ዬሱሲ ኪቴዳዋንቱ ኦሱዋ 9:15-40 in Dawro

¹⁵ ሺን ጎዳይ ኣ፥ «ሳዖሊ ኣዪሁዳ ጊዴና ኣሳ ሲንꬃን፥ ካታቱዋ ሲንꬃኒኔ ኢስራዔሊያ ኣሳ ሲንꬃን፥ ታ ሱንꬃ ኤሪሳናዉኔ ታው ኦꬃናዳን ዶሬቴዳ ሚሻ ጊዲያ ዲራው፥ ኔኒ ባ።

¹⁶ ኣዪሲ ጎፔ፥ ታ ሱንꬃ ዲራው፥ ኢ ኣዪኬና ዋዬታናው ቤሲንቶ፥ ታኒ ኣ ቤሳና» ያጌዳ።

¹⁷ ሃናኒ ቢዴ፥ ሶይ ጌሊዴ፥ ባሬ ኩሺያ ሳዖላ ቦላ ዎꬂዴ፥ «ታ ኢሻው ሳዖላ፥ ኔኒ ዪያ ኦጊያን ኔው ቤቴዳ ዬሱሲ፥ ኔኒ ፄላና ማላኔ ጌሻ ኣያናይ ኔናን ኩማና ማላ፥ ታና ኪቴዳ» ያጌዳ።

¹⁸ ኤሌካ፥ ኣዬንቶ ፖቁዋ ማላይ ሳዖላ ኣይፊያፔ ዎꬊና፥ ሳዖሊ ላዔንꬁዋ ፄሌዳ፤ ቃሲ ዴንዲዴ ፃማቄቴዳ።

¹⁹ ቁማ ሚዴ ሚኔቲ፥ ዳማስቆን ዴዒያ ካሊያዋንቱና ኣማሬዳ ጋላሳ ጋሚዔዳ።

²⁰ ኤሌካ፥ «ዬሱሲ ኪሪስቶሲ ፆሳ ናዓ» ያጊዴ፥ ኣዪሁዳ ዎሳ ጎሌቱዋን ቃላ ኦዴዳ።

²¹ ሄዋ ሲሴዳ ኡባይ ማላሌቲዴ፥ «ሃዌ ዬሩሳላሜን ዬሱሳ ሱንꬃ ፄሲያዋንታ ꬋዪሲያዋ ጊዴኔ? ቃሲ ኡንቱንታ ቃቺዴ፥ ቄሳቱዋ ካፓቱዋ ሲንꬃ ኣፋናው ዪቤኔዬ?» ያጌዲኖ።

²² ሺን ሳዖሊ ቃላ ኦዲያ ኦዱ ሚኒ ሚኒ ቤዳ፤ ዬሱሲ ቃሲ ኪሪስቶሳ ጊዲያዋካ ኢ ኣኬኪሲዴ ኦዴዳ ዲራው፥ ዳማስቆን ዴዒያ ኣዪሁዳቱ ኣው ዛሪያዋ ꬋዬዲኖ።

²³ ጮራ ጋላሳፔ ጉዪያን፥ ኣዪሁዳቱ ሺቂዴ፥ ሳዖላ ዎꬋናው ዞሬቴዲኖ።

²⁴ ሺን ኣዪሁዳቱ ባሬና ዎꬋናው ቆፖዋ ሳዖሊ ሲሴዳ፤ ኡንቱንቱ ኣ ዎꬋናው ቃማኔ ጋላሲ ካታማ ፔንጊያ ናጊኖ።

²⁵ ሺን ካሊያዋንታ ኣ ቃማ ኣፊዴ፥ ዲርሳ ሁጲያና ታዪያን ዱጌ ዎꬄዲኖ።

²⁶ ሳዖሊ ዬሩሳላሜ ጋኬዳ ዎዴ፥ ካሊያዋንቱና ኢቲፔ ጋኬታናው ሺቂ ቤዔዳ፤ ሺን ካሊያዋ ኢ ጊዴዳዋ ኡባይ ኣማኔናን ኢፂዴ፥ ኣው ያዬዲኖ።

²⁷ ሺን ባርናባሲ ሳዖላ ዬሱሲ ኪቴዳዋንቱኮ ኣፌዳ፤ ኦጊያን ጎዳ ኢ ዋኒዴ ቤዔዴንቶ፥ ኣው ጎዳይ ዎቲ ሃሳዬዴንቶኔ ቃሲ ሳዖሊ ዳማስቆን ዬሱሳ ሱንꬃን ያዬናን ዎቲ ቃላ ኦዴዴንቶ፥ ኡንቱንቶ ጌሺዴ ኦዴዳ።

²⁸ ሳዖሊ ዬሩሳላሜን ዩዪዴኔ ጎዳ ዬሱሳ ሱንꬃን ያዬናን ቃላ ኦዲዴ፥ ዬሱሲ ኪቴዳዋንቱና ኢቲፔ ዴዔዳ።

²⁹ ቃሲ ሳዖሊ ጊሪኬ ቃላ ሃሳዪያ ኣዪሁዳቱዋና ሃሳዬኔ ፓሉሜቴ፤ ሺን ኡንቱንቱ ኣ ዎꬋናው ኮዬዲኖ።

³⁰ ኢሻቱ ሄዋ ሲሲዴ፥ ሳዖላ ዱጌ ቂሳሪያ ኣፊዴ፥ ፄርሴሴ ዬዴዲኖ።

³¹ ዪሁዳን፥ ጋሊላኒኔ ሳማሪያን ኡባን ዴዒያ ኣማኒያ ኣሳቱ ሳሮቴꬃን ዴዔዲኖ፤ ቃሲ ሚኔዲኖ፤ ጎዳሲ ያዪያዋኒኔ ጌሻ ኣያና ማዱዋን ጌሜቲዴ፥ ፓይዱዋንካ ዳሪ ዳሪ ቤዲኖ።

³² ጴፂሮሲ ኡባሳን ዩዪዴ፥ ሊዳን ዴዒያ ጌሻ ኣሳቱዋኮ ቃሲ ዎꬌዳ።

³³ ያቲዴ ሄዋን ሆስፑን ላይꬃ ሲሊዴ፥ ኣርሳን ጊሲዴ ዴዒያ ኢቲ ኤኒያ ጊያ ቢታኒያ ዴሜዳ።

³⁴ ጴፂሮሲ ኤኒያ፥ «ኤናው፥ ዬሱሲ ኪሪስቶሲ ኔና ፓꬄ፤ ዴንዳዴ ኔ ሂፃ ዬጋ» ያጌዳ። ሄዋፔ ጉዬ ኤሌካ ዴንዲ ኤቄዳ።

³⁵ ሊዳኒኔ ሳሮናን ዴዒያ ኣሳይ ኡባይ ኤኒያ ቤዒዴ፥ ጎዳኮ ሲሜዲኖ።

³⁶ ዮጴ ካታማን ኢቲ ፃቢቶ ጌቴቲያ ኣማኔዉና ዴዓው፤ ፃቢቶ ጉሳይ ጊሪኬ ቃላን ዶርቆ ጊያዋ። ኢዛ ባሬ ዴዔዳ ዎዲያ ኡባን ሎዖባ ኦꬃዴኔ ሂዬሳ ማዳዴ ዴዓው።

³⁷ ሄ ዎዴ ኢዛ ሃርጋዴ ሃይቂና፥ ኣሳይ ኢዚ ኣኃ ሜጪዴ፥ ፖቂያ ፑዴ ኬሲዴ ጊሲሴዳ።

³⁸ ሊዳይ ዮጴሲ ማታ፤ ካሊያዋንቱ ጴፂሮሲ ሊዲያን ዴዒያዋ ዮጴን ሲሲዴ፥ «ሃያና ኑኮ ኤሌካ ያሪኪ» ያጊያ ኪታ ላዑ ኣሳቱዋ ቦላ ኣኮ ኪቴዲኖ።

³⁹ ሄዋፔ ጉዬ ጴፂሮሲ ዴንዲዴ፥ ኡንቱንቱና ቢ ጋኪና፥ ፖቂያ ፑዴ ኣ ኬሲዴ፥ ኪፊሊያ ጌሊሴዲኖ። ኣሲኒ ባይና ኣምዔ ማጫዋንቱ ኡባይ ዬኪዴኔ ዶርቃ ኡንቱንቱና ዴዒያ ዎዴ ኦꬄዳ ቃሚሻቱዋኔ ማያቱዋ ኡባ ጴፂሮሳ ቤሲዴ፥ ኣ ዩሹዋን ዩዪ ኣꬊዴ ኤቄዲኖ።

⁴⁰ ጴፂሮሲ ኡንቱንታ ኡባ ካሬ ኬሲዴ፥ ጉልባቲ ፆሳ ዎሴዳ፤ ቃሲ ኣኃኮ ሲሚዴ፥ «ፃቢቴ፥ ዴንዳ» ያጌዳ፤ ፃቢታካ ባሬ ኣይፊያ ዶያ ጴፂሮሳ ቤዓዴ፥ ꬎቃ ኡታዱ።

¹⁵ Shin Goday A, “Saa7ooli Ayihuda gidenna asaa sinthan, kaatatuwaa sinthaaninne Israa7eeliyaa asaa sinthan, Ta sunthaa erissanawunne Taw oothanaadan dooretteedda miishshaa gidiyaa diraw, neeni ba.

¹⁶ Ayissi gooppe, Ta sunthaa diraw, I ayikeenaa waayyettanaw bessintto, Taani A bessana” yaageedda.

¹⁷ Hanaanii biide, soy geliide, bare kushiyaa Saa7oola bolla wothiide, “Ta ishaw Saa7oolaa, neeni yiyaa ogiyaan new beetteedda Yesuusi, neeni xeellana malanne Geeshsha Ayyaanay neenan kumana mala, taana kiitteedda” yaageedda.

¹⁸ Ellekka, ayentto poquwaa malay Saa7oola ayfiyaappe wodhdhina, Saa7ooli laa7enthuwaa xeelleedda; qassi denddiide xammaqetteedda.

¹⁹ Qumaa miide minetti, Damasqqon de7iyaa kaalliyaawanttunna amareedda gallassaa gami77eedda.

²⁰ Ellekka, “Yesuusi Kiristtoosi Xoossaa Na7aa” yaagiide, Ayihuda woosa golletuwaan qaalaa odeedda.

²¹ Hewaa siseedda ubbay maalalettiide, “Hawe Yeerusalaamen Yesuusa sunthaa xeesiyaawantta dhayissiyaawaa gidennee? Qassi unttuntta qachchiide, qeesatuwaa kaappatuwaa sintha afanaw yibeenneeyee?” yaageeddino.

²² Shin Saa7ooli qaalaa odiyaa oduu minni minni beedda; Yesuusi qassi Kiristtoosa gidiyaawaakka I akeekissiide odeedda diraw, Damasqqon de7iyaa Ayihudatuu aw zaariyaawaa dhayeeddino.

²³ Cora gallassaappe guyyiyan, Ayihudatuu shiiqiide, Saa7oola wodhanaw zoretteeddino.

²⁴ Shin Ayihudatuu barena wodhanaw qoppowaa Saa7ooli siseedda; unttunttu A wodhanaw qammanne gallassi katamaa penggiyaa naagiino.

²⁵ Shin kaalliyaawantta A qamma afiide, dirssaa huuphiyaanna taayyiyaan duge wotheeddino.

²⁶ Saa7ooli Yeerusalaame gakkeedda wode, kaalliyaawanttunna ittippe gakettanaw shiiqi be7eedda; shin kaalliyaawaa I gideeddawaa ubbay ammanennaan ixxiide, aw yayyeeddino.

²⁷ Shin Barnaabaasi Saa7oola Yesuusi kiitteeddawanttukko afeedda; ogiyaan Godaa I waaniide be7eeddentto, aw Goday wooti haasayeeddenttonne qassi Saa7ooli Damasqqon Yesuusa sunthan yayyennaan wooti qaalaa odeeddentto, unttunttoo geeshshiide odeedda.

²⁸ Saa7ooli Yeerusalaamen yuuyyiiddenne Godaa Yesuusa sunthan yayyennaan qaalaa odiidde, Yesuusi kiitteeddawanttunna ittippe de7eedda.

²⁹ Qassi Saa7ooli Giriike qaalaa haasayiyaa Ayihudatuwaanna haasayeenne palumettee; shin unttunttu A wodhanaw koyyeeddino.

³⁰ Ishatuu hewaa sisiide, Saa7oola duge Qiisaariyaa afiide, Xersseese yeddeeddino.

³¹ Yihudaan, Galiilaaninne Sammaariyan ubbaan de7iyaa ammaniyaa asatuu sarotethaan de7eeddino; qassi minneeddino; Godaassi yayyiyaawaaninne Geeshsha Ayyaanaa maaduwan geemettiidde, payduwankka dari dari beeddino.

³² Phexiroosi ubbasan yuuyyiidde, Liidaan de7iyaa geeshsha asatuwaakko qassi wodhdheedda.

³³ Yaatiide hewaan hosppun laythaa siliide, arssaan gisiide de7iyaa itti Eeniyaa giyaa bitaniyaa demmeedda.

³⁴ Phexiroosi Eeniyaa, “Eenaw, Yesuusi Kiristtoosi neena pathee; denddaade ne hiixaa yegga” yaageedda. Hewaappe guyye ellekka denddi eqqeedda.

³⁵ Liidaaninne Saaroonan de7iyaa asay ubbay Eeniyaa be7iide, Godaakko simmeeddino.

³⁶ Yoophphe katamaan itti Xaabito geetettiyaa ammanewunna de7aw; Xaabito guussay Giriike qaalaan Dorqqo giyaawaa. Iza bare de7eedda wodiyaa ubbaan lo77obaa oothaaddenne hiyyeesaa maaddaadde de7aw.

³⁷ He wode iza harggaade hayqqina, asay izi anhaa meecciide, pooqiyaa pude kessiide gisisseedda.

³⁸ Liiday Yoophphessi mata; kaalliyaawanttu Phexiroosi Lidiyan de7iyaawaa Yoophphen sisiide, “Hayyanaa nuukko ellekka yaarikkii” yaagiyaa kiitaa laa77u asatuwaa bolla aakko kiitteeddino.

³⁹ Hewaappe guyye Phexiroosi denddiide, unttunttunna bi gakkina, pooqiyaa pude A kessiide, kifiliyaa gelisseeddino. Asini baynna am77e maccawanttu ubbay yeekkiiddenne Dorqqa unttunttunna de7iyaa wode ootheedda qamishatuwanne mayatuwaa ubbaa Phexiroosa bessiidde, A yuushshuwaan yuuyyi aadhdhiide eqqeeddino.

⁴⁰ Phexiroosi unttuntta ubbaa kare kessiide, gulbbati Xoossaa woosseedda; qassi anhaakko simmiide, “Xaabitee, dendda” yaageedda; Xaabitakka bare ayfiyaa dooyya Phexiroosa be7aade, dhoqqa uttaaddu.