Loma 11:29-35 in Tabo

²⁹ Ba꞉ hibila, Godote dopamo kebe hidohido komo tawakaluba꞉tamo dikalamiya꞉, ebete ukui hiya꞉ma꞉ miditi gala a꞉kuwata꞉mene, ba꞉gala ebete dopamo pui malemalelo duwatiya꞉, ebete galane tetelo ibi ubiha꞉ma꞉ eda꞉te dito a꞉kamiya꞉pala꞉mene.

³⁰ Ba꞉bema꞉ numa꞉la꞉, dopamo tetelo Godote ebeno malemale Yunapa꞉tamo ba hawakalimina, ba꞉ba tetelo la꞉ Yuha꞉pa꞉te ebetamo kapapamila꞉hanamiha꞉, huiyatiya ba꞉ma tetelo la꞉ Yuha꞉pa꞉te ibino papamila꞉haha꞉ komodo malemale Godogodone na꞉lawenamata.

³¹ Ba꞉gala Godokono malemale la꞉tamo hawakalimi mabuma꞉ Yunapa꞉te tete nanekelelo ibino papamila꞉haha꞉ komo ipuwalo emeda꞉tepate, ba꞉bene galane tetelo ibi atumu ebegodone malemale gala kakalawema꞉na꞉.

³² Iyo, ba꞉ hibila, Godote hopo habanapi hiliyonomatamo tete ikalamiya꞉ iba꞉te kuba ododili komoeno matuhumiho ipuwalo kemeda꞉tepama꞉, mabu ebe ubila ibi hiliyonomate ba꞉be temetema꞉go ba꞉ba ka꞉na ba emedena ebete iba꞉tamo ebeno malemale ba꞉bo kohawakalimima꞉.

³³ Ba꞉bema꞉ Godokono malemale komo ba꞉gala ebeno mulu komo ba꞉gala ebeno iya꞉tawa komo bada kokonomola꞉ka꞉! Ebeno ododili komoeno ipuwa hibilo uwatema꞉ eta lumagiti a꞉kamodobamene, iyo, ebeno tuputupu gaboeno mabu eta dawate a꞉kiya꞉tawamene!

³⁴ Dopamo tupuimi mabuni eta lumagiti Kodawa Godokono tepo ipuwoeno ukui hibilo kalawenakuiha꞉, ba꞉gala eta dawate ebe uli komo iya꞉tumima꞉ kamodobonakuiha꞉!

³⁵ Ba꞉gala hibila, Godogodolo eta kapiya modoboha꞉ komo kitanaha꞉, ba꞉bema꞉ ebete hopo lumagigodone eta owalubi komo hibilo a꞉kalawa꞉le, ebete ba꞉be lumagitamo gala ebema꞉ kahuiyala!

²⁹ Nanitabola, Godote dopamo kebe wadewade tanalo epatamo kikalamiyale, ebete woki iyakobi midite walo a꞉kuwatemene, ega꞉walo ebete dopamo kebe epo nilakapolo kuwatiyale, ebete walone tetelo ibi ubia꞉noma꞉ eda꞉te gito a꞉ka꞉miyapamene.

³⁰ Ebema꞉ numa꞉la꞉, dopamo tetelo Godote ebeno nilakapo Yu epatamo eba awokaliminalo, ebe tetelo la꞉ Yua꞉piate ebetamo ka꞉tudila꞉wenamia꞉, wiyasiya me tetelo la꞉ Yua꞉piate ibino tudila꞉oa꞉ tanalodo nilakapo Godogodone nelawenamata.

³¹ Ega꞉walo Godokono nilakapo la꞉tamo awokalimi mabuma꞉ Yu epate tete da꞉pesolo ibino tudila꞉oa꞉ tanalo magumulo ilukula꞉tepate, ebene walone tetelo ibi atumu ebegodone nilakapo walo ka꞉kelaema꞉na꞉.

³² Iyo, nanitabola, Godote me opo epo bilibilinomatamo tete ikalamiya iba꞉te kuba osiyodilole tanalono matuomeo magumulo kilukula꞉tepama꞉, mabu ebe ubila ibi bilibilinomate ebe temetema꞉go eba kunu eba ilukulinalo ebete iba꞉tamo ebeno nilakapo ebo kawokalima꞉.

³³ Ebema꞉ Godokono nilakapo tanalo ega꞉walo ebeno mulo tanalo ega꞉walo ebeno iyatawa tanalo beda꞉ kawokawonomola꞉ka꞉! Ebeno osiyodilole tanalono magumu nanitabolo uwatema꞉ lumagi idite a꞉ka꞉modobomene, iyo, ebeno tuputupu gabono mabu idawate a꞉kiyatawamene!

³⁴ Dopamo wagilimi mabune lumagi idite Kawodawa Godokono tepo magumuno woki nanitabolo kelawenakia꞉, ega꞉walo idawate ebe oli tanalo iyatuima꞉ ka꞉modobonakia꞉!

³⁵ Ega꞉walo nanitabola, Godogodolo modoboa꞉ tanalo kapiya idi kitana꞉, ebema꞉ ebete opo lumagigodone walubi tanalo idi nanitabolo kelawenakoa꞉, ebete ebe lumagitamo walo ebema꞉ ka꞉wiyala!