4 Te ní naníhí‑güedě té Pèlú, te ní tnɨɨ ñaha‑güedě ndécá ñàha‑güedé cuáháⁿ vecaá. Te té Hèrodés ní táúchíúⁿ‑dě cuáháⁿ sáhúⁿ ɨɨⁿ sandàdú cùndeé‑güedé té Pèlú. Te ní xáhaⁿ‑dě: —Cundeé‑ndó ndɨ̀ cúmí ndɨ cúmí‑ndó těe‑ǎⁿ —càchí‑dé xǎhaⁿ‑dě xii‑güedé. Te té Hèrodés ní sani iní‑dé queñuhu‑dé té Pèlú vecaá òré ná yǎha vico cuèndá cahni ñaha‑güedě cáháⁿ‑dě ní cùu.
5 Te ní xɨ́hɨ‑ni té Pèlú vecaá, te ní xíndeé cuaa ñaha sàndadú xii‑dé. Te cue ñáyiu sàndáá iní tnúhu Yá Ndiǒxí ío ní xícáⁿ táhǔ‑yu núú‑gǎ cuèndá sá ñà túú nǎ cada ñaha‑güedě xii‑dé.
6 Ɨɨⁿ niú‑gá quɨhɨ té Pèlú vecaá ní cùu, te nduu tněé tauchìuⁿ té Hèrodés quɨ́hɨ́ⁿ sandàdú queñuhu ñaha‑güedě xii‑dé vecaá cuèndá quiní nchaa ñáyiu nása cada ñaha‑güedě ní cùu. Te té Pèlú cáá‑dě xìdí‑dé xɨtɨ́ vecaá, te ndɨ ndùú dúcúⁿ ndáhá‑dě ndútú càdená, te xio xio dɨ̀ñɨ‑dé ndécú sàndadú, te dava‑gá sandàdú xǐndeé‑güedé yèhe vecaá.
7 Te ní quexìo ɨɨⁿ espíritú xínú cuèchi núú Yǎ Ndiǒxí xɨtɨ́ vecaá núú cáá tě Pèlú xìdí‑dé, te uuⁿni ní dáyèhé‑xi xɨtɨ́ vecaá, te ní dánguɨ̌hɨ ñaha‑xi xìi‑dé, te xǎhaⁿ‑xi xìi‑dé: —Yáchí, ndàcóo —càchí‑xi xǎhaⁿ‑xi xìi‑dé. Te ní ndacóo‑dé, te nchaa cadèná ndútú dǔcúⁿ ndáhá‑dě ní nandáxí.
8 Te ní xáhaⁿ tùcu espíritú‑áⁿ xii‑dé: —Yáchí, nucuíhnu dóó‑n, te ndɨ́hu‑n chàú‑n —càchí‑xi xǎhaⁿ‑xi xìi‑dé. Te ní ndɨ́hu nuu‑dé dóó‑dě, te ní xáhaⁿ tùcu espíritú‑áⁿ: —Candixi dóó‑n, te na quɨ̀hɨ́ⁿ‑ó —càchí‑xi xǎhaⁿ‑xi xìi‑dé.
9 Te té Pèlú ní chinchícúⁿ‑dé espíritú‑áⁿ, te ñá ní cùtnuní iní‑dé nǔu ndáá ɨɨⁿ espíritú xínú cuèchi núú Yǎ Ndiǒxí ducaⁿ quìde àdi ñáhá, te dàcoto ñaha‑xi xii‑dé ní sani iní‑dé.
10 Te nděndaha‑ni‑dě espíritú‑áⁿ cuǎháⁿ ní yáha‑dé nàcuáa xǐnutnɨ́ɨ sandàdú, te ta yǎha‑gá‑dé núú ndécú dàva‑gá‑güedé. Te ní sáá‑dé ndéé yuyèhe núú ndèdɨ́ caá nàcuáa ní yáha ichi sá cuàháⁿ ndéé xɨtɨ́ ñuú, te ní nacaáⁿ méé yèhe‑áⁿ, te ní quee‑dé cuáháⁿ‑dé ndɨhɨ espíritú‑áⁿ. Te ní tnahá‑dé ɨɨⁿ tnuú, te yàcáⁿ ní dándǒo ñaha espíritú‑áⁿ xii‑dé.
11 Te dǎtnùní ní nene váha saní núú‑dě, te ní cutnùní iní‑dé, te ní cachí‑dé: —Ndáá sá Yǎ Ndiǒxí ní tendaha‑gǎ espíritú‑ǎⁿ ní quixi‑xi ní dácǎcu ñaha‑xi xìi‑í cuèndá sá và cáhní ñàha té Hèrodés. Te dava ñáyiu isràél ío ní cudɨ́ɨ́ ìní‑yu cuèndá sá nǐ cuiní té Hèrodés cahni ñaha‑dě xii‑í —duha ní cachí‑dé sátá nǐ cutnùní iní‑dé.
12 Te sátá nǐ cutnùní iní‑dé sá nǐ cácu‑dé, te cuáháⁿ‑dé vehe ɨɨⁿ ñaha nàni Mariá nǎná tě Juàá, àdi Mácú chi úú dɨ̀u‑dé, te xíáⁿ ndécú vàí‑yu càháⁿ ndɨhɨ́‑yu Yá Ndiǒxí.
13 Te té Pèlú ní quexìo‑dé ndéé yuyèhe ní dácásáⁿ‑dě, te ní quixi ɨɨⁿ xíchí nání Ròdé ní quixi ndehe‑xi nǎ cúú ñǎyiu dàcasaⁿ.
14 Te ní nucúhuⁿ ndudú‑xi sá dɨ́ú tě Pèlú, te ní cudɨ́ɨ́ víhí ìní‑xi, dico ñá ní nàcaáⁿ‑xi yuyèhe. Te ní quene cunu‑xi cuáháⁿ ngúñaha‑xi xìí‑yu sá nútnɨ̌ɨ té Pèlú yuyèhe ndaa quehé.
15 Te ñá ní sàndáá iní‑yu tnúhu ní cáháⁿ‑xi, te xǎhǎⁿ‑yu xii‑xi: —¡Ná tnúhu vìhi cáháⁿ‑ǒⁿ xíchí lùcú! —càchí‑yu xǎhǎⁿ‑yu. Te xǎhaⁿ‑xi sǎ ndàá nútnɨ̌ɨ‑dé, te xǎhǎⁿ‑yu: —Ñá dɨ́ú tě Pèlú chi espíritú sá xító ñàha xii‑dé cúú sǎ càháⁿ —càchí‑yu xǎhǎⁿ‑yu xii‑xi.
16 Te òré ducaⁿ xǐtnàhá‑yu, te té Pèlú ní dácásáⁿ tùcu‑dé yuyèhe. Te ní sáháⁿ‑yu ní nacaáⁿ‑yu yuyèhe, te ní xiní‑yu sá dɨ́ú tě Pèlú, te ní cuñúhu vìhí‑yu.
17 Te ní quide‑dé ndaha‑dé núǔ‑yu cuèndá cadɨ́‑yu yuhú‑yu. Te ní ngüíta‑dé ní cani‑dé cuèndú nàcuáa ní quide ñaha Yǎ Ndiǒxí xii‑dé sá nǐ dácǎcu ñaha ɨ̀ɨⁿ espíritú xínú cuèchi núú‑gǎ xii‑dé vecaá, te ní xáhaⁿ‑dě xií‑yu: —Cúu‑ndo tě Jàcobó ndɨhɨ dava‑gá ñáyiu sàndáá iní tnúhu Jèsús nàcuáa ní quide ñaha Yǎ Ndiǒxí xii‑í —càchí‑dé xǎhaⁿ‑dě xií‑yu. Te sátá dúcáⁿ nǐ xáhaⁿ‑dě, te ní quee‑dé cuáháⁿ‑dé ɨngá xichi.
18 Te sátá nǐ túndaá, te ní ngüíta nchaa sandàdú càháⁿ ɨɨⁿ càháⁿ ɨɨⁿ‑güedé, te xǐtnàha‑güedé: —Ñá túú‑gǎ té Pèlú yɨ́hɨ́ vècaá, ¿te nása cada‑o‑i? —càchí‑güedé xǐtnàha‑güedé.
19 Te té Hèrodés ní tendaha‑dě tɨtnɨ́ sandàdú cuáháⁿ‑güedé cuánúndúcú ñàha‑güedé, te ñá ní nàníhí ñáhá‑güedě xii‑dé. Te dǎtnùní ní cana‑dé sandàdú cue tée ní xíndeé ñáhá xìi té Pèlú, te ní tenàá ñáhá‑dě xii‑güedé, te ní xáhaⁿ‑dě xii dava‑gá cue sandàdú‑dé: —Cahni‑ndo cuè tée‑ǎⁿ —càchí té Hèrodés xǎhaⁿ‑dě. Te dǎtnùní ní quee té Hèrodés distrìtú Jùdeá cuáháⁿ‑dé ñuú Cèsareá, yàcáⁿ ní ngúndecu‑dé.
