Loma 6:3-17 in Tabo

³ La꞉ ba꞉moe komo iya꞉tawahanomola, komopa꞉te a beyamo da꞉wadua꞉tiya꞉, iba꞉te ba꞉be komo Ya꞉su Kelisoko ipuwalo ododiya꞉, ale ebeno hoe komo ipuwamo eba꞉go kapimilo konogomoma꞉.

⁴ Iyo, aeno beyamo wadua꞉te komodo ale eba꞉go kapimilo ha꞉lahate, ba꞉bene aeno ha꞉laha apa꞉te bobo ipuwamo atumu eba꞉go kapimilo ba꞉ dito nogomuya꞉. Ba꞉be mabuma꞉ Nabiwi Godote ebeno konomo aloeno heloamo Kelisoko hoe ipuwane keba ka꞉na kadipatiya꞉, ebete ba꞉ ba꞉ba ka꞉na a atumu a꞉wadiya꞉paa꞉tiya꞉ ale ebeno uli ka꞉ka꞉go kemedenama꞉.

⁵ Ba꞉bema꞉ hibila, ale Kelisokono hoe komo ipuwamo eba꞉go kapimilo da꞉nogomuya꞉ma꞉, ba꞉be mabuma꞉ ale atumu ebeno uli ka꞉ka꞉ komamo eba꞉go kapimilo kakamahila꞉halema꞉nema꞉.

⁶ Iyo, a ba꞉ iya꞉tawahala Kelisote keha pihigalo da꞉hoiya꞉, ba꞉ba tetelo Godote aeno pakala emede komo eba꞉go kapimilo keha pihigamo a꞉pihomolatelea꞉miya꞉, ebete ba꞉be gabodo pakala emede komoeno helo ba anakapumi ale kuba ododili komoeno huiyaha꞉ okopima꞉ gala a꞉keda꞉hanama꞉.

⁷ Ba꞉ hibila, keba tetelo lumagiti ebeno pakala emede komoma꞉ da꞉hoemene, ba꞉ba tetelo ebete kuba ododili komoeno helo ipuwane hibilo kuluhukuma꞉ne.

⁸ Ba꞉bema꞉ ale ba꞉moe komo hibima꞉ na꞉midinama꞉, ale Kelisokoba꞉ hibilo da꞉ha꞉lahuya꞉ma꞉, ba꞉be mabuma꞉ ale eba꞉go ebeno ka꞉ka꞉go atumu bemedenama꞉.

⁹ Iyo, a ba꞉ iya꞉tawahala, Godote Kelisoko hoe ipuwane dadipatiya꞉, ba꞉bema꞉ hoe komoeno helote ebetamo gala kitanaha꞉, ebete emedena tetelo gala a꞉kahoenamene.

¹⁰ Ba꞉ hibila, ebete kuba ododili komoeno wato kikipo lawema꞉ kapiya tetenomolo a꞉hoiya꞉, iyo, hoe komoeno helote ebetamo gala a꞉kuluhukunamene, mabu ba꞉ma tetelo ebete Godoko mabuma꞉ uli ka꞉ka꞉go bemedenamene.

¹¹ Ba꞉bema꞉ wadiyala la꞉ ba꞉ atumu la꞉eno kateneno ubi komo kododilinama꞉ ha꞉laha tawakalubima꞉ ba eda꞉hana, la꞉le huiyatiya ba꞉be komo emalagidololo Kelisoko ipuwalo Godoko mabuma꞉ nemedeniyala꞉.

¹² Ba꞉ hibila, la꞉eno ha꞉laha apene kateneno hiya꞉hiya꞉ ubi komate a꞉mahila꞉halenaka, huiyatiya ba꞉bi kuba ubi komate la꞉eno namutudawama꞉ akeda꞉la꞉, la꞉le ba꞉bi kuba ododili komamo papamila꞉hakapoma꞉.

¹³ Iyo, la꞉eno apeno hiliyonomo komokomo ipuwalo eta deha꞉potonomo komamo kateneno eta kuba ubi komamo akapapamila꞉hala꞉. La꞉ huiyatiya la꞉eno ape konomo Godotamo ikamehonomo nikamehonala꞉ ebeno tuputupu komokomo kapiya kododilinama꞉, mabu numa꞉la꞉, la꞉le eta hido komo kapiya kododima꞉ la꞉ dopamo ha꞉lahapimo ba emedena, Godote la꞉ ebeno ka꞉ka꞉mo ba꞉bo wadiya꞉paa꞉lateliya꞉ta.

¹⁴ Ba꞉bema꞉ kuba ododi komote la꞉eno namutudawama꞉ gala a꞉keda꞉mene, mabu ba꞉ma tetelo la꞉le Godokono malemale ipuwado ebeno heloamo emedenamata, iyo, kalakala konomola, la꞉ ha꞉kiya la꞉eno heloamo ebeno Tutumu Tabamo papamila꞉hama꞉ dewagelenamima, ba꞉be komote la꞉ ipuwalo ya꞉lo a꞉wibuya꞉.

¹⁵ Ba꞉bema꞉ diyala, la꞉ ipuwalo etate tabo ba꞉ma ka꞉na da꞉ goemene, “Wadiyala ale aeno ubilo hiya꞉hiya꞉ kuba komokomo dito bododilinakoma꞉, mabu ale Godokono malemale ipuwalo bemedenama꞉, ebeno Tutumu Tabamo papamila꞉ha komodoha꞉. Ba꞉be mabuma꞉ ale ebeno kukala da꞉wakalamima꞉, kuba huiya komote ebegodone atamo a꞉kapa꞉mene.” A꞉iye! Ba꞉mako ukui ba꞉ daedaenomo ukuila!

¹⁶ La꞉ ba꞉ iya꞉tawahala, keba tetelo eta lumagiti ebeno ape ba꞉gala ka꞉ka꞉ konomo eta lumagitamo ikamehonomo dikamehomene, ba꞉ba tetene tupuimiti ebete ba꞉be namutudawa kapiyatamo papamiwatalo ebeno huiyaha꞉ oko bowatihonakomene. Ba꞉bema꞉ la꞉ ba꞉ ba꞉ba ka꞉nala. Keba tetelo la꞉le la꞉eno ka꞉ka꞉ konomo kuba ododili komamo dikamehoma, kuba ododili komote la꞉eno namutudawama꞉ ba eda꞉na, la꞉le hoea꞉mo dito konikulima꞉nemata. Huiyatiya la꞉le la꞉eno ka꞉ka꞉ konomo Godotamo papamila꞉ha komamo dikamehoma, ebete la꞉eno namutudawama꞉ eda꞉te la꞉ tuputupupima꞉ komidilima꞉na꞉ta.

¹⁷ Ba꞉bema꞉ wadiyala ale Godotamo kalakala tabo kadipatiya꞉! Ba꞉ hibila, dopamo la꞉le ba꞉ kuba ododili komoeno huiyaha꞉ okopima꞉ eda꞉hanamimata, huiyatiya la꞉ ba꞉be menemene emede ipuwane ikuliti Godokono tutupima꞉ eda꞉huya꞉mata. Iyo, keba tetelo komopa꞉te ebeno uli emede komoma꞉ la꞉ diya꞉tulamiya꞉la, la꞉le la꞉eno tepo ipuwoeno ukui konomamo ba꞉bi komamo papamila꞉halete tuputupu emede komoeno huiyaha꞉ oko ba꞉bo tupuimiya꞉mata.

³ La꞉ me tanalo iyatawanomolata, epetapiate a obamo dowaduba꞉midaoiya, iba꞉te ebe tanalo Ya꞉su Kelisoko magumulo osiyodiliya, ale ebeno a꞉e tanalo magumamo eba꞉go kapimiya ka꞉nopila꞉oma꞉.

⁴ Iyo, aimano obamo waduba꞉midaoe tanalodo ale eba꞉go kapimiya a꞉elaote, ebene aimano a꞉elao apa꞉te bobo magumamo atumu eba꞉go kapimiya gito nopila꞉iya. Ebe mabuma꞉ Nabiwi Godote ebeno kawo alonomono elawamo Kelisoko a꞉e magumune keba kunu kadipatiyale, ebete eba kunu a atumu owadipaeateiya ale ebeno oli igilago kilukulinama꞉.

⁵ Ebema꞉ nanitabola, ale Kelisokono a꞉e tanalo magumamo eba꞉go kapimiya da꞉nopila꞉iyama꞉, ebe mabuma꞉ ale atumu ebeno oli igilo tanalamo eba꞉go kapimiya ka꞉kemaimiomalema꞉.

⁶ Iyo, a iyatawala, Kelisote kewa olotolowalo da꞉iya, ebe tetelo Godote aimano tagala ilukuli tanalo eba꞉go kapimiya kewa olotolowamo a꞉tupuguilameleamiya, ebete ebe gabodo tagala ilukuli tanalono elawo eba anakapumilo ale kuba osiyodilole tanalono wiya꞉ wokopima꞉ walo a꞉keda꞉onama꞉.

⁷ Nanitabola, kebe tetelo lumagite ebeno tagala okoli tanaloma꞉ da꞉emene, ebe tetelo ebete kuba osiyodilole tanalono elawo magumune nanitabolo ka꞉pemaigamene.

⁸ Ebema꞉ ale me tanalo nanitabokobi na꞉midinama꞉, ale Kelisago nanitabolo da꞉elaiyama꞉, ebe mabuma꞉ ale eba꞉go ebeno igilago atumu bilukulinama꞉.

⁹ Iyo, a iyatawala, Godote Kelisoko a꞉e magumune dadipatiya, ebema꞉ a꞉e tanalono elawote ebetamo walo kitana꞉, ebete uwomua꞉ tetelo walo a꞉ka꞉enamene.

¹⁰ Nanitabola, ebete kuba osiyodilole tanalono wato kikopu laema꞉ kapiya tetenomolo a꞉iya, iyo, a꞉e tanalono elawote ebetamo walo a꞉ka꞉pemaiganamene, mabu me tetelo ebete Godokono tanaloma꞉ oli igilago bokolinamene.

¹¹ Ebema꞉ modobola la꞉ atumu la꞉imano kateneno ubi tanalo kosiyodilola꞉wenama꞉ a꞉elao epoma꞉ eba eda꞉onalo, la꞉le wiyasiya ebe tanalo malagidilolo Kelisoko magumulo Godoko mabuma꞉ nilukuliniyala꞉.

¹² Nanitabola, la꞉imano a꞉elao apene kateneno iyaiya ubi tanalate emaimionaka, wiyasiya ebe kuba ubi tanalate la꞉imano watodawama꞉ akoeda꞉la꞉, la꞉le ebe kuba osiyodilole tanalamo tudila꞉okapoma꞉.

¹³ Iyo, la꞉imano apeno tanalo bilibilinomo magumulo da꞉peso tanalonomamo kateneno kuba ubi tanalo ida꞉mo akotudila꞉oala꞉. La꞉ wiyasiya la꞉imano ape kawokawonomo Godotamo ikameonomo nikameonala꞉ ebeno tuputupu tanalo kapiya kosiyodilola꞉wenama꞉, mabu numa꞉la꞉, la꞉le wade tanalo idi kapiya kosiyodilaema꞉ la꞉ dopamo a꞉elaopimu eba ilukulinalo, Godote la꞉ ebeno igilamo ebo wadipalateliyata.

¹⁴ Ebema꞉ kuba osiyodilo tanalote la꞉imano watodawama꞉ walo a꞉keda꞉mene, mabu me tetelo la꞉le Godokono nilakapo magumudo ebeno elawamo ilukulinamata, iyo, kalakala kawonomola, la꞉ a꞉ka꞉tuwa꞉ la꞉imano elawamo ebeno Totomu Tabamo tudila꞉oa꞉noma꞉ dowagela꞉wenaima, ebe tanalote la꞉ magumulo iyalo olopoligiya.

¹⁵ Ebema꞉ diyala, la꞉ magumulo idite tabo ma kunu da꞉begemene, “Modobola ale aimano ubilo iyaiya kuba tanalo gito bosiyodilolenakoma꞉, mabu ale Godokono nilakapo magumulo bilukulinama꞉, ebeno Totomu Tabamo tudila꞉o tanalodoa꞉. Ebe mabuma꞉ ale ebeno pukala dowakalaima꞉, kuba wiya tanalote ebegodone atamo a꞉ka꞉pemene.” Eiye! Mako woki ebe daedale wokinomola!

¹⁶ La꞉ iyatawalata, kebe tetelo lumagi idite ebeno ape ega꞉walo igilo kawo lumagi iditamo ikameonomo dikameomene, ebe tetene wagilimite ebete ebe watodawa kapiyatamo tuduwatalo ebeno wiya꞉ woko bosiyodilonakomene. Ebema꞉ la꞉ eba kunula. Kebe tetelo la꞉le la꞉imano igilo kawonomo kuba osiyodilole tanalamo dikameaema, kuba osiyodilole tanalote la꞉imano watodawama꞉ eba eda꞉nalo, la꞉le a꞉eamo gito ka꞉nemaimiomamota. Wiyasiya la꞉le la꞉imano igilo kawonomo Godotamo tudila꞉o tanalamo dikameaema, ebete la꞉imano watodawama꞉ eda꞉te la꞉ tuputupupima꞉ ka꞉midilima꞉ta.

¹⁷ Ebema꞉ modobola ale Godotamo kalakala tabo kadipatiye! Nanitabola, dopamo la꞉le kuba osiyodilole tanalono wiya꞉ wokopima꞉ eda꞉onaimata, wiyasiya la꞉ ebe mibomibo ilukuli magumune pemaima꞉wete Godokono tutupima꞉ eda꞉iyamata. Iyo, kebe tetelo epetapiate ebeno oli okoli tanaloma꞉ la꞉ diyatulametiyala, la꞉le la꞉imano tepo magumuno woki kawonomamo ebe iyaiya tanalamo tudila꞉wete tuputupu okoli tanalono wiya꞉ woko ebo wagilimiyamata.