12 Rèngu aaꞌi-aaꞌi ra hèbꞌa nganga-nganga sène, ka ra pakarèi isi aanga ra, aku rèngu na, “Tasamia ka jꞌajꞌi sèmi neꞌe? Sasoa na, ngaa ka ne?”
13 Te ngaa abhu dhèu leo dhu mari si, peka na, “Weeh! Baku pusi dènge dhèu sèi! Te ra mahu nèi!”
14 Ètu era èèna, Petrus dènge dhèu pajuu-paleha Lamatua Yesus dhèu canguru èci leo sèra. Ka nèngu kako laꞌe asa madha, hèia na mulai padhai lii mi dhèu ae dhu lingu ètu èèna. Na padhai lii mèdhu bia, peka na, “Ina-ama, aꞌari aaꞌi-aaꞌi ti! Miu dhèu Yahudi, dènge miu dhu mai nèti mia-mia pea ètu kota Yerusalem! Pasa dhilu paie, ho mi nanene lii padhai lii jaꞌa ne, te jaꞌa neo peka jꞌara hua iia mi miu aaꞌi-aaꞌi mi.
15 Mage mi pangee, na, dhèu se mahu. Sèmi boe èèna! Madꞌae aae era, dhèu mahu boe. Ngaa hari, heka hake ceo kèna.
16 Deo na miu tadèngi, na, dhèu se padhai lii pake lii miu aaꞌi-aaꞌi mi. Dhu lèke, sèmi neꞌe ka: uru èèna, Ama Lamatua moa tèke le jꞌara neꞌe re dhèu nèti lii padhai lii Nèngu, ngara na Yoel, peka na:
17 ‘Ama Lamatua peka na, “Ladhe lodꞌo rai-haha oe èle, Jaꞌa neo hia Roh Jaꞌa mi dhèu aaꞌi-aaꞌi. Ana ngèru miu sèra, bhèni-mone, Jaꞌa dedꞌe si, jꞌajꞌi dhèu rèti lii padhai Jaꞌa. Ana ngèru miu sèra, bèli-camèdꞌa ladhe rèdhi ngaa dhu Jaꞌa neo padꞌelo mi rèngu. Sèmi èèna kahèi, dhèu heka miu sèra, bèli-camèdꞌa ra abhu nii, ngaa dhu Jaꞌa neo padꞌelo hia ra rèdhi.
18 Ladhe lodꞌo rai-haha oe èle, Jaꞌa hia Roh Jaꞌa mi ana pua-paleha Jaꞌa sèra. Hia dhèu mone, aa dhèu bhèni kahèi. Sèna ka ra peka-padhai ngaa dhu Jaꞌa peka le dènge rèngu.
19 Bèli-camèdꞌa, dꞌai Lodꞌo Lamatua. Masi ka Lodꞌo èèna dhae dꞌai mèka, te ngaa Jaꞌa tao uru tadha-tadha malaa ètu dedha-liru. Tadha malaa sèmi madha lodꞌo jꞌajꞌi maroga kiu-kiu, dènge hèru mea sèmi raa sa kahèi. Jaꞌa neo tao jꞌara-jꞌara kapai seli eele kahèi, ètu dedha-rai. Jꞌara sèra sa, sama sèmi raa, ai, dènge sèbꞌu poka-poka caꞌe laꞌe asa dedha. Ladhe dꞌai Lodꞌo Lamatua dhu kapai seli èèna, dhèu cee dhu manèngi Ama Lamatua soru-bara ne, nèngu èèna ka dhu abhu mamuri.’ ” Sèmi èèna ka, dhu uru èèna, Yoel suri le.
22 Aꞌari dhèu Israꞌel aaꞌi-aaꞌi ti! Mai pasa dhilu miu, ho nanene paie ngaa dhu jaꞌa neo padhai lii dènge miu. Ama Lamatua pajꞌujꞌu nare le Yesus, dhèu Nasaret. Jiꞌi ngeꞌa le jꞌara èèna jꞌajꞌi tareꞌa, lula jiꞌi ka dhu ladhe ngèdhi unu mi, na, Ama Lamatua pake Yesus ho tao tadha malaa dènge tatao kapai seli eele. Miu meꞌa le jꞌara neꞌe kahèi, lula Yesus tao le tadha malaa sèra ètu talora miu.
23 Te ngaa miu pamadhe Ne, dènge jꞌara miu dadugu-rariu dhèu bhelu-katubꞌa, ho paku Ne ètu ajꞌu palolo-palèbha. Aa te ngaa, sèra sa pamèci dènge naneo Ama Lamatua nèti uru ka mai.
24 Lula tatao miu, ka Nèngu madhe tareꞌa. Te ngaa Ama Lamatua dꞌèi boe ho Yesus madhe taruu. Nèti èèna ka, Lamatua patalale eele Nèngu nèti koasa mamadhe, ka pamamuri hari Ne. Te koasa mamadhe bisa boe segi Ne.
25 Nèti uru ka mai, dhèu aae Daud suri tèke le lula-nèti Yesus ne, peka na: ‘Jaꞌa keꞌa, na, Lamatua sama-sama taruu dènge jaꞌa. Nèti èèna ka, ngaa èci sa bisa boe pamanahu jaꞌa, lula Ama Lamatua ètu baboa jaꞌa taruu.
26 Nèti èèna ka, dꞌara jaꞌa karejꞌe, ka jaꞌa koa-kio Ne taruu, aa jaꞌa mate Lamatua dènge dꞌara mera-milu.
27 Te Nèngu soro tèke boe samanga jaꞌa pea taruu ètu era dhèu madhe sèra. Aa Ama Lamatua tèke eele boe ngiꞌu aae Dhèu Nèngu dhu Dꞌara Mola-Mèci, ele iie ètu dꞌara rai.
28 Lamatua padꞌelo le jaꞌa jꞌara mamuri dhu mola. Nèti èèna ka dꞌara jaꞌa karejꞌe dꞌai seli, lula Lamatua bera-bera dènge jaꞌa.’ Neꞌe ne ka dhu dhèu aae Daud suri tèke nèti uru ka mai.
29 Aꞌari aaꞌi-aaꞌi! Miu mata ku ho jaꞌa lole paie ku dènge miu lula-nèti dhèu aae Daud. Na peka sèmi èèna, te ngaa na lole boe ngiꞌu nèngu. Èdhi teꞌa, lula nèngu madhe le, aa ra padhane ne. Roꞌa na abhu ètu talora èdhi toke dꞌai sange neꞌe.
30 Dhèu aae Daud ne jꞌajꞌi dhèu nèti lii padhai Ama Lamatua. Aa na neꞌa, na, Ama Lamatua dhu moa le pake lii subha, ho limuri mai èci nèti ana-èpu Daud nèdꞌu paredha. Nèngu èèna ka dhu Lamatua pajꞌujꞌu mema nèti uru ka mai.
31 Lodꞌo èèna, Daud pangee madhera. Aa na peka uuru lula-nèti Dhèu dhu Lamatua pajꞌujꞌu tèke le. Èena na Dhèu èèna madhe, te ngaa mamuri hari kahèi. Aa Daud peka kahèi, na, Dhèu èèna pea taruu boe ètu era dhèu madhe, aa ngiꞌu Na ele iie boe kahèi.
32 Dhèu dhu Daud peka-padhai ne, nuka Yesus! Ama Lamatua pamamuri hari Ne nèti mamadhe Na. Ka jiꞌi aaꞌi-aaꞌi mi ngèdhi le dènge musi madha jiꞌi!
33 Ka limuri ne, Ama Lamatua dedꞌe le Yesus, ho nèdꞌu paredha dhu dedha risi eele. Aa Na madhèdi ètu baboa gꞌana Ama Lamatua, ètu era dhu Lamatua sadia tèke le. Aa Ama Na hia le Roh Na dhu Mola-Mèci, sama sèmi dhu Na moa tèke nèti uru ka. Aa Na moa neo hia Roh Mola-Mèci Na mi èdhi kahèi. Èèna ka dhu miu tadèngi dènge laladhe mèdhi deo na, nuka Ama Lamatua hia Roh Na.
34 Daud mesa na caꞌe boe laꞌe asa sorga, te ngaa na suri, peka na, ‘Ama Lamatua padhai lii dènge Lamatua jaꞌa, peka na, “Madhèdi mi sebhe gꞌana Jaꞌa, ètu era dhu Jaꞌa sadia mema,
35 toke Jaꞌa tao musu Èu sèra, pahaha iisi mi Èu.’ ”
36 Nèti èèna ka dhèu Israꞌel aaꞌi-aaꞌi ra hudꞌi reꞌa ku tareꞌa-reꞌa, lula-nèti Yesus dhu miu paku pamadhe ètu ajꞌu palolo-palèbha. Nèngu, nuka Kristus dhu Ama Lamatua hagꞌe nare le. Aa Nèngu neꞌe ka dhu jꞌajꞌi Kètu èdhi.”
37 Ropa tadèngi rare lii Petrus ne, dꞌara dhèu sèra roe. Ka ra karèi Petrus dènge dhèu pajuu-paleha leo sèra, peka na, “Aꞌari! Jiꞌi hudꞌi tao tasamia ku?”
