42 “Vadaeni nadi matamatadia do idia abia, idia kokia gaudia edia gabu dekenai do idia atoa. Unai murinai ruma ena lalona kahana ibounai be peni aukana dekena amo do idia penia bona koua.
43 “Bema unai nadi idia kokia, bona ruma ena lalona do idia kakasia, bona peni aukana dekena amo idia penia bona koua namonamo murinai unai gorere ena toana ma ia hedinarai lou,
44 hahelagaia tauna ese do ia itaia lou. Bema unai gorere toana be ia bada lao, ruma ena lalona dekenai, unai be lepera korikori, ia ese ruma ia hadikaia noho, bona unai ruma be ia miro.
45 “Inai ruma be do idia veria diho, bona iena nadi, iena au, bona iena haba koua peni, be hanua ena murimurinai do idia huaia lao, momoru gabuna dekenai do idia negea.
46 Daika ese ruma lalonai ia raka vareai, hahelagaia tauna ia loka murinai, ia be do ia miro ela bona dina do ia diho.
47 Unai ruma dekenai ia hekure, o ia aniani tauna ese iena dabua do ia huria.
48 “To sedira hahelagaia tauna do ia raka vareai neganai ia itaia, peni auka matamata dekena amo haba idia penia bona koua murinai gorere toana ia hedinarai lou lasi. Unai neganai hahelagaia tauna ese ruma do ia gwauraia goeva, badina gorere be ia ore vadaeni.
49 Bona unai ruma do ia hagoevaia totona, ia ese manu rua bona sida au maragina ta, varo kakakakana, bona husopo rigina ta do ia abia.
50 Vadaeni hahelagaia tauna ese manu ta uro ta ena ataiai do ia alaia mase. Uro lalonai be ranu goeva ia noho.
51 Ia ese do mauri manuna do ia abia, sida auna bona varo kakakaka bona husopo rigina danu do ia abia. Inai gau ibounai be ranu goeva ena ataiai ia hamasea vadaeni manu ena rara lalonai do ia atodia diho. Bona unai rara be ruma dekenai do ia negea, nega 7.
52 “Inai dala dekenai ia ese ruma do ia hagoevaia, manu ena rarana dekena amo, bona ranu goeva dekena amo, bona ia mauri manuna dekena amo, bona sida auna dekena amo, bona husopo rigina dekena amo, bona varo kakakakana dekena amo.
53 “Vadaeni ia mauri manuna be do ia ruhaia, hanua ena murimurinai do ia roho lao, uda dekenai. Unai dala dekenai ia ese unai ruma dekena amo kara dika do ia kokia, vadaeni ruma be ia goeva vadaeni.
54 “Lepera bona taunimanima edia kopina dekenai idia vara gorere idauidau edia taravatu be inai.
55 Bona dabua bona ruma dekenai idia noho lepera ena miro ese ia hadikadia taravatu danu.
56 Bona kopina ia gudu, bona toto, bona kopina toutou, ena kala be idau, ena taravatu danu.
57 Inai taravatu dekena amo do umui diba, miro gauna be edena bamona, bona goeva gauna be edena bamona. Lepera gorere ena taravatu be unai.”
