5 “Paraoa namo herea, iena metau 12 kilogaram do oi abia, beredi ibounai 12 do oi gabua.
6 Inai beredi be Lohiabada ena vairanai do oi atodia, laini rua dekenai, golo namo herea patana ena latanai, laini ta be beredi 6, ma laini ta be beredi 6.
7 Inai laini ruaosi edia badinai muramura mai bonana pauda namona momokani do oi atoa. Inai bonana namona muramura be Lohiabada dekenai henia aniani boubouna ena toana, beredi ena gabu ia abia, bona Lohiabada dekenai inai pauda do oi gabua ore.
8 “Inai beredi be Sabati Dina ibounai Lohiabada ena vairanai do idia atoa ela bona hanaihanai. Inai be Israela taudia edia harihari gauna, edia gwauhamata ela bona hanaihanai.
9 Bona inai beredi be Arona bona iena natuna taudia edia, inai beredi be gabu helagana ta dekenai do idia ania. Lohiabada ena lahi dekenai gabua bouboudia ibounai edia huanai, inai boubou sibona be helaga herea. Noho hanaihanai taravatuna be inai.”
10 Tau ta, iena sinana be Israela hahine ladana Selomiti Dibiri, Dano iduhu hahine, bona iena tamana be Aigupito tauna, be kamepa lalonai Israela korikori tauna ta danu idia heai.
11 Idia heatu noho neganai, unai Israela hahine, Selomiti, ena natuna ese Dirava ena ladana ia hereva dika henia. Unai dainai tau haida ese Mose dekenai idia hakaua lao.
12 Vadaeni unai tau idia kwatua, bona gabu ta dekenai idia koua, ela bona Lohiabada ese iena ura idia dekenai do ia hedinaraia.
13 Vadaeni Lohiabada ese Mose ia hamaoroa, ia gwau,
14 “Unai lau ia hereva dika henia tauna, be kamepa ena murimurinai do umui abia lao. Iena hereva dika idia kamonai taudia ibounai ese unai tau ena kwarana latanai edia imadia do idia atoa. Unai murimuri kamepa taudia ibounai ese nadi dekena amo do idia hodoa mase.
15 “Israela taudia dekenai do oi hadibaia danu, Dirava do ia hereva dika henia tauna ese iena kerere davana do ia davaria.
16 Lohiabada ena ladana do ia hereva dika henia tauna be do ia mase. Israela tauna ta o Israela dekenai ia noho idau bese tauna ta bema Lohiabada ena ladana ia hereva dika henia neganai, Israela taudia ese nadi dekenai do idia hodoa mase.
