4 Pali na tahuna e huriki ri mata taroa a bakovi iea i habia tara e tuna ne Molek, lakea i uka ma ri rabalakia,
5 iau bara marikoi vona turane huriki a kabu vona, bara lili tala ria na kabu ne ria, a vuhuna ri kavurikea e Molek.
6 “Na tahuna a bakovi tara i lakea na bakovi na malulu o na bakovi na muto, ra bakovi iea i pe iau pali, i ramai a naro na uvo. Ra bakovi iea bara a ngalahere vona, a lili talea ne huriki a viri vona.
7 “I mavonga, mu habi mua nau bara mu laho malamala, a vuhuna iau, e BAKOVI DAGI a Vure ne mua.
8 Mu longototo a vinara nau, a vuhuna iau e BAKOVI DAGI a rata mua mu malamala.
9 “E rei a viri i harogi e tamana o e kinana, ni gi rabalaki, a vuhuna ia kunana i vakabele mule a vuranga vona.
10 “Bara a bakovi i rata a naro na molenga ne girihina bakovi tara, ra bakovi a ngatavine nga ni gi rabalaki, a vuhuna rua kunana ru vakabele a vuranga ne rua.
11 “Bara bakovi i mahita turane girihine tamana, i vakahale e tamana. A bakovi a ngatavine nga ni gi rabalaki. Rua kunana ru vakabele a vuranga ne rua.
12 “Bara bakovi i mahita turana e kana, a bakovi a ngatavine nga ni gi rabalaki. Rua kunana ru vakabele a vuranga ne rua.
