23 Dɨ xomxo Islel obêc pɨlepac he dɨ vông i vin ge od he ob lax le vac xax tige i tii vac, ên Anutu tɨyi wê ob yev he lax le vac nipɨlêhê ge.
24 Xam tɨbii ba, ilage xam dô tɨyi xocbê xax oliv wê vɨmen ge ngen, lêc Anutu xoo xam vêl dɨ yev xam le vac xax xumac wê xam o le vac ilage lêm. Om Anutu tɨyi wê obêc kô Islel wê xoo vêl ge mɨ lax yev vac xax oliv wê he le vac ilage.
25 Xam lige, kɨyang wê yêp xôpacên ilage, a nêb a ob nêl kɨtong vô xam, êdêc xam o lêc yong xam dɨ nêl bê xam xovô kɨyang vɨhati lêm. Om kɨyang wê yêp xôpacên ilage bêga nêbê, xomxo Islel vô nɨnya kɨtu vô Anutu kɨyang, dɨ obêc mɨla vô buc wê tɨbii ba tɨbeac obêc pɨlepac he mɨ la vô Anutu ge od Islel vông môp wê vô nɨnya kɨtu vô Anutu kɨyang ge obêc tip la vô buc tige,
26 dɨ Anutu obêc vô he Islel vɨhati vêl. Tɨyi xocbê Anutu vya wê yêp vac xolac bêga nêbê, “Xomxo ti wê ob hôm xomxo lec ge obêc val vac vɨgwe Saion, dɨ obêc vô xomxo wê Jekop bue tɨvae ge vêl ên he nên nipaên.
27 Dɨ a ob kɨtya he nên nipaên vêl, tɨyi xocbê kɨyang wê a hɨlu vô he ge.”
28 Xomxo Islel o vông i vin Yesu xolac lêm, om tɨyi xocbê he vông vevac vô Anutu dɨ Anutu yê he nipaên, om Anutu vông vɨzid loc vô xam wê tɨbii ba ge. Lêc Anutu xêyaa vin lec Islel ên wê vɨnoo he ilage, om xovô kɨyang wê hɨlu vô he bue ilage, dɨ o sea he lêm.
29 Ên Anutu obêc vɨnoo xomxo dɨ vông vɨzid vô he ge od obêc hôm i kɨyang xôn dɨ ob sea lêm.
30 Xam wê xam o Islel lêm ge, ilage xam pwoo Anutu kɨyang vac, lêc gwêbaga Anutu xo vɨgwe pɨsiv ên xam, ên he Islel pwoo kɨyang vac, om Anutu vông xêyaa vin lecên wê i vông ge loc vô xam.
31 Gwêbaga he Islel pwoo Anutu kɨyang vac, lêc obêc tɨmuên ge od xêyaa vin lecên wê Anutu vông ge ob la vô he tɨyi xocbê val vô xam gwêbaga.
32 Ên Anutu yê wê xomxo vɨhati pwoo i kɨyang vac ge om vông he vɨhati dô tɨyi xocbê he dô vac kalabuhu ge. Anutu vông bêge, ên nêb obêc xo vɨgwe pɨsiv ên he vɨhati tɨmuên.
33 Pɨyôp yuu xovôên wê Anutu vông ge, levac mabu luu vêl. Xomxo ti o tɨyi wê ob xovô pɨyôp wê Anutu vông ge kehe lêm, dɨ ti o tɨyi wê ob xovô môp wê i vông ge kehe êno lêm.
34 Tɨyi xocbê kɨyang wê yêp vac xolac bêga nêbê, “Letya xovô kɨyang wê yêp vac Apumtau pɨyôp ge? Dɨ letya vông xovôên vô i?
