5 Iei mine oupwe fokun apwönüetä ai kewe allük me pwüüng, pun are eman aramas epwe aleasochisiir, epwe manau. Ngang ewe Samol mi Lapalap.
6 Iwe, esap wor eman me leimi epwe oror ngeni püsin aramasan ren an epwe lisowu ngeni. Ngang ewe Samol mi Lapalap.
7 Kosap turunufasei semom ren om lisowu ngeni inom. Pokiten neminewe inelapom, kosap fokun lisowu ngeni.
8 Kosap lisowu ngeni pwülüen semom, pun ka turunufasei semom ren.
9 Kosap lisowu ngeni fefinom, ese lifilifil ika neminewe nöün semom ika nöün inom mi uputiu lon leniom ika ekis.
10 Kosap lisowu ngeni nöün noum mwän föpwül ika nöün noum fefin föpwül, pun ka püsin turunufaseek ren.
11 Kosap pwal lisowu ngeni nöün pwülüen semom föpwül, pun nöün semom, nge pwal i fefinom.
12 Kosap lisowu ngeni fefinen semom, pun i fituken semom.
13 Kosap lisowu ngeni pwin inom, pun i fituken inom,
14 kosap pwal turunufasei pwin semom ren om oror ngeni pwülüan pwe kopwe lisowu ngeni, pokiten neminewe pwal i inom.
15 Kosap fokun lisowu ngeni pwülüen noum mwän.
16 Kosap lisowu ngeni pwülüen pwiüm, pun ka turunufasei pwiüm ren.
17 Iwe, kosap pwülüenifengeni eman fefin me nöün föpwül, kosap pwal lisowu ngeni nöün nöün neminewe mwän föpwül ika nöün nöün fefin föpwül, pun ir fitukfengen. Ei sokun föför a fokun ngau.
18 Kosap pwal angei pwin pwülüom pwe kopwe eäni aruu, lupwen pwülüom a chüen manau.
19 Iwe, kosap oror ngeni eman fefin pwe kopwe lisowu ngeni, lupwen neminewe a limengau ren an samaun fefin.
20 Kosap pwal lisowu ngeni pwülüen chon arum, pun ei sokun föför kopwe püsin limengau ren.
21 Iwe, kosap eäni asor eman noum ngeni ewe kot itan Molok. Ren ei ka turunufasei itei, pun ngang ewe Samol mi Lapalap om we Kot.
22 Kosap lisowu ngeni eman mwän usun om lisowu ngeni eman fefin, pun ei sokun föför a anioput.
