6 Miduma zin diyà te teliwazà si Aaron wey is menge anak din, ne impepemeziǥù din sikandan.
7 Ne impesul-ub din ki Aaron is bisti te lavew he memumuhat: is pendizalem he visti, is bakes, is pendivavew he visti, wey is ipud he mibpikitan te vakes he mibpurpurungan is kedhevela zuen.
8 Ne impeseluub daan ni Moises diyà te ki Aaron is teleǥuey ziyà te kumeng, ne intaǥù din dutun is Urim wey Thumim.
9 Ne impesuup din diyà te ulu ni Aaron is tengkulu, ne impikit din diyà te sineruwan dutun te tengkulu is bulawan he simbulu he mibpilì si Aaron he para te Nengazen. Mibeelan ni Moises heini is langun sumalà te insuǥù kandin te Nengazen.
10 Ne migkuwa ni Moises is lana, ne mibpirikan din sikan is Tulda he Ed-ezapan wey is langun he netaǥù kayi. Su idhalad haazà he menge vutang diyà te Nengazen.
11 Kepipitu zin piriki te lana sikan is pemuhatà wey is langun he ǥelemiten dutun te pemuhatà, ne iring din ded daan is bisin wey is selevukà kayi. Mibeelan din heini su inhalad din heini he menge azen diyà te Nengazen.
12 Ne mibpetiǥisan din te lana is ulu ni Aaron he paaǥi te kebpehinunguza kandin diyà te Nengazen.
13 Ne miduma zin diyà te teliwazà is menge anak ni Aaron he menge maama, ne mibistiyan din sikandan te visti he para te memumuhat wey mibekesan heini. Midsul-uvan daan sikandan te menge kalù. Mibeelan heini ni Moises sumalà te insuǥù kandin te Nengazen.
14 Ne kegkepasad dutun, impekuwa ni Moises is tudu he vaka he pemuhat he para idlumpiyu. Ne indampà ni Aaron wey te menge anak din is menge velad dan diyà te ulu zuen te vaka.
15 Midlapà ni Moises haazà is baka ne migkuwa sikandin te lengesa kayi. Intiyuk din is tezù din duen te lengesa, ne mibpelisan din sikan is menge sungeysungey te menge suyuk te pemuhatà he iyan kedlumpiyuwi kayi. Ne in-itis dutun is nesamà he lengesa diyà te zizalem duen te pemuhatà. Iyan heini paaǥi te kebpehinunguza zin duen te pemuhatà diyà te Nengazen, su para mehimu heini he ereg he ebpekelibri te mekesesalà.
16 Migkuwa zaan ni Moises is langun he tavà diyà te seled te ǥetek duen te uyaǥen, is deisey he vahin te atey, is menge vuwà ragkes is menge tavà kayi, ne midtutung din heini is langun diyà te pemuhatà.
17 Is nengesamà he vahin duen te vaka iring te sapù, lundis, wey menge vituka, midtutung din diyà te ǥawas te kampu. Mibeelan heini ni Moises sumalà is insuǥù kandin te Nengazen.
18 Kegkepasad dutun, impekuwa ni Moises sikan is meemahan he kerehidu he pemuhat he edtutungen. Ne indampà ni Aaron wey te menge anak din is menge velad dan diyà te ulu zuen te kerehidu.
19 Midlapà ni Moises haazà is kerehidu, ne impirik din is lengesa kayi ziyà te peliǥuy te pemuhatà.
20 Midsapù din haazà is uyaǥen, ne midtutung din is ulu, is tavà, wey is duma he menge parti kayi. Midlùluan din is menge vahin he ziyà te seled te ǥetek wey is menge paa. Ne midtutung din diyà te pemuhatà is langun he parti zutun te uyaǥen he pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen. Mibeelan heini ni Moises sumalà te insuǥù kandin te Nengazen.
