Loma 3:1-19 in Tabo

¹ Ba꞉bema꞉ naeno tabo ulidawa, diyala, ama꞉le na ba꞉ma ka꞉na da꞉ kiyanameomena꞉, “Kebe lumagiti a Yunapa꞉godolo hawakalate ba꞉bene bahibahi guduino tama itamida kukala da꞉lawiya꞉, ebete ba꞉be komodo bada hido komo ka꞉lawiya꞉? Da꞉ puliyala꞉, iyo, Godokono umi ipuwalo Yunapa꞉godolo eta hido komote da꞉ kitanaha꞉.”

² Nale huiyatiya na꞉goemo, “Ao, eba ka꞉naha꞉! Godote a Yunapi kowalubinama꞉ komo hiliyonomo hidohido komo atamo ikaa꞉miya꞉, ba꞉bi komo ipuwalo dopo komo ba꞉ ebeno Bukoeno tabo komokomo ikaa꞉me komola.”

³ Ba꞉bene ama꞉le na ba꞉ma ka꞉na gala da꞉kakiyanamemena꞉, “Numa꞉, a Yunapa꞉te Godotamo papamila꞉haheno hibi komo kododilinakuiha꞉, ba꞉bema꞉ ebete dopamo a emedena tetelo kowalubinama꞉ hibilo da꞉goiya꞉, ebete ba꞉be tabo gala a꞉kemalagidolamene, aba꞉ hibila꞉ka꞉?”

⁴ Nale huiyatiya na꞉kagoemo, “Ao, Godokono komo eba ka꞉naha꞉. Hopo habanapi hiliyonomate ha꞉da amihopima꞉ ba eda꞉hana, ebe kapiyate hibidawanomoma꞉ beda꞉namene, ba꞉bema꞉ ebete kebe tabo dopamo hibilo da꞉goiya꞉ galane ba꞉be tabo a꞉kadikamidala꞉mene. Iyo, Godokono hibi komo hawakalimima꞉ ebeno Bukalo tabote ba꞉ma ka꞉na itana, ‘Godo, ama꞉ kebe tabo komokomo dolamaginaka, galane tetelo tawakaluba꞉te ba꞉bi taboeno hibi komo kumima꞉na꞉, ba꞉bema꞉ puya꞉te ama꞉ ha꞉dadawama꞉ da꞉ga꞉lana, amia꞉no hidohido ododili komate ibino daedae ukui komo ba꞉bo kohawakalilamema꞉ne.’”

⁵ Ba꞉bema꞉ diyala, eta lumagiti hopo habanapino daedae ukuia꞉mo natamo ba꞉ma ka꞉na da꞉ huiyamene, “Godote aeno kuba ododili mabuma꞉ huiya ikaa꞉mema꞉ modoboha꞉, iyo, ebete ba꞉ba ka꞉na dewagelemene tuputupu komo a꞉kahawakalima꞉mene. Numa꞉, ebete aeno kuba ododili komodo hido tete belawenako ebeno malemale komo hawakaliminomo kohawakalimima꞉. Ba꞉bema꞉ mabu keka꞉ ebete kuba huiya atamo galane ikaa꞉mema꞉ da꞉goena? Ebete ba꞉ba ka꞉na dododimini, ba꞉be komo ba꞉ tuputupu komoha꞉, ebeno kuba ododi komola.”

⁶ Na huiyatiya ba꞉ma ka꞉na goemo, “A꞉iye! Ama꞉le da꞉gaa꞉, ba꞉be tabo hibi taboha꞉! Godoko ba꞉ tuputupu ododilidawala, ebegodolo eta kuba ododi komo puliyanomola. Ba꞉bema꞉ ebe kapiya modobonomola hopo habanapi hiliyonomoeno komo anagilamelelamete huiya iba꞉tamo ikalame.”

⁷ Ba꞉bema꞉ diyala, eta daedae lumagiti ba꞉ma ka꞉na da꞉ kagoemene, “Godote naeno ha꞉da amiho komodo hido tete belawenako ebeno hido ododi komo hawakaliminomo kohawakalimima꞉. Iyo, ba꞉ ba꞉ba ka꞉na ebe ha꞉kiya ebe bawagaminanako, ba꞉bema꞉ ebete tawakalubino komo danagilamelelamemene, ba꞉ba tetelo modoboha꞉ ebete na kuba ododidawama꞉ goe!

⁸ Ba꞉be mabuma꞉ kubaha꞉ a hopo habanapa꞉te aeno ubilo hiya꞉hiya꞉ kuba komokomo bododilinama꞉, mabu Godote aeno kuba ododili ipuwane ebeno hido malemale komo ba uluhukuti atamo kuba huiya a꞉kikaa꞉ma꞉mene.” Ba꞉bema꞉ na Polote na꞉kagoemo, “Ama꞉le kebako kubanomo daedae tabo da꞉gaa꞉, komo ha꞉da amiho tawakaluba꞉te ba꞉bako tabo ba ga꞉la eta kuba tabo ba꞉ma ka꞉na kaga꞉lanaka, nale naeno iya꞉tulame komago iba꞉go kapiyama꞉ eda꞉te atu tabo bekagoenamo. A꞉iye! Ba꞉bi ha꞉da amihopa꞉te ibino kuba tabo mabuma꞉ Godogodone huiya modobolo kuwatema꞉na꞉!”

⁹ Ba꞉bema꞉ la꞉ Yuha꞉pa꞉te naeno Yunapino komoma꞉ bada ukui na꞉kihateoma? Godokono umi ipuwalo Yunapino ododili komo hidohidodopola꞉ka꞉, ba꞉gala Yuha꞉pino ododili komo kubadopola꞉ka꞉? Ao, eba ka꞉naha꞉! Na ba꞉moe leta dopo hapulu hibi komo ba꞉ma ka꞉na hawakalimimo, Yunapi ba꞉gala Yuha꞉pi, ibi hiliyonomoeno namutudawa ba꞉ kapiyala, ebe ba꞉ ibi ipuwalo ditana ba꞉be kuba ododili komoeno helo komola.

¹⁰ Ba꞉be komo hawakalimima꞉ Godokono Bukalo eta tabote ba꞉ma ka꞉na itana, “Hopo haba konomolo kuba ododiha꞉dawa puliyanomola, iyo, eta tuputupudawa kapiyate kalutaha꞉.

¹¹ Ba꞉gala eta hido emalagidolodawa puliyala, iyo, Godokono hibi gabo ohowadidawa kemedenaha꞉.

¹² Ba꞉ hibila, hopo habanapi hiliyonomate Godogodone ohobila꞉hate, ba꞉ kubanomoma꞉ eda꞉huya꞉, ba꞉bema꞉ hidohido ododilidawa kalutaha꞉, iyo, eta kapiya puliyanomola.

¹³ Ba꞉bema꞉ tawakalubino tabo ga꞉la komo ba꞉ ha꞉lahapino bobo huiyala, pote ba꞉be bobo ipuwa da꞉hiya꞉midamene abale kapiya ba꞉bo kumima꞉ne. Iyo, ibino ma꞉lapilate ha꞉da tabo bega꞉lanaka, ba꞉bema꞉ helo kaluino pagu keba ka꞉nala꞉ka꞉, ibino tabo komokomo ba꞉ ba꞉ba ka꞉nala.

¹⁴ Ba꞉ hibila, iba꞉te maubahate ibino tabo ipuwane mela tabo kokonomate pikulinaka,

¹⁵ ba꞉gala iba꞉te ibino ubi komo konomamo miya꞉tenaka, gahugahulu tolamelo komopa꞉tamo temeteme ba nikalame komopi dito konanakapulamema꞉.

¹⁶ Iyo, iba꞉te kebe hiya꞉hiya꞉ hopamo da꞉tolamenaka, ba꞉bolo tawakalubi ba nekubahilame iba꞉tamo hiya꞉hiya꞉ menemene komo ba꞉bo nikalamenaka.

¹⁷ Ba꞉moe komo ba꞉ hibila, ibi hibi tataba emede komo iya꞉tawahaha꞉,

¹⁸ ba꞉gala iba꞉te ibino kuba ododili mabuma꞉ Godokono helo komoma꞉ katoletolehonaha꞉.”

¹⁹ Ba꞉bema꞉ a ba꞉moe ko komo iya꞉tawahala, kebe tawakaluba꞉te Godokono Tutumu Tabo dopamo dulihuya꞉, ba꞉ba tetene tupuimiti ba꞉bi Tutumu Tabo komate ibino namutudawama꞉ ba꞉ dito ediya꞉. Ba꞉moe ba꞉be mabuma꞉ Godote ibino komo danagilamelelamemene, ba꞉ba tetelo iba꞉te kuba huiya uwatelo ebe duhimima꞉ eta tabo ga꞉lama꞉ a꞉kamodobamena꞉. Iyo, Godote ba꞉ ba꞉ba ka꞉na ba꞉moe hopo konomolo demedehona ba꞉bi Yunapi ba꞉gala Yuha꞉pi ibi hiliyonomatamo ibino kuba huiya modobolo kikalamema꞉ne.

¹ Ebema꞉ naimano tabo olowidawa, diyala, a꞉ma꞉le na ma kunu da꞉banana꞉emene, “Kebe lumagite a Yu epagodolo awokalate ebene baibai guduno tama itamida pukala delawiya, ebete ebe tanalodo beda꞉ wade tanalo kelawiyale? Da꞉ puliyala꞉, iyo, Godokono umi magumulo Yu epagodolo wade tanalo idite da꞉ kitana꞉.”

² Nale wiyasiya negemo, “Ao, eba kunua꞉! Godote a Yu epo kowalubinama꞉ wadewade tanalo epetapi bilibilinomo atamo ikaeamiya, ebe tanalo magumulo dopo tanalo ebe ebeno Buka apuapuno tabo ikaeame tanalola.”

³ Ebene a꞉ma꞉le na ma kunu walo da꞉bakanana꞉emene, “Numa꞉, a Yu epate Godotamo tudila꞉oa꞉no nanitabo tanalo kosiyodilolenakia꞉, ebema꞉ ebete dopamo a uwomua꞉ tetelo kowalubinama꞉ nanitabolo degiya, ebete ebe tabo walo a꞉kemalagidilomene, a, nanitabola꞉ka꞉?”

⁴ Nale wiyasiya na꞉kegemo, “Ao, Godokono tanalo eba kunua꞉. Me opo epo bilibilinomate a꞉da꞉ elemasigipima꞉ eba eda꞉onalo, ebe kapiyate nanidawanomoma꞉ beda꞉namene, ebema꞉ ebete kebe tabo dopamo nanitabolo kegiyale walone ebe tabo akadikamidalemene. Iyo, Godokono nanitabo tanalo awokalima꞉ ebeno Bukalo tabote ma kunu itana, ‘Godo, a꞉ma꞉ kebe tabo apuapu ka꞉kiyawawenaka, walone tetelo epate ebe iyaiya tabono nanitabo tanalo kuima꞉na꞉, ebema꞉ piyate a꞉ma꞉ a꞉da꞉dawama꞉ degelana, a꞉imano wadewade osiyodilole tanalate ibino daedale wokino tanalo ebo kawokalilaemene.’”

⁵ Ebema꞉ diyala, lumagi idite me opo epono daedale wokiamo natamo ma kunu da꞉ba꞉wiyamene, “Godote aimano kuba osiyodilole mabuma꞉ wiya ikaeaema꞉ modoboa꞉, iyo, ebete eba kunu dowagelemene tuputupu tanalo akawokalimene. Numa꞉, ebete aimano kuba osiyodilole tanalodo wade tete ebe lawenako ebeno nilakapo tanalo awokaliminomo kawokalima꞉. Ebema꞉ mabu keleka꞉ ebete kuba wiya atamo walone ikaeaema꞉ degena? Ebete eba kunu dosiyodilomene, ebe tanalo ebe tuputupu tanaloa꞉, ebeno kuba osiyodilo tanalola.”

⁶ Na wiyasiya ma kunu gemo, “Eiye! A꞉ma꞉le degeawa꞉, ebe tabo nanitaboa꞉! Godoko ebe tuputupu osiyodiloledawala, ebegodolo kuba osiyodilo tanalo idi puliyanomola. Ebema꞉ ebe kapiya modobonomola me opo epo bilibilinomono tanalo anagilamelelamete wiya iba꞉tamo ikalaema꞉.”

⁷ Ebema꞉ diyala, daedale lumagi idite ma kunu da꞉ba꞉kegemene, “Godote naimano a꞉da꞉ elemasigi tanalodo wade tete ebe lawenako ebeno wade osiyodilo tanalo awokaliminomo kawokalima꞉. Iyo, eba kunu ebe a꞉ka꞉tuwa꞉ ebe walogonanako, ebema꞉ ebete epono tanalo danagilamelelaemene, ebe tetelo modoboa꞉ ebete na kuba osiyodilodawama꞉ gema꞉!

⁸ Ebe mabuma꞉ kuba꞉ a me opo epate aimano ubilo kubakuba tanalo bosiyodilolenama꞉, mabu Godote aimano kuba osiyodilole magumune ebeno wade nilakapo tanalo eba wagaililo atamo kuba wiya a꞉kikaeaemene.” Ebema꞉ na Polote na꞉kegemo, “A꞉ma꞉le kebako kuba daedale tabonomo degeawa꞉, a꞉da꞉ elemasigi epo epetapiate ebako tabo eba gelalo kuba tabo idi ma kunu kegelanaka, nale naimano iyatulame tanalago iba꞉go kapiyama꞉ eda꞉te atu tabo kegenamo. Eiye! Ebe a꞉da꞉ elemasigipiate ibino kuba tabono tanaloma꞉ Godogodone wiya modobolo kuwatema꞉na꞉!”

⁹ Ebema꞉ la꞉ Yua꞉piate naimano Yu epono tanaloma꞉ beda꞉ woki na꞉kiyata꞉ema? Godokono umi magumulo Yu epono osiyodilole tanalo wadewadenodopola꞉ka꞉, ega꞉walo Yua꞉pino osiyodilole tanalo kubakubadopola꞉ka꞉? Ao, eba kunua꞉! Na me leta dopo apulo nanitabo tanalo ma kunu awokalimo, Yu epo ega꞉walo Yua꞉pi, ibi bilibilinomono watodawa ebe kapiyala, ebe ibi magumulo ditana ebe kuba osiyodilole tanalono elawo tanalola.

¹⁰ Ebe tanalo awokalima꞉ Godokono Bukalo tabo idite ma kunu itana, “Me opo kawonomolo kuba osiyodiloa꞉dawa puliyanomola, iyo, tuputupudawa kapiya idi ka꞉luta꞉.

¹¹ Ega꞉walo wade kimalagidilagodawa idi puliyala, iyo, Godokono nanitabo gabo wadidawa kokolina꞉.

¹² Nanitabola, me opo epo bilibilinomate Godogodone olobila꞉ote, kubakubanomoma꞉ eda꞉iya, ebema꞉ wadewade tanalo osiyodiloledawa idi ka꞉luta꞉, iyo, idi kapiya puliyanomola.

¹³ Ebema꞉ epono tabo gela tanalo ebe a꞉elaopino bobo keba kunula꞉ka꞉ eba kunula, potele ebe bobo magumu da꞉iyamidamene abale kapiya ebo kuimene. Iyo, ibino menate a꞉da꞉ tabo gelanaka, ebema꞉ elawo kaluno pako keba kunula꞉ka꞉, ibino iyaiya tabono tanalo ebe eba kunula.

¹⁴ Nanitabola, iba꞉te dowaote ibino tabo magumune malato tabo kawokawonomate pemaimionaka,

¹⁵ ega꞉walo iba꞉te ibino ubi tanalo kawonomamo alomonaka, gawagawalo tolamelo epetapiatamo temeteme eba nikalamelo epetapi gito kananakapulaema꞉.

¹⁶ Iyo, iba꞉te kebe iyaiya opamo da꞉tolamenaka, ebolo epo eba na꞉kubailamelo iba꞉tamo iyaiya mibomibo tanalo ebo nikalamenaka.

¹⁷ Me tanalo nanitabola, ibi nanitabo milo okoli tanalo iyatawa꞉,

¹⁸ ega꞉walo iba꞉te ibino kuba osiyodilole mabuma꞉ Godokono elawo tanaloma꞉ ka꞉toletoleona꞉.”

¹⁹ Ebema꞉ a me kawo tanalo iyatawala, kebe epate Godokono Totomu Tabo dopamo dolowiya, ebe tetene wagilimite ebe iyaiya Totomu Tabote ibino watodawama꞉ gito ediya. Me mabuma꞉ Godote ibino tanalo danagilamelelaemene, ebe tetelo iba꞉te kuba wiya uwatelo ebe odiyoboma꞉ tabo idi gelama꞉ a꞉ka꞉modoboma꞉na꞉. Iyo, Godote eba kunu me opo kawonomolo dilukuliona ebe Yu epo ega꞉walo Yua꞉pi ibi bilibilinomatamo ibino kuba wiya modobolo kikalaemene.