2 he keǥiya zin heini ziyà te menge Israilihanen, is mehitenged te ispisyal he menge timpu he zutun medtiǥum dan te ked-azap te Nengazen:
3 Duen heenem he andew te kedterebahu niw, piru himeley kew ziyà te ikepitu he andew su iyan heeyan Andew te Kedhimeley. Kenè kew terebahu keniyan he andew, kekena, tiǥum kew para te ked-azap, su andew heeyan he ebeǥayan niw te zengeg is Nengazen.
4 Is Pista te Kedlavey te Belinsuǥuen wey is Pista te Supas he Wazè din Tapey, menge ispisyal heini he menge timpu he edtiǥum is menge Israilihanen te ked-azap te Nengazen.
5 Is Pista te Kedlavey te Belinsuǥuen, mezukilem is kedhimuwa zuen diyà te ike-14 he andew te egkehuna he vulan te tuig.
6 Ne ike-15 he andew zutun he vulan, ebpuun daan is Pista te Supas he Wazè din Tapey. Pitu he andew heini he pista, ne zutun he menge andew kinahanglan he iyan egkeenen niw is supas he wazè din tapey.
7 Dutun te egkehuna he andew kayi te pista, ne kenè kew medterebahu, kekenà, tiǥum kew te ked-azap te Nengazen.
8 Seled te pitu he andew pemuhatà niw is Nengazen te pemuhat pinaaǥi te hapuy. Ne zutun te ikepitu he andew ne kenè kew en maan terebahu, kekenà, tiǥum kew te ked-azap te Nengazen.
