5 Mose ese hebou taudia e hamaorodia, eto, Iehova ese ini vada e hahedua toma.
6 Bena Mose ese Aaron mai natuna ida e abidia, ranu ai e hadigudia.
7 Bena ia ese hahedoki badana bona gaba ḡauna e hakaralai, bona muri hahedokina bona hahedoki helaḡana e hadokilai, bona gaba ḡauna, e hatua ḡauna, gabana ai e ḡeḡea.
8 Bena hahemaoro vainana e ha-inulaia; vaina lalonai Urim bona Tumim e uda.
9 Kwara iḡeḡelaina dabuana danu kwarana ai e ḡeḡea, bona bagunai gold koronana helaḡana e atoa, Iehova ese Mose e haduaia heḡereḡerena.
