15 Oiemu ravana hahine danu do umui sihari lasi, badina ia be oiemu natuna ta ena adavana.
16 Oiemu tadikaka ena adavana do oi sihari henia lasi.
17 “Sedira hahine ta dekenai oi headava, bona hahine be mai ena natuna kekeni o tubuna kekeni, tau ta ena. Vadaeni oi ese unai natuna kekeni o tubuna kekeni do oi adavaia lasi. Unai be hemarai karana.
18 Oiemu adavana ena tadikaka hahine danu umui sihari lasi, bema oiemu adavana ia mauri noho neganai.
19 “Hahine ta, hua gorere ia davaria neganai, do oi sihari henia lasi, badina ia be mai miro danu.
20 Oiemu badibadina dekenai tauna ena adavana danu do umui sihari lasi. Unai be miro karana ta.
21 Oiemu natuna ta dirava ta ena ladana Moleka dekenai do oi henia lasi, idia gabua boubou gauna totona. Unai bamona kara ese lau Dirava, Lohiabada, egu ladana ia hadikaia.
22 “Umui emui tau ta ese ma tau ta do ia sihari henia lasi, tau bona hahine idia karaia bamona. Inai bamona kara be dika momokani, bona inai kara dekenai, lau Dirava lau badu momokani.
23 Ubua gauna ta dekenai do umui sihari henia lasi. Hahine danu be unai bamona do ia karaia lasi. Unai kara be dika momokani.
24 “Inai miro karadia ibounai be do umui karaia lasi, badina be umui emui vairana dekenai do lau lulua besedia be unai kara ibounai idia karaia dainai idia miro.
25 Idia edia kara ese edia tano idia hamiroa. Unai dainai dika davana be unai tano dekenai lau henia noho. Vadaeni unai tano ese, ia dekenai noho taudia ia luludia, bona idia rakatania noho.
26 To umui ese lauegu taravatu bona lauegu oda do umui badinaia, bona unai kara mirodia do umui karaia lasi, umui Israela taudia, bona umui emui huanai idia noho idau taudia danu.
27 Badina be inai tano dekenai idia noho guna taudia ese unai miro karadia idia karaia, ia mai bona tano ia miro vadaeni.
28 Bema umui ese unai tano unai bamona do umui hamiroa neganai, unai tano ese umui danu do ia lulua, guna idia noho taudia ia lulua bamona.
