12 Tucuynincu musphachcarkancu, ni imata pensayta atispa. Tapucuchcarkancutaj: —¿Ima niytataj munan tucuy cay imari?
13 Waquincuna burlacuspa, nerkancu: —¡Machaska cancu! —nispa.
14 Pedro apostolcunawan cusca sayarispa, alto vozwan nerkan: “Judiocuna, tucuy Jerusalenpi tiyajcuna, cayta yachaychis, niskaytataj allinta uyariychis.
15 Kancuna machaska caskaycuta creenquichis chaywanpas, mana machaskachu caycu; tutamanta iskon horallaraj canpas.
16 Astawanka profeta Joelpaj niskan junt'acuchcan. Payka nerkan:
17 ‘Dios nin: Khepa p'unchaycunapi tucuy runacunaman Espirituyta chayachisaj. Churiyquichiscuna ususiyquichiscunapas Diosmanta parlankacu. Waynacunataj moskoypi jina riconkacu. Machulacunapas moskoycunata moskoconkacu.
18 Chay p'unchaycunapi khariman warmimanpas, tucuy sirviwajcunaman Espirituyta chayachejtiy, nokamanta parlankacu.
19 Janaj pachapi musphanacunata ricuchisaj, cay pachapitaj señalcunata: yawarta, nina laurayta, phuyu k'osnitapiwan.
20 Inti tutayanka, quillataj yawar jina puca tuconka, manaraj Señorpaj athun glorioso p'unchay chayamuchcajtin.
21 Señorta tucuy wajacojcunaka salvaska cankacu.’
22 “Israel runacuna, uyariychis ari. Cayta niyquichis: Nazaret llajtayoj Jesús kancuna uqhupi milagrocunata, musphana jina ruwaycunata, señalcunatawan ruwarkan. Ruwaskanpi Dios ricuchisunquichis pay Diosmanta caskanta. Chayta allinta yachanquichis.
23 Chaywanpas Diospaj ñaupajmantaña waquichiskanman jina kancunaman pay entregaska cajtin, kancuna presota jap'ichinquichis. Wañuchinquichistaj, mana allin ruwaj runacuna chaupipi chacataspa.
24 Diostaj causarichin wañuy nanaycunamanta libraspa, imaraycuchus wañoyka mana atipayta aterkanchu.
25 Gobernaj David Jesusmanta nerkan: ‘Nokaka ñaupakeypi Señorta ricullajpuni cani. Paña ladoypi pay cajtin, ni ima urmachiwankachu.
26 Chayraycu sonkoyka cusicun, simiytaj taquin cusicuywan junt'a. Diospi confiacuspa, causanka tucuy runa cayneyka.
27 Imaraycuchus sepulturapi mana sakerpayawanquichu. Nillataj santo sirvejniyquipaj cuerponta ismuchinquichu.
28 Causay ñanta ricuchiwanqui. Kanwan cajtiytaj, cusiywan junt'achiwanqui.’
29 “Llajtamasicuna, sut'inta niyta munayquichis ñaupaj tatanchis Davidmanta. Payka wañuporkan, p'ampaska carkan, caypitaj nokanchiswan sepulturan cachcan.
30 David profeta caspa yacharkan Dios juramentowan prometicuskanta ujnin pariententa gobernajta churananpaj.
31 Ajinaka ricuchcanmanñapas jinata, Jesucristo causarinanmanta David parlarkan. Nillarkantaj sepulturapi mana quedananta ni cuerponpas ismunanta.
32 Dios cay Jesucristota wañuymanta causarichimorkan. Nokaycutaj tucuy caycunamanta testigo caycu.
33 Pay okhariska carkan, Diospaj paña ladonpi tiyaycunanpaj. Dios, prometicuskanman jina, Santo Espirituta payman korkan. Paytaj chay Espirituta nokaycuman cachamorkan, imaynatachus cunan ricuchcanquichis uyarichcanquichistaj ajinata.
34 Mana Davidchu janaj pachaman okhariska carkan; chaywanpas payka nerkan: Dios Señorniyta nerkan: ‘Tiyaycuy paña ladoypi,
35 noka enemigoyquicunata atipaspa chaquiyqui uraman churanaycama.’
36 “Tucuy Israel runacuna ciertota yachachuncu, Dios cay quiquin kancuna chacataskayquichis Jesusta churan Señor, Cristotaj cananpaj.”
37 Chaypi tantaska cajcuna cayta uyarispa, sinchitapuni llaquicorkancu. Taporkancutaj Pedrota waj apostolcunatapas: —Waukecuna, ¿imatataj ruwasajcu?
38 Pedrotaj paycunaman contestarkan: —Sapa ujniyquichis Diosman cutiricuychis, bautizachicuychistaj Jesucristopaj sutinpi, Dios juchayquichista perdonananpaj. Ajinapi Dios Santo Espiritunta kosunquichis.
39 Cay promesaka kancunapaj, wawayquichiscunapaj, tucuy carupi cajcunapajpiwan. Niyta munan: picunatachus Señorninchis Dios wajayta munan, chaycunapaj cay promesaka.
40 Caycunawan waj palabracunapiwan Pedro nerkan: —¡Salvacuychis, cay sajra runacunawan cusca mana castigaska canayquichispaj!
41 Ajina Pedropaj willaskanta creejcuna bautizaska carkancu. Chay p'unchay quimsa waranka jina creyentecunaman yapacorkancu.
42 Tucuynincu apostolcunapaj yachachiskanpi firme quedacorkancu, tucuy cajnincuta jaywanacuspa, oracionta ruwaspa. Tantaycucuspataj, t'antata partispa junto miqhorkancu.
43 Apostolcuna achqha milagrocunata señalcunatawan ruwajtincu, tucuy musphararkancu.
44 Tucuy creejcunaka ujchaska carkancu, tucuy cajnincuta paycunapura jaywanacuspa.
45 Jallp'ancuta ima cajnincunatawan vendispa, kolketa jaywararkancu sapa uj pisichicuskanman jina.
46 Sapa p'unchay templopi tucuynincu tantacoj cancu. Wasicunapi t'antata partispa, athun cusicuywan sumaj sonkowan junto miqhorkancu.
47 Diosta alabarkancu, tucuy runacunapas paycunata respetarkancu. Señortaj sapa p'unchay salvaska cajcunata iglesiaman yapachcarkan.
