12 Migkaǥi si Moises diyà te ki Aaron wey ziyà te zezuwa he anak ni Aaron he nesamà he iyan si Eleazar wey si Itamar, “Kuwaa niw is pemuhat he para gasa he nesamà duen te menge pemuhat pinaaǥi te hapuy he ibpemuhat para te Nengazen. Lutua niw heini ne kenà edtepayan ne keena niw ziyà te avey te pemuhatà su utew heini segradu he pemuhat.
13 Diyè niw zà heini keena te segradu he lugar su iyan heini keniyu he vahin puun te menge pemuhat pinaaǥi te hapuy. Iyan heini insuǥù te Nengazen kediey.”
14 “Is imbayew he kumeng wey vuvun te uyaǥen he impemuhat diyà te Nengazen he egkehimu he ǥaked te menge memumuhat, ne keena nu zuma te tivuuk he pemilya nu. Keena niw heini ziyà te minsan hendei he lugar he ed-isipen tew he lumpiyu. Imbeǥey heini keniyu he vahin niw puun te menge pemuhat te menge Israilihanen he para te meupiya he kebpekidepità.
15 Emun ebpemuhat is menge Israilihanen, ne ipemuhat dan is kumeng wey is buvun te uyaǥen ragkes is menge tavà he ibpemuhat dan he pemuhat pinaaǥi te hapuy. Ne is kumeng wey is buvun ne ivayew zan diyà te etuvangan te Nengazen he pemuhat he ibayew. Iyan heini vahin nu wey te menge anak nu taman te taman, sumalà te insuǥù te Nengazen.”
16 Hein midsusi si Moises mehitenged te kambing he pemuhat he para idlumpiyu, neehè din he pudu en haazà netutung. Umbe utew zin nepeuki si Eleazar wey si Itamar, ne midsumayan din sikandan.
17 Ke sikandin te, “Maan is wazè niw keena ziyà te segradu he lugar sikan is pemuhat he para idlumpiyu? Heini he pemuhat utew segradu, ne imbeǥey heini te Nengazen keniyu su wey mevelukasi is menge etew puun te menge salè dan diyà te etuvangan te Nengazen.
18 Su is lengesa kayi wazà meuwit diyà te Segradu he Lugar, migkaan niw pezem heini ziyà te Tulda, sumalà te insuǥù ku keniyu.”
19 Midtavak ni Aaron si Moises te, “Wazè pa meuǥet nemuhat is menge anak ku te pemuhat he para idlumpiyu kandan wey pemuhat he edtutungen, piru minatey sikandan is dezuwa. Ne tenged keniyan he hitavù igkelipey ve vuwa te Nengazen emun migkaan ku is usa zuen te pemuhat he para idlumpiyu te heini he andew?”
20 Nevenaran si Moises te tavak ni Aaron.
