10 “Bara a bakovi i rata a naro na molenga ne girihina bakovi tara, ra bakovi a ngatavine nga ni gi rabalaki, a vuhuna rua kunana ru vakabele a vuranga ne rua.
11 “Bara bakovi i mahita turane girihine tamana, i vakahale e tamana. A bakovi a ngatavine nga ni gi rabalaki. Rua kunana ru vakabele a vuranga ne rua.
12 “Bara bakovi i mahita turana e kana, a bakovi a ngatavine nga ni gi rabalaki. Rua kunana ru vakabele a vuranga ne rua.
13 “Bara bakovi i mahita turana a bakovi turana, i manga i mahita turana a ngatavine, ra bakovi nga ru rata a naro i muma hateka ni gi rabalaki, a vuhuna a naro ru ratea i uka ma i ramai a vilo, rua kunana ru vakabele a vuranga ne rua.
14 “Bara bakovi i parangi a ngatavine turana e kinana, tou lobo ni gi gutu na kanono, a vuhuna to rata a naro hale hateka. Ra naro maea nahea ni gi mata taro ge bele ne mua.
15 “Bara bakovi i tari a ligo o a maki tara, ra bakovi iea ni gi rabalaki, a ligo tara ni gi rabalaki.
16 “Bara ngatavine i lakea mai a ligo i mahita turana, a ngatavine turana a ligo ni gi rabalaki; a vuhuna a ngatavine a ligo ru vakabele mule a vuranga ne rua.
17 “Bara bakovi i parangi mule e kurabana, o e tune tamana, o e tune kinana, ra bakovi a ngatavine nga a narone rua i muma hateka. Ni gi lili tala na kabu ne rua, ru gu hatakia a maregoa na naro ru ratea.
18 “Bara bakovi i mahita turana a ngatavine na tahuna a ngatavine i matai a keva, a bakovi a ngatavine nga ru rata a naro i muto, ni gi lili tala na kabu ne rua.
19 “Naha ni mahita turana e balomu o kinamu tara, a vuhuna bara o vakahale a viri vomu, marua varago bara ni vakamadihi na naro muru ratea.
20 “Bara bakovi i mahita turane girihine tamana tara o e girihine hana, ra bakovi iea i vakamaruhu e tamana tara o e hana. A bakovi a ngatavine nga bara ni vakamadihi na narone rua, i uka ma ru gu vakabele a koma.
21 “Bara bakovi i parangi polo vona e girihine turana, ra bakovi iea i vakahale e turana, i muto. Ra bakovi a ngatavine nga, bara ru bala e tune rua.
22 “Mu ramai a ngava dagi, a vinara nau. A malala e Kenan ngane ga taparaki lokovonga mua vona, i uka ma ge lua tala mua, bara mu vivi ni made vona.
23 Naha ni ramai a narone huriki ri made na uvo vonga. Ri rata a naro hale nga lakea a marikoi hateka ne ria. Ngane ga lili tala ria na robo iea, muri bara mu bolea.
