Lahenda Nadedenuꞌ ara Tutuin 8:18-33

¹⁸Simon nita sira dua fua lima nara reuꞌ lahenda sira boe ma, ara sipoꞌ Manetualain Dula-dale Malalao-malalafu Na. Basa boe ma, Simon loo doiꞌ fee Petrus noo Yohanis ma hule nae,

¹⁹“We! Papa kasa. Emi fee au kuasa ria boe. Fo elaꞌ faiꞌ bea ma au nau fua lima ka neuꞌ bea na, sira boe sipoꞌ Amaꞌ Manetualain Dula-dale Malalao-malalafu Na.”

²⁰Tehuu Petrus nasapaa ni nae, “Soe a dei laꞌe ko mo doim ria! O dale ma mae bisa asa ma Manetualain Dula-dale Malalao-malalafu Na muniꞌ doiꞌ? Taꞌa! Lahenda ta bisa asa Manetualain Dula-dale Malalao-malalafu Na fa!

²¹O ta manuu hak hata-hata esa neuꞌ Manetualain Dula-dale Malalao-malalafu Na, te o dale ma ta roos a fa. O maminaꞌ noi naꞌedi-nafuleꞌ a!

²²O hahae memeꞌ sala ma mai leo. Malole lenaꞌ o hule neuꞌ Manetualain, fo kalu bisa na, Ana sasafe heni o duduꞌa-aꞌafi tadalum ria.

²³Au bubuluꞌ ae o henuꞌ noo napeda-daleꞌ a, ma hihii-nanau tadaluꞌ dodouꞌ heke ra o!”

²⁴Basa boe ma, Simon hule dua sii nae, “Papa kasa! Kalu leoꞌ naa soo na, emi hule fee au elaꞌ soe fo rina emi mafada a, bosoꞌ laꞌe au.”

²⁵Basa ria boe ma, Petrus noo Yohanis tui Ramatuaꞌ Yesus Tutui Malole Na katemaꞌ, ma ara rafada Manetualain Dedea-nafadan nai kota ria. Boe ma, ara fali Yerusalem reuꞌ. Ara tuli lalaꞌoꞌ koroꞌ nai Propinsi Samaria, fo tui-beka Ramatuaꞌ Yesus Tutui Malole Na fee lahenda manai naa ra.

²⁶Manetualain ei-laꞌo lima-lopen neme nusa sodaꞌ a mai nadenu Filipus nae, “Anaꞌ o ne! O laꞌo leo poꞌ ona ma mu. Tuka eno paraaꞌ fo neme kota Yerusalem sai leo kota Gasa a neu.”

²⁷Filipus namanene na pareta ria, boe ma ana laꞌo tutiꞌ a. Faiꞌ fo ana nai enoꞌ ria, boe ma nita touꞌ esa, ria nana lahenda bauinaꞌ esa neme nusa Etiopia. Ria rina tao mataꞌ neuꞌ ina mane Kandake a hata nara katemaꞌ. Ana besaꞌ ko hule-haradoi main neme Yerusalem, ma besaꞌ ia ana fali saꞌe kareta. Tepoꞌ ria Filipus teo nita ni, ana natuuꞌ lees nai kareta lain. Ana lees nai Amaꞌ Manetualain mana-dedean baꞌi Yesaya, susura na.

²⁹Boe ma, Amaꞌ Manetualain Dula-dale Malalao-malalafu Na nadenu Filipus naneneaꞌ leo kareta ria neu, fo naneta noꞌ touꞌ ria.

³⁰Ana losa mata te namanene touꞌ ria lees nai baꞌi Yesaya susura na. Boe ma ana natane nae, “Papa! Papa ka bubuluꞌ hata fo papa ka lees ria aa, do taꞌa?”

³¹Boe ma, touꞌ ria nataa nae, “Taꞌa. Lahenda muste rafada matalolole fee au soo na, dei au bubuluꞌ. Ae lain mai matuuꞌ mo au nai ia.”

³²Na, duduiꞌ ria lii na nae leoꞌ ia: “Ara hela roon nonooꞌ leo lahenda hela reni bibi-lopo a, fo sakaꞌ halan. Ria boe dadiꞌ leo bibi-lopo anaꞌ fo lahenda kuti bulu na, tehuu ta namee fa. Ana ta huꞌa bafa na fa, ma ta nataa heni hara na boeꞌ.

³³Basa boe ma, ramumulu-ramamaeꞌ ana; Ara raꞌetuꞌ dedea na ta ma tetuꞌ fa. Seko-nate ria salan taꞌa. Na, ita bei tae ubeaꞌ bali, Ana bei ta nanuu tititi-nonosiꞌ fa, te ara raꞌisan so,”