1 Ne si Nadab wey si Abihu, he menge anak ni Aaron, migkuwa is kada sevaha kandan te teleǥuey te veyewà. Ne midsevukan dan heini te vaǥa wey veyewà ne impemuhat dan diyà te Nengazen. Piru heini is mibeelan dan ne kenè iyan insuǥù te Nengazen, su is hapuy he migamit dan kenà dait he egemiten.
2 Umbe, impevulus te Nengazen is hapuy he midtutung kandan taman te minatey zan diyà te etuvangan te Nengazen dutun te Tulda he Edtelevukaayan.
3 Ne migkeǥiyan ni Moises si Aaron te, “Iyan heini ibpesavut te Nengazen hein migkaǥi sikandin te, ‘Kinahanglan he egkilelaan te menge memumuhat is kegkewaǥas ku, wey kinahanglan he ebeǥayan a te zengeg te langun he menge etew ku.’ ” Wazà meketavak si Aaron.
4 Ne impetawag ni Moises si Mishael wey si Elsafan, he menge anak he maama ni Uziel te anggam ni Aaron, ne migkeǥiyan din sikandan te, “Hendini kew, kuwaa niw is minatey he menge kezuzumahi niw keniyan te Tulda ne uwita niw ziyà te ǥawas te kampu.”
5 Umbe, migkuwa zan haazà is nemematey, piru ziyè dà sikandan megawed te visti, ne mid-uwit dan diyà te ǥawas te kampu sumalà te insuǥù ni Moises.
6 Ne migkaǥi si Moises diyà te ki Aaron wey ziyà te menge anak din he si Eleazar wey si Itamar te, “Kenè niw vey-ani he egkeǥuseng is bulvul niw etawa ebindasen niw is menge kumbalè niw te kebpekilala he idlalew niw is minatey. Emun ebeelan niw heeyan, ne ebpatey kew ne egkepeukan te Nengazen is langun he menge Israilihanen. Is langun he menge etew te Israel he menge kezuzumahi niw, ne iyan mulà sikandan medlalew para keniyan te zezuwa he midtutung te Nengazen.
