2 Israel taudia ba hamaorodia, baoto: Taunimanima ta baine helaḡa, gwau-hamata ta dainai, oiese ibodohilaina ḡauna ba gwauraia, Iehova ena.
3 Bema tau, laḡani ruahui ela bona laḡani tauratoi-ahui, ibodohilaina na silver sekeledia imahui, gabuhelaḡana ena sekele heḡereḡeredia.
4 Bema hahine, ibodohilaina na sekele toi-ahui.
5 Taunimanima laḡanidia ima ela bona ruahui ibodohilaidia bini: bema maruane, sekele ruahui; bema hahine, sekele gwauta.
6 Hua ta amo ela bona laḡani ima ibodohilaidia bini: bema maruane, silver sekeledia ima; bema hahine, sekele toi.
7 Laḡani tauratoi-ahui vada e hanai taudia ibodohilaidia bini: bema tau, sekele gwauta-ima; bema hahine, sekele gwauta.
8 Aogoḡami dainai gwau-hamata tauna na ibodohilaidia bini basine heni diba, ia na hahelaḡa tauna vairanai baine hedinarai, bena hahelaḡa tauna ese ibodohilaina davana baine gwauraia, gwau-hamata tauna baine heni diba heḡereḡerena.
9 Ḡau helaḡana bema mauri ḡauna ta, taunimanima vaia Iehova ena ihaboulaina ai e halaomu ḡaudia ta, una ḡau danu baine helaḡa, tau ta ese Iehova vada e henia dainai.
10 Basine boloa: namona na dikana basine bololaia, bona dikana na namona basine bololaia. Bema boloa, mauri ḡaudia ruaosi na bae helaḡa.
11 A bema mauri ḡauna mirona ta, Iehova ena ihaboulaina ai asie halaoamu ḡauna, gwau-hamata tauna ese una ḡau baine laohaiaha helaḡa tauna vairanai.
12 Bena hahelaḡa tauna ese ibodohilaina davana baine gwauraia, ena namo eiava ena dika heḡereḡerena; oi hahelaḡa taumu ba gwauraia heḡereḡerena, dava korikorina bunai.
13 Hari tau baine ura baine bodohilaia, ia ese dava bunai baine heni, mai atokauna ida. Atokauna na dava idoinai baine karoaia, karoa ima, bena karoa ta heḡereḡerena ma baine atoa kau.
14 Tau ta ese ena ruma bema gwauraia hamata, baine helaḡa Iehova ena, hahelaḡa tauna ese ibodohilaina davana baine gwauraia, ena namo eiava ena dika heḡereḡerena; hahelaḡa tauna ese davana baine gwauraia heḡereḡerena, dava korikorina bunai.
15 Ruma biaguna baine ura ena ruma baine bodohilaia, ia ese dava bunai baine heni mai atokauna ida. Atokauna na dava idoinai baine karoaia, karoa ima, bena karoa ta heḡereḡerena ma baine atoa kau. Bena ruma na iena.
16 Tau ta ese ena tano kahana, senena edia amo e abia tanona, bema hahelaḡaia Iehova ena, oi ese ibodohilaina davana ba haeroa, uhe una tano lalonai vada e hadomu heḡereḡerena. Bali homerena ta na silver sekeledia imahui ida ba haheḡereḡerea.
17 Iubile laḡanina ai ena tano bema hahelaḡaia, ibodohilaina na dava idoinai, oi ese ba gwauraia heḡereḡerena, baine heni.
18 A Iubile laḡanina murinai bema hahelaḡaia, hahelaḡa tauna ese baine haeroa, laḡani hida do mimia ela bona Iubile ta baine kau, bena unu laḡani hidaosi ihaheḡereḡeredia ai davana baine hamaraḡia.
19 Tano biaguna baine ura ena tano baine bodohilaia, ia ese dava baine heni mai atokauna ida. Atokauna na dava idoinai baine karoaia, karoa ima, bena karoa ta heḡereḡerena ma baine atoa kau. Bena tano na iena.
20 A ibodohilaina basine ura, eiava tau ta ese baine hoia, ia na basine abia lou diba.
21 A Iubile baine kau ai, una tano na baine helaḡa Iehova ena, badina be ia na gwau-hamata ḡauna: hahelaḡa tauna ese baine abia, iena.
22 Tau ta ese ena tano ta, dia senena edia amo e abia to moni amo e hoia ḡauna, bema hahelaḡaia Iehova ena,
23 hahelaḡa tauna ese ibodohilaina davana laḡani hidaosi lalodiai ela bona Iubile laḡanina baine gwauraia; bena una dina ai hari tau ese dava baine heni, Iehova ena helaḡa ḡauna.
