47 Te dǎtnùní ní xáhaⁿ tě Pèlú: —Vitna te cuandute ñáyiu ní natuha ichi Xítohó Jesucrìstú chi sa ndècu ndɨhɨ́‑yu Espíritú Yǎ Ndiǒxí dàtná cuìní‑ndó ndècu ndɨhɨ nchoo, núu xíǎⁿ vá cúú càchí dava‑gá ñáyiu sá vǎ cúú cuànduté‑yu —càchí‑dé xǎhaⁿ‑dě xií‑yu.
48 Te dǎtnùní ní xáhaⁿ‑dě xii ñáyiu: —Vitna te cuandute‑ndo, te òré‑áⁿ te cacunehe‑ndo Xǐtohó Jesucrìstú —càchí‑dé xǎhaⁿ‑dě xií‑yu. Te dǎtnùní ní cáháⁿ ndàhú‑yu núú tě Pèlú cundecu ndɨhɨ ñaha‑dě xií‑yu ɨɨⁿ ǔú nduu.
