango hwoꞌnyoho.
2 Aꞌamu Isɨlael hohonta Anɨtu nahwosopoꞌmentiso hnꞌnɨmo Anɨtu kako mohoꞌnonafefoho. Hwe fihwo Ilaija sohumo Anɨtu hungkuno uyahonɨngki kako aꞌamu Isɨlael somneꞌno hungkuno yokumpohnꞌnyo ulɨmentiso soꞌno sekwo huno seyohoho. Kako Anɨtumo ole ulɨmento,
3 Hwe Engo sohwosi, aꞌamu sohwamo jɨje hungkuno uyahonɨngki lɨmotofo oso hwamo nomꞌne aꞌamuso fonjosyalokwofo. Aꞌamu kikineꞌno yahu fonjokisasiyo ijempohoso wonyo nto imokumalofo. Osoꞌno ngko angaꞌnohino sohwoꞌni humanji kikineꞌno sɨmeho kijopalokweno. I osoꞌno hofɨko ngkimo wofonjonɨsyantɨfeꞌno hofɨko ngkineꞌno hafɨhafe ntɨpeentɨkwofo. Ose ulahonɨngki
4 Anɨtu kako kakineꞌno aku hungkuno pehofo ulɨmentono. Anɨtu ole ulɨmento, Kɨkoꞌnohinɨꞌmaho. Oꞌo, ngko aꞌamu sefen tausen (7,000) osomo mokosyohumaleno. Hofɨko oso hwasyo anɨtu Mpal sohuneꞌno hwomtame mulohofɨwoꞌnɨngkiyohofo. Oꞌo, hofɨko ngkimo sɨmeho ntopalokwofo. Ose ulɨmentisofoho.
5 Olohonta oso paꞌnyoso Anɨtu kako yalofoho. Aꞌamu Juta angaꞌno angaꞌnohino somo Anɨtu kako hitoho ulofahonɨngki kako nakumo kakoꞌntnne nonahwosopento wopɨngo nelohofahonɨngki nakwo kakoe aꞌamu nehnꞌnwi humalohwono.
6 I nakwo nakwoe honɨngkano wopɨngo imotohwone soꞌno nahwosopoꞌmentisoꞌmaho. Oꞌo, nakwoe honɨngkano wopɨngomneꞌno nahwosopententesi u kako nakumneꞌno wopɨngo monalohofeꞌnesohilo. Oꞌo, nakwoe yokumpohnꞌnyo soꞌno nahwosopehwonesohilo. Oseꞌmanji Anɨtu nalohofososo ne aneꞌnesohilo.
7 Osoꞌno nakwo pehofo lanehwono. Olenoho. Aꞌamu Isɨlael fehohnjo hofɨko ole hwasyo syafɨsyɨwoꞌnɨngkohofi, Nakwo honɨngkano hungkunomo itoꞌno inɨngkowasoꞌmanji Anɨtu kako nakumo ole wonalɨmontonoho, Sekwo wopɨngo kuyoho. Ose wonalɨmontonoho. Osoꞌno oso hwasyo huno hiso syafɨsyontɨfi hofɨko syoho engo yalokwofo. I osoꞌno Anɨtu kakoꞌntnne uhwosopoꞌmentiso osomnohini Anɨtu kako wopɨngo kuyoho ulɨmontonoho. I aꞌamu nomꞌneso hofɨko Anɨtuye hungkuno somo haloho maposo oso aꞌamufe sɨmehoso yokumpohnꞌnyo nto imoꞌnɨmaho.
8 Oso hisoꞌno aꞌamu Anɨtuye hungkuno mtɨꞌmokumentohofo sohwa aꞌamu juta somneꞌno olo soꞌno mtɨꞌmokumentohofi, Hofɨkoe huno sɨmeho osomo Anɨtu kako saho hopa kuwojahonɨngki nakwo hungkuno hofɨkimo ulahonɨngkuhwoni hofɨko haloho mupaꞌnyoꞌnjo yontɨfi muhwonyoꞌnjo imentohofofoho. Oseso oso mtaꞌangoso oso yahinoso neꞌno mjɨmoꞌnɨmoponto olohonta neꞌno weho. Ose mtɨꞌmokumentohofofoho.
9 Ihwoni. Mote sohwo hofoyomo wosopayo uhwononto wanɨmo lonto nomanteso oso hofoyo huhwo sohwo poyo umokumontonoho. Oso paꞌnyoso hwe yofe engoꞌnjo Ntefit kako huhwo aꞌamu Juta somneꞌno olo soꞌno nto mtɨꞌmokumentisofoho. Aꞌamu Jutaso hofɨkoe wosopayo engo nonontɨfi hofɨkoe yoꞌmayo hoꞌyango wopɨngo somo uhwonontɨfi ole syafɨsyɨwoꞌnɨngkohofi, Ihwoni, Anɨtu kako nakumo wopɨngo nelohofalofoho. Ose nalohofonto wopɨngo kuyoho nelalofoho. Oso hunoso hwasyo syafɨsyɨwoꞌnɨngkohofo hiso hofoyo hopa wonyo umokumontonoho.
10 Hofɨkoe tɨmoso sɨkwoꞌmjoho imoꞌnɨngkuhwosi hofɨko yoꞌmayo somo tɨmo ntoꞌno muhwonɨfitnnehofo. Yoꞌmayo tango uꞌmasoso hofɨkoe hano uyoso engkulo engkulokano wowantɨfeho. Ntefit oso hungkuno hiso aꞌamumo yoꞌmayo wopɨngo Anɨtu uyonte somneꞌno sɨmonyo ko yontɨfi kakoe hungkuno ne soꞌno haloho maposoꞌnjo somne mtɨꞌmokumentisofoho.
11 I osoꞌno ngko hungkuno nomꞌne waselohonɨmonneꞌno yohono. Aꞌamu Jutaso hofɨko Anɨtuye hungkunomo haloho mapososoꞌno hofɨko pɨwahuꞌmentohofoso nɨhuꞌnahone pɨwahuꞌmentohofotaho. Oꞌo, nɨhuꞌnahoneꞌmaho. Oso aꞌamu Jutaso hofɨko Anɨtuye honɨngkano wopɨngo somo itoꞌno minɨngkayoꞌnjo yontɨfi sompeeoꞌmentohofo soꞌno Anɨtu aꞌamu temtitofo kengo somneꞌno kakoe mehomi ne imoꞌnɨngkujoꞌno kako asomo utɨmayoꞌne joho ulalofoho. Anɨtu aꞌamu kengo somo wopɨngo ulohofontanɨngkuhwosi aꞌamu Jutaso hofɨko nuhwonɨngkuji hofɨko sɨmeho tohino umnɨngkuhwosoꞌno hofɨko Anɨtumneꞌno huno apaꞌno syafɨsyɨkujoꞌno Anɨtumo apaꞌno uꞌmayo soꞌno hi umoꞌnɨmontonoho.
12 Aꞌamu Jutaso hofɨko honɨngkano wonyo imentohofo soꞌno Anɨtu kako aꞌamu kengo somo wopɨngo ulohofalofoho. Aꞌamu Jutaso hofɨko Anɨtumneꞌno hohujo ikinjaofahonɨngkofi aꞌamu kengoso hofɨko Anɨtuneꞌno huno wopɨngo tɨpemaꞌmentohofofoho. Oseso aꞌamu Jutaso hofɨko Anɨtuneꞌno huno apaꞌno syafɨsyɨkuji asomo iꞌmofapɨkujoꞌno Anɨtu kako nakwo aꞌamu hopiꞌnonohino hnꞌnɨmo kako wopɨngo mɨkunɨmposo engo wonalohoꞌmontonoho.
13 Sekwo aꞌamu temtitofo kengo mtaꞌango soku sekwo upaꞌnɨmno. Anɨtu kako ngkimo aꞌamu temtitofo kengo kengo sokumo kakoe hungkuno lɨkuꞌmofoꞌno syoho ntapmmentiso soꞌno olo syoho hilo soꞌno ngko hi numoꞌnɨngkahonɨngki yalokweno.
14 Ngko olo syoho hiloso yonji ole syofɨsyalokweno, Sekwo temtitofo kengo kengo soku Anɨtuye hungkunomo upaꞌnɨngkuji sɨmeho uyɨkujoꞌno Anɨtu kako wopɨngo waselohoꞌmontonoho. I aꞌamu Jutaso oso homo somo sehonɨngkuji hofɨko huno ole wosyofɨsyantɨfeho. Aꞌamu kengoso hofɨko nakwoe Anɨtuꞌnjopo humafitnnohontɨfi hofɨko apaꞌno Anɨtumo sɨmeho uyɨfitnneꞌno Anɨtuye hungkuno losetɨhwahmꞌmeꞌno aꞌamu Juta angaꞌno angaꞌno Kɨlaisɨmo sɨmeho uyantɨfeho.
15 Anɨtu kako aꞌamu Juta somneꞌno hohujo weꞌenehwo ikinjaofonto aꞌamu temtitofo kengo kengo mtaꞌango somo nomanto kakoꞌnji sɨmeho afa inalokwofo. Osoꞌno tɨfi noꞌmo aꞌamu Jutaso hofɨko Anɨtumo apaꞌno sɨmeho uyɨkujoꞌno Anɨtu kako hofɨkimo asomo utɨmayoso aꞌamu poyo peꞌnontɨfeso songo ulɨkafo oso paꞌnyofoho.
16 Nakwo aꞌamu Juta hnꞌnwiye yahinoso olenoho. Nakwo wosopayo iloho yontani oso wosopayo sɨmoꞌmjoso Anɨtumo uyɨwoꞌnɨngkuhwonefoho. Osoꞌno nakwo oso wosopayo tɨfinjo nɨwoꞌnɨngkuhwoneso oso hiꞌnji Anɨtuyefoho. Oso iyo pmpongo hi oso hi Anɨtuyeꞌmanji u oso pamo hopiꞌnonohinoso kakoefoho.
17 Pahnnɨmo hungkuno upaꞌnɨmno. Anɨtu kako kakoe syohopo iyo angaꞌnohino wopɨngoso hulɨmentisofoho. Oso iyo homo somjo pamo fehohnjoso Anɨtu kako wae yaofonto weꞌmtaꞌango iyo pamo nomanto oso kakoe syoho soponjo iyo somo mufohuꞌmentisofoho. Oso ipamo weꞌmtaꞌango mufohuꞌmentiso huhwo sohwo kako oso iyo syoho soponjo sohuntaꞌni afofo manto ne engo intoꞌnɨmentisofoho. Oso iyo syohoponjoso hwapɨngoso Apɨlohamɨyoho. Iyo pamo weꞌmtaꞌangoso sekwo aꞌamu temtitofo kengo kengoꞌmtaꞌango sokuneꞌno lalokweno.
18 Sekwo aꞌamu temtitofo kengo kengoꞌmtaꞌango soku Anɨtu kako oso iyo ne somo sekumo masefohuꞌmentisofoho. Osoꞌno sekwo aꞌamu Juta somneꞌno sitofo ulɨkutoho. Sekwo sokumo aꞌamu Juta sofe hofiyakumtaꞌni afofo malokwofo. Sekwo soku hwapɨngo kuꞌmaho. Oꞌo, sekwo soku pamo kuyoho.
19 Osoꞌno sekwo ole wolantɨfitaho. Anɨtu kako aꞌamu Juta fehohnjo somo iyo pamo paꞌnyo somo wae yaofonto oso homo somo Anɨtu kako nakumo asomo monafohotoꞌmentisofoho. Ou monafohotofoꞌneso hofɨkimo wae yaoꞌmentisofoho. Ose wolantɨfitaho.
20 Oꞌo, oseꞌmaho. Hofɨko Anɨtumo sɨmeho hiꞌntnnono muyɨmmentohofo soꞌno wae yaoꞌmentisofoho. I osoꞌno sekwo aꞌamu temtitofo kengo soku, Anɨtumo sɨmeho hiꞌntnnono uyalokwofo soꞌno kako sekumo hofɨkoe pijohino osopo mesehumatɨꞌmentisofoho. Osoꞌno sekwo yokumpohnꞌnyo imoꞌnɨngkutoho. Olo soꞌno sekwo iyoho wasenono.
21 Anɨtu kako aꞌamu Juta ipamo ne paꞌnyo somo wae yaoꞌmentiso oso hopaso sekumo wae yasemofonoho. Sekwo yokumpohnꞌnyo imoꞌnɨngkutoho.
22 Oseso nakwo Anɨtu aꞌamumneꞌno hitoho ulofo soꞌnji sɨmeho tohino umnyo soꞌnji uhwonɨngkuhwono. Yoꞌmayo Anɨtu iwoꞌnɨngkisoso itoꞌnohinofoho. Aꞌamu Anɨtuye yahino wopɨngo somneꞌno ulɨkoꞌmaꞌmentohofo somneꞌno Anɨtu kako hofɨkineꞌno sɨmeho tohino engo umnalofoho. I osoꞌno sekwo sokuneꞌno Anɨtu sekuneꞌno hitoho ulofalofoho. I sekwo kakineꞌno hitoho selofɨhwasoꞌno Anɨtu kako sekuneꞌno hitoho neꞌno uloꞌmontonoho. U, sekwo kakineꞌno sɨmeho muyɨkujoꞌno u sekwo hokumo wae weesemoꞌmontonoho.
