1 Dopana, kaimia paluma, Goteme naima kondo kaenge dokonya nambame nyakama langyakondape pyoo langilyona, baa lao opale mende saka kundi maipenge etete epe dopale joo nyakamame nyakama tange itata Gote maiyepape. Dopa pingi mana doko baame auu kaenge. Dee mana doko nyakamanya Gote tama pipenge mana angi.
2 Nyakamame isa yuu angenya mana dupa watao payala naenya, Goteme nyakamanya masingi doko enenge injisekena lao kayatala aloo petae endakali joo kalyepape. Dopa petala Goteme pipimili lao masingi doko nyakamame kapa pao kandatami. Kini, nyakamame epe dupapi, baame auu kaenge dupapi, angi dupapi dupa kandatami.
3 Goteme aposele kalai namba diamo dokonya nambame nyakama pitaka kandao lelyona, nyakamame endakali yango dupa ita minao alyasale joo kalyamanona lao masetala epao luiyala nayalapape. Dopa napinya, Goteme nyakama mendai mendai lao masoo miningi doko ditamoli pyoo nyakama mona palipala namba dopa pyoo kalyona lao masalapape.
4 Naimanya yonge mendai dokonya kingipi mokopi dopale dupa longo katenge. Longo dupa pitakame kalai wakale wakale pingi.
5 Mendai dopaka pyoo naima endakali longo kalyamanoaka doko, Kataisapa pakatae yonge mendai joo katao mendenya jaa jaa pyoo kalyamano.
6 Goteme mona epe palyoo diamoli pyoo epe wakale wakale dupa nyepeama. Epe nyiamano doko Gotenya pii panao lamaipenge doko tamo kandao doko, naimame masoo miningili pyoo, ju panao lamaimana.
7 Epe nyiamano doko Gotenya kalai pyakamaipenge doko tamo kandao doko, pyakamaimana. Mana lamaipenge doko tamo kandao doko, mana lamaimana.
8 Dee endakali yango dupanya mona sakatasakamaipenge doko tamo kandao doko, mona sakatasakamaimana. Endakali mendeme opale apalepi mokosoo endakali mende maitamo dokome epao maina. Endakali mendeme kalai mende isoo pitamo dokome kalai doko kyoto joo isoo pina. Dee endakali mendeme endakali mende kondo kayapala nisetamo dokome mona yaepao nisina.
9 Nyakamame endakali mende auu kayatamino doko kiningi auu kayalapape. Mana koo dupa maita maitala epe dupa minokondape pyoo minao kalyepape.
10 Nyakama Kataisapa pakatae kaiminingi joo katao moname mende auu kaya kaya pyoo kalyepape. Dee nyakamame putiti kayao mende andanda saa saa pyoo kalyepapeaka.
11 Nyakamame maka-maka nakaenya kalai kyoto joo pyoo kalyepape. Nyakamanya masingi sakatatae katao Kamongonya kalai pyakamaiyoo kalyepape.
12 Masoo malisoo kalyamino doko lao masetala mona yaepao kalyepape. Nyakama-kisa kenda pipae ipatamo dupanya kyoto joaka kalyepape. Dee koteaka lao lomaka soo kalyepape.
13 Opale apalepi nyakama-kisa setamo dupanya mokosoo Gotenya endakali mende daa joo katatamo doko maiyepape. Opone minao kalyepapeaka.
14 Nyakama watao pyatamino endakali dupa Goteme auu pisina laapape. Kini, auu pisina laapape. Baame pina lao tee nalalapape.
15 Endakalin mona yaepao katatamino dupa-pipa mona yaepalapape. Ee lao katatamino dupa-pipa ee laapape.
16 Nyakamalapo mona mendai palyoo kalyepape. Nyakama etete andake joo katapumali lao masala naenya, endakali mee meele dupa-pipa tole pyao kalyepape. Nyakama masepaena lao masala nayalapape.
17 Endakali mendeme nyakama koo pingia kandeno doko, itingi koaka pimaiya naenya, endakali dupa pitakame kapana lao masingi mana epe dupa watao minao kalyepape.
18 Endakali dupa pitaka-pipa mona setao katamana lao masetala, nyakamame pipenge jetamo dupa pitaka pyepape.
19 Nambanya mona setenge paluma, koo pingyatamino dupanya nyakamame yanu nyala naenya, Goteme imbutongo mandipala yanu nyina kayalapape. Doko pii pepa pyapae singi dokonya, “Yanu nyingi doko nambana, nambame yanu nyotona,” Kamongo dokome dopa lelyamo.
