10 Junama'a, jume' che'a iilitchimpo naateka, jume' ama che'a yo'owemtaka juni'i, si'ime, tua a' sualeka a' jikkajan. Intok inime'e: ―Ini'i o'ou a' joa'u, Liojta a jita joa'ue a' jooa ―ti jiian.
11 Inika'a bempo a' sualen, bwe'ituk ini'i, binwatuk naateka, ka tu'ik yee bai ta'aawamtae, tua binwatuk naateka am bai ta'aariakan.
12 Taa junak inime'e, bempo juka' Jeriipeta, Liojta teekau che'a yo'otaka a' kateka'u betana lutu'uriata intok yo'owe Jesukrijtota lutu'uriapo, Liojta betana yeu pu'aritaka a'abo a' bittuarituka'po ameu a' teuwaawao, bempo a' mabetaka, Krijtota sualekai, o'owimtaka intok jaamuchimtaka chiktia, emo bato'owaa tebok.
13 Intok junama'a, jiba ju'u Simoo' teame juni'i a' sualeka intok ket bato'owaawak. Intok aapo a' ea'po, Jeriipe' teamtamak naas wee taitek. Intok ini'i, waka'a, Liojta a jita joa' betchi'bo, tua ka a joo tu machik intok juka' machilaata joowamta bichakai, tua a' suum eiyaan.
14 Chukula intok, jume' Krijtota yeu pu'arim aman bwe'u jo'ara Jerusalenpo ane'um, bwiaara Samaaria' tea'a betana joomem Liojta betana juka' nok lutu'uriata bem a' mabetaka a' sualeka'po ju'uneiyaaka, juka' Peota intok juka' Joanta junaman am bittuak.
15 Inime'e intok junak aman yajakai, junama'a Samaaria bwiaraapo Krijtota sualeme, junuen juka' Liojta tu'u jiapsita amet an betchi'bo, Liojtau bicha am nokriak.
16 Bwe'ituk inime'e betana kee jabe juka' Liojta tu'u jiapsita a' mabetan, inime'e wepulsi yo'owe Jesukrijtota sualeka jiba bato'owaarim tukan.
17 Junako ju'u Peeo intok ju'u Joan, inime'e Krijtota sualemmet mamteka intok junuen inime'e juka' Liojta tu'u jiapsita a' mabetakai.
18 Junako ju'u Simoon, junuen jume' Krijtota yeu pu'arim, inime'e inimmet mamteko juka' Liojta tu'u jiapsi juname'e a' mabetame bichakai, aapo tomita am makbaen,
19 junammeu: ―Eme'e inika'a utte'ata enchim jipue'uta net ket a' autuane. Junuen junak jabeta juni'i, junaet in mamteka'uta, junaka'a juka' Liojta tu'u jiapsita a' mabetne' betchi'bo ―ti ameu jiiak.
20 Junak intok ju'u Peeo iniau: ―Empo em tomimak ka tu'ikun bicha na'ikiatune. Bwe'ituk inien juka' Liojta yee mika'uta, tomie a jinutu ti em ea' betchi'bo ―ti au jiiak―.
21 Empo inile benaka itom bo'o jooria'po, kia ili juni'i ka iniau lutu'uriak. Bwe'ituk empo, Liojta bichapo ka aamak eaka ka tu'isi jiapsa ―ti jiiak―.
22 Inien inika'a Liojta bichapo ka tu'ik em jiapsa'u betana emo temaika a' koptane. Intok inia betana Liojtau bicha emo nokriane, jumak juni'i inien em eaka'ut aapo enchi jiokoine.
23 Bwe'ituk et ne mammate, inien ama butti jitat em kopte'u. Intok juka' ka tu'ik em joopea'uta, em ka a' su'u toja'u ―ti au jiiak.
24 Junako ju'u Simoon, Peotaimmeu: ―Eme'e, Liojtau bicha nee nokriane, junuen inika'a weemta enchim neu aune'eti jia'uta, ka junuen neu a' chupne' betchi'bo ―ti ameu jiiak.
25 Chukula bempo junama'a yo'owe Jesukrijtota betana bem ju'uneiyaa'uta intok Liojta betana nok lutu'uriata junama a' teuwaasukai, bempo jume' Krijtota yeu pu'arim, junama'a bwiaraa Samaaria' tea'po, juebena ili ka bwere jo'arammet, Krijtota betana juka' nok lutu'uriata a' teuwaasuka intok junak chukula, Jerusalemmeu nottek.
26 Iniat chukula, Liojta betana senu ankeles, Jeriipe' teamtau: ―Inim yeu sikaa, luula yejte'u bicha weene, ju'u bo'ot, inim Jerusalenpo naateka, jo'ara Kaasa' tea'u bicha bo'okamtatchi ―ti au jiiak. Ini'i juna'a ju'u bo'o, bweka pa'ariapo aman bo'okame.
27 Ini'i Jeriipe junuen junam bicha yeu siika. Intok bo'ot weyekai, seenuk, bwiaraa Etioopia' tea'u jometau yepsak. Ini'i eunuuko tukan. Ini'i intok ketchia, yo'oorapo yo'o tekiakan intok junama'a bwiaara Etiopia' tea'po, jamut taka junama'a che'a yo'o ya'ari, Kandaakij teamtau chapti, junae yo'ota tomi ama jipu'uwamta a' suuatuawan. Intok ini'i, bwe'u jo'ara Jerusalenpo, junaman Liojta a' yo'ori betchi'bo, aman noitilatukan.
28 Ini'i o'ou, a' bwiaraau bicha nottika weyen. Intok a' kaba'i karopo yej simeka intok ini'i, bat naataka Liojta betana ju'uneetuawaka, chukula yeu weenemta teuwaamta, Isa'iaj tuka'uta ji'osia ji'ojteim nok simen.
29 Junako ju'u Liojta tu'u jiapsi, Jeriipe' teamta: ―Junae karopo weyemtau a' yebijne' betchi'bo, au rukte'e, junuen a' ju'uneetuak.
30 Intok junak ju'u Jeriipe, buiteka lauti junau ruktekai, inika'a, Isa'iaj tuka'uta ji'osia ji'ojteim nokamta jikkajaka, intok: ―Jaisa empo ju'u em noka'ut ju'uneaka a' nooka ja'ani ―ti a' temaek.
31 Ini'i yoeme intok: ―Kaachin nee aet ju'uneene, kaabeta senuk ju'uneamta nee a' tejwaao ―ti jiiak. Intok junako, aamak ja'amuka aamak a' yej simne' betchi'bo au nookak.
32 Jum Liojta nok lutu'uria ji'ojteimpo a' noka'u inen ji'ojtei tukan: Bwalata benasi nu'uwaka me'etuk. Intok jiba juka' bwala aso'olaata, Jume' a' boa'ume bichapo ka a' bwabwana'a benasi, Aapo ket junuen ka au nokriak.
33 Ka yo'oriwaka jiokot ya'atuk. Intok aapo'ik aniaka a' nokriame, kaabe tuk. Tu'ik jiba joaka jiapsan, taa ka tu'ik joamta benasi ya'awak. Intok jume' aapo'ik betana kateme a' yoemiam tunee'um kaabe tuneemta benasi machian. Bwe'ituk aapo inim bwiapo a' jiapsa'po me'ewak.
34 Ju'u yo'o ya'uraapo tekiakame, juka' Jeriipetau: ―Tua ne eu ujbwana, ju'u chukula yeu weenemta teuwaame, inim aapo au teuwaa ja'ani, oo senuk ta'abwik betana weyemta teuwaa, nee tejwaane ―ti au jiiak.
35 Junako ju'u Jeriipe, jiba junama'a aapo'ik noka'apo, junama'a ji'ojteita au teuwaa taitek, intok aapo, Jesukrijtota betana juka' nok lutu'uriata au teuwaak.
