ዬሱሲ ኪቴዳዋንቱ ኦሱዋ 27:4-41 in Dawro

⁴ ሄዋፔ ዴንዲዴ፥ ሲንꬃና ኑ ቦላ ጫርኪያ ዲራው፥ ቆጲሮሳ ሃꬃን ዶዴቴዳ ሳዓን ጫርኬና ባጋ ቤዶ።

⁵ ኪልቂያ ማታኒኔ ጲኒፊሊያ ማታን ዴዒያ ኣባ ፒኒዴ፥ ሊቂያን ዴዒያ ሙራ ጋኬዶ።

⁶ ሄዋን ፄታቱዋ ካፑ ፃሊያ ቢያ ኢስኪንዲሪያ ማርካቢያ ዴሚዴ፥ ኣኒ ኑና ጌሊሴዳ።

⁷ ኑኒ ጮራ ዎዲያ ሎዳን ቢዴ፥ ዳሮ ሜቱዋን ቄኒዶሳ ካታማ ጋኬዶ፤ ሄዋና ባናው ኑና ጫርኩ ዲጊና ሳልሞናና ኣꬊዴ፥ ሃꬃን ዶዴቴዳ ቃርፄሳን ጫርኩዋፔ ቴዔቲዴ ቤዶ።

⁸ ቃሲካ ዳሮ ሜቱዋን ጋፃና ጋፃና ኣꬊዴ፥ ላሲያ ካታማ ማታን ዴዒያ ኣባ ዶናን ማርካቢ ዎፑ ጊዴ ሼምፒያሳ ጌቴቲያሳ ዬዶ።

⁹ ኑኒ ሄዋን ጮራ ዎዲያ ጋሚዔዳዋፔ ጉዪያን፥ ፆማይ ቢሌቲዲጌዳ ዲራው፥ ማርካቢያን ቢያዌካ ሂርጊሺን ጳዉሎሲ ኡንቱንታ ዞሪዴ፥

¹⁰ «ኣሳው፥ ኑ ቡሳን ዎልቃማ ቦሻይኔ ዳሮ ባሻይ ዴዓናዌ ታው ቤቴ፤ ባሻይ ዪያዌ ጫና ቦላኔ ማርካቢያ ቦላ ፃላላን ጊዴና፤ ኑ ሼምፑዋ ቦላካ ያናዋ» ያጌዳ።

¹¹ ሺን ፄታቱዋ ካፑ ጳዉሎሲ ጌዳዋፔ ኣꬂዴ፥ ማርካቢያን ዴዒያዋንታ ኣዛዚያዌኔ ማርካቢያ ጎዳይ ጊያዋ ኣማኔ።

¹² ሄ ኣባ ማታ ካታማይ ባልጉዋ ሻጫናው ኡንቱንቶ ሚኬና ካታማ፤ ሄዋ ዲራው፥ ጮራ ኣሳቱ ባሬንቶ ዳንዳዬቶፔ፥ ፒንቄ ጊያ ካታማ ጋኪዴ፥ ባልጉዋ ያኒ ሻጫና ማላ፥ ያፔ ዴንዳናው ዞሬቴዲኖ፤ ፒንቄን ዴዒያ ማርካቢ ሼምፒያ ሚኮ ሳዓይ ዶዬቴዳዌ፥ ኣዋይ ዉሊያሳፔኔ ኡሼቻ ባጋፔ ጊዱዋን፥ ቃሲ ዉሊያሳፔኔ ሃዲርሳፔ ጊዱዋና።

¹³ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋ ጫርኩ ሎዳን ጫርኬዳ ዎዴ፥ ባሬንቱ ቆፔዳዋዳን ሃኔዳዋ ኡንቱንቶ ማላቲና ዴንዴዲኖ፤ ማርካቢ ቤና ማላ ኦይቂያ ቢራታ ፑዴ ዳፊዴ፥ ቃርፄሳ ማታቲዴ፥ ላንቂያና ኣꬌዲኖ።

¹⁴ ሺን ዳሪ ጋሚዔናን፥ «ኣዉራቂስ» ጊያ ዳሮ ዎልቃማ ጎቱ ሃꬃ ጊዶን ዴዒያ ሳዓፔ ዱጌ ኡንቱንቱ ቦላ ዴንዴዳ።

¹⁵ ሄ ጎቱ ማርካቢያ ዴቺዴ ኣꬄናን ዲጊና፥ ባናው ኑሲ ዳንዳዬቴናን ኢፄዳ ዲራው፥ ማርካቢያ ኢ ኣፊያሳ ኣጊዴ ቤዶ።

¹⁶ ኑኒ ቄዳ ጊያ ሃꬃን ዶዴቴዳ ጫርኩዋፔ ጌሜዳ ሳና ኣꬊያ ዎዴ፥ ዳሪሲ ሜቶቲዴ ማርካቢያ ዎንጊሪያን ናጊ ኣሻናው ዳንዳዬዶ።

¹⁷ ኡንቱንቱ ዎንጊሪያ ፑዴ ኬሴዳዋፔ ጉዪያን፥ ጋዲያን ማርካቢያ ፃፂዴ፥ ሚኒሲ ቃቼዲኖ፤ ሲርፂሳ ጊያ ሻፊ ኩሜዳ ሳን ባሬንታ ኩንዲሳኔንቶኔ ጊዴ ሂርጊዴ፥ ማርካቢያ ኣፊያ ሻራ ዎꬂዴ፥ ጫርኩዋን ማርካቢያ ጮ ዬዲ ኣጌዲኖ።

¹⁸ ጎቱ ዎልቃሚዴ ኑ ቦላን ዎልቃሜዳ ዲራው፥ ዎንቲሳ ጋላሲ ጫናፔ ኣባን ኦሉዋ ዶሜዲኖ።

¹⁹ ሄዜንꬂያ ጋላሲካ ማርካቢያን ዴዒያ ሚሻ ኡንቱንቱ ባሬንቱ ኩሺያን ኦሌዲኖ።

²⁰ ኑኒ ዳሮ ዎዲያ ኣዋኔ ፆሊንቲያ ቤዔናን፥ ዎልቃማ ኡሹ ኑ ቦላ ቡኪሺን፥ ሲንꬃፔ ꬋያናን ኣቶኮ ጊዴ ቆፔዶ።

²¹ ኡንቱንቱ ዳሮ ዎዲያ ቁማ ሜናን ጋሚዔዳዋፔ ጉዪያን፥ ጳዉሎሲ ሄ ዎዴ ኡንቱንቱ ጊዶን ዴንዲ ኤቂዴ፥ ሃዋዳን ያጌዳ፤ «ኣሳው፥ ሂንቴንቱ ታ ዞሪያ ኣኬዴንቶኔ ቃርፄሳፔ ዴንዴናን ኣቴዴንቶ፥ ሃዋ ማላ ባዬꬃይኔ ቆሁ ኑና ጋኬና።

²² ሺን ሃዒካ ታኒ ሂንቴንታ ያዮፒቴ ጋዴ ዞራይ፤ ኣዪሲ ጎፔ፥ ሃ ማርካቢ ባያናፔ ኣቲን፥ ሂንቴንቱፔ ኢቲ ኡራ ሼምፑካ ባዬና።

²³ ኣዪሲ ጎፔ፥ ፆሳ ኪታንቻይ፥ ታና ሞዴዳ ታኒ ጎዪኒያ ፆሳዌ፥ ዚኖ ቃማ ታ ማታን ኤቂዴ፥

²⁴ ‹ጳዉሎሳ፥ ያዮፓ፤ ኔኒ ሮሜ ጋዲያ ካቲያ ቄሳራ ሲንꬃን ኤቃናው ቤሴ፤ ቤዓ፥ ፆሳይ ባሬ ኬካቴꬃን ኔናና ቢያ ኣሳ ኡባ ሼምፑዋ ኣሻና› ያጌዳ።

²⁵ ሄዋ ዲራው ኣሳው፥ ያዮፒቴ። ኣዪሲ ጎፔ፥ ሄ ኪታንቻይ ታው ኦዴዳዋዳን ሃናናዋ ታኒ ፆሳ ኣማናይ፤

²⁶ ሺን ጫርኩ ኑና ኢቲ ሃꬃን ዶዴቴዳ ሳዓን ኣባ ዶናን ዶምዒሳና» ያጌዳ።

²⁷ ታማኔ ኦይዴንꬆ ጋላሲ ሜዲቴራኒያ ኣባን ኑና ጫርኩ ያኔ ሃኔ ሱጊሺን፥ ማርካቢያን ኦꬂያዋንቱሲ ቃማ ቢላሂ ቢታኮ ማቴዳዋ ማላቴዳ።

²⁸ ኡንቱንቱ ሊኪያ ጋዲያ ፄራን ዴፂያባ ቃቺዴ፥ ሃꬃን ዬጊና፥ ሃꬃይ ኦይታሙ ሚቲሪያ ጪማቴዳዋ ኤሬዲኖ። ጉꬃ ጋሚዒዴ፥ ላዔꬁዋ ዬጊዴ፥ ሃታሙ ሚቲሪያ ጪማቴዳዋ ኤሬዲኖ።

²⁹ ኡንቱንቱ ሹቻቲያሳን ኩንዴና ማላ ያዪዴ፥ ማርካቢ ቤና ማላ ኦይቂያ ኦይዱ ቢራታ ማርካቢያፔ ጉዬና ኣባን ዬጊዴ፥ ሳዓይ ዎንታና ማላ፥ ባሬንቱ ፆሳቱዋ ዎሲኖ።

³⁰ ማርካቢያን ኦꬂያዋንቱ ማርካቢያፔ ኪቻናው ኮዪዴ፥ ማርካቢ ቤና ማላ ኦይቂያ ኣማሬዳ ቢራታቱዋ ማርካቢያፔ ሲንꬃ ባጋና ኣባን ዬጊያዋ ማላቲዴ፥ ዎንጊሪያ ኣባን ዎꬄዳ ዎዴ፥

³¹ ጳዉሎሲ ፄታቱዋ ካፑዋኔ ዎታዳራቱዋ፥ «ሃዋንቱ ማርካቢያ ጊዶን ዴዓና ꬋዮፔ፥ ሂንቴንቱ ኣታናው ዳንዳይኪታ» ያጌዳ።

³² ሄዋፔ ጉዪያን፥ ዎታዳራቱ ዎንጊሪ ቃሼቴዳ ጋዲያ ቃንፂዴ፥ ዬዲ ኣጌዲኖ።

³³ ሳዓይ ዎንታና ሃኒሺን፥ ጳዉሎሲ ኡባይ ቁማ ማና ማላ፥ ሃዋዳን ያጊዴ ዎሴዳ፤ «ሂንቴንቱ ሃቼና ታማኔ ኦይዱ ጋላሳ ናጌዲታ፤ ቃሲ ሄ ኡባንካ ቁማ ሚቤይኪታ።

³⁴ ሄዋ ዲራው፥ ጉꬃ ቁማ ሂንቴንቱ ማና ማላ፥ ታኒ ሂንቴንታ ዎሳይ፤ ኣዪሲ ጎፔ፥ ሂንቴንቱ ፓፃ ዴዓናው ጉꬃ ቁማ ማና ኮሼ፤ ሃራይ ኣቶ ሂንቴንቱ ሁጲያ ቢናናፔ ኢቱካ ባዬና» ያጌዳ።

³⁵ ጳዉሎሲ ሃዋ ጊዴ፥ ኡኪꬃ ኣኪዴ፥ ኡባ ሲንꬃን ፆሳ ጋላቴዳ፤ ሜንꬂ ሙሳ ዶሜዳ።

³⁶ ሄዋፔ ጉዪያን ኡባይ ሎይꬂ፥ ባሬንቶ ቃሲ ቁማ ሜዲኖ።

³⁷ ኑኒ ማርካቢያን ዴዒያዋንቱ ላዑ ፄታኔ ላፑን ታማኔ ኡሱፑና።

³⁸ ኡንቱንቱ ሚዴ ካሌዳ ዎዴ፥ ጫና ዛርጋ ኣባን ኦሊዴ ማርካቢያ ዴፁዋ ካዉሺሴዲኖ።

³⁹ ሳዓይ ዎንቴዳ ዎዴ፥ ማርካቢያን ኦꬂያዋንቱ ጋዲያ ኤሪቤይኪኖ፤ ሺን ሃꬃይ ጎጊዴ ኣባን ጌሌዳሳ ሚዪያን ዴዒያ ሻፊያ ኣኬካን ፄሌዲኖ። ባሬንቱሲ ዳንዳዬቲንቶ፥ ማርካቢያ ሄ ሻፊያኮ ላጋናው ባሬንቱ ቆፋ ቃቼዲኖ።

⁴⁰ ያቲዴ ማርካቢ ቤና ማላ ኦይቂያ ቢራታቱዋ ቢሊዴ፥ ኣባ ጊዶ ዬጌዲኖ፤ ሄ ዎዴ፥ ማርካቢያ ኮዬዳሳ ዛሪዴ ላጊያ ሚꬃ ቃቼዳ ጋዲያ ቢሌዲኖ፤ ሄዋፔ ጉዪያን፥ ጫርኩ ማርካቢያ ሲንꬃው ሱጋና ማላ፥ ማርካቢያ ኣፊያ ሻራ ሲንꬃ ባጋና ꬎቁ ኡዲዴ፥ ቡሳ ዶሜዲኖ።

⁴¹ ሺን ማርካቢ ጪሙ ዴዒያሳፔ ኣꬊዴ ሃꬃን ዶዴቴዳ ሳዓ ማታን ዴዒያ ዴꬃሳን ዶምዔቲ ኤቄዳ፤ ማርካቢያሲ ጉዬ ባጋይ ቤታ ሱጌꬃን ሜዔሬቲሺን፥ ሲንꬃ ባጋይ ዱጌ ꬊሼቲዴ፥ ቃፄናን ኢፂ ኣጌዳ።

⁴ Hewaappe denddiide, sinthanna nu bolla carkkiyaa diraw, Qophiroosa haathaan doodetteedda sa7aan carkkenna bagga beeddo.

⁵ Kilqqiyaa mataaninne Phinifiliyaa matan de7iyaa abbaa pinniide, Liqiyan de7iyaa Muura gakkeeddo.

⁶ Hewaan xeetatuwaa kaappuu Xaaliya biyaa Iskkinddiriyaa markkabiyaa demmiide, aani nuuna gelisseedda.

⁷ Nuuni cora wodiyaa loddaan biidde, daro metuwan Qenidoosa katamaa gakkeeddo; hewaanna baanaw nuuna carkkuu diggina Salmoonanna aadhdhiide, haathaan doodetteedda Qarxxeesan carkkuwaappe te7ettiidde beeddo.

⁸ Qassikka daro metuwan gaxanna gaxanna aadhdhiide, Laasiya katamaa matan de7iyaa abbaa doonaan Markkabii Woppu Giide Shemppiyaasaa geetettiyaasaa yeeddo.

⁹ Nuuni hewaan cora wodiyaa gami77eeddawaappe guyyiyan, Xoomay bilettidiggeedda diraw, markkabiyaan biyaawekka hirggishshin Phawuloosi unttuntta zoriidde,

¹⁰ “Asaw, nu buussan wolqqaama boshaynne daro bashshay de7anawe taw beettee; bashshay yiyaawe caanaa bollanne markkabiyaa bolla xalalaan gidenna; nu shemppuwaa bollaakka yaanawaa” yaageedda.

¹¹ Shin xeetatuwaa kaappuu Phawuloosi geeddawaappe aathiide, markkabiyaan de7iyaawantta azaziyaawenne markkabiyaa goday giyaawaa ammanee.

¹² He abbaa mataa katamay balgguwaa shaaccanaw unttunttoo miikkenna katamaa; hewaa diraw, cora asatuu barenttoo danddayettooppe, Pinqqe giyaa katamaa gakkiide, balgguwaa yaani shaaccana mala, yaappe denddanaw zoretteeddino; Pinqqen de7iyaa markkabii shemppiyaa miikko sa7ay doyetteeddawe, away wulliyaasaappenne ushechcha baggappe gidduwan, qassi wulliyaasaappenne haddirssappe gidduwana.

¹³ Away kesiyaasaa xeelliyaa wode ushechcha dugehaa bagga carkkuu loddaan carkkeedda wode, barenttu qoppeeddawaadan haneeddawaa unttunttoo malatina denddeeddino; markkabii beenna mala oyqqiyaa birataa pude dafiide, Qarxxeesa matattiide, lanqqiyanna aadhdheeddino.

¹⁴ Shin darii gami77ennaan, “Awuraaqiis” giyaa daro wolqqaama gotuu haathaa giddon de7iyaa sa7aappe duge unttunttu bolla denddeedda.

¹⁵ He gotuu markkabiyaa dechchiide aathennaan diggina, baanaw nuussi danddayettennan ixxeedda diraw, markkabiyaa I afiyaasaa aggiide beeddo.

¹⁶ Nuuni Qeeda giyaa haathaan doodetteedda carkkuwaappe geemmeedda saanna aadhdhiyaa wode, darissi metootiide markkabiyaa wonggiriyaan naagi ashshanaw danddayeeddo.

¹⁷ Unttunttu wonggiriyaa pude kesseeddawaappe guyyiyan, gaadiyaan markkabiyaa xaaxiide, minissi qachcheeddino; Sirxxisa giyaa shafii kumeedda saan barentta kunddissanenttonne giide hirggiide, markkabiyaa afiyaa sharaa wothiide, carkkuwan markkabiyaa coo yeddii aggeeddino.

¹⁸ Gotuu wolqqaamiide nu bollan wolqqaameedda diraw, wonttissa gallassi caanaappe abbaan oluwaa doommeeddino.

¹⁹ Heezzenthiyaa gallassikka markkabiyaan de7iyaa miishshaa unttunttu barenttu kushiyan oleeddino.

²⁰ Nuuni daro wodiyaa awaanne xoolinttiyaa be7ennaan, wolqqaama uushuu nu bolla bukkishshin, sinthappe dhayanaan attokko giide qoppeeddo.

²¹ Unttunttu daro wodiyaa qumaa meennaan gami77eeddawaappe guyyiyan, Phawuloosi he wode unttunttu giddon denddi eqqiide, hawaadan yaageedda; “Asaw, hinttenttu ta zoriyaa akkeeddenttonne Qarxxeesappe denddennaan atteeddentto, hawaa mala bayethaynne qohuu nuuna gakkenna.

²² Shin ha77ikka taani hinttentta yayyoppite gaade zoray; ayissi gooppe, ha markkabii bayanaappe attin, hinttenttuppe itti uraa shemppuukka bayenna.

²³ Ayissi gooppe, Xoossaa kiitanchchay, taana mooddeedda taani goyinniyaa Xoossaawe, zino qamma ta matan eqqiide,

²⁴ ‘Phawuloosaa, yayyoppa; neeni Roome gadiyaa Kaatiyaa Qeesaara sinthan eqqanaw bessee; be7a, Xoossay bare keekatethaan neenanna biyaa asaa ubbaa shemppuwaa ashshana’ yaageedda.

²⁵ Hewaa diraw asaw, yayyoppite. Ayissi gooppe, he kiitanchchay taw odeeddawaadan hananawaa taani Xoossaa ammanay;

²⁶ shin carkkuu nuuna itti haathaan doodetteedda sa7aan abbaa doonaan dom77issana” yaageedda.

²⁷ Tammanne oyddentho gallassi Meediteraaniyaa Abbaan nuuna carkkuu yaanne haanne sugishshin, markkabiyaan oothiyaawanttussi qamma bilahii biittaakko mateeddawaa malateedda.

²⁸ Unttunttu likkiyaa gaadiyaa xeeraan dexiyaabaa qachchiide, haathaan yeggina, haathay oytamu mitiriyaa ciimmateeddawaa ereeddino. Guuthaa gami77iidde, laa7ethuwaa yeggiide, hattamu mitiriyaa ciimmateeddawaa ereeddino.

²⁹ Unttunttu shuchchattiyaasan kunddenna mala yayyiide, markkabii beenna mala oyqqiyaa oyddu birataa markkabiyaappe guyyenna abbaan yeggiide, sa7ay wonttana mala, barenttu xoossatuwaa woossiino.

³⁰ Markkabiyan oothiyaawanttu markkabiyaappe kichchanaw koyyiide, markkabii beenna mala oyqqiyaa amareedda biratatuwaa markkabiyaappe sintha bagganna abbaan yeggiyaawaa malatiide, wonggiriyaa abbaan wotheedda wode,

³¹ Phawuloosi xeetatuwaa kaappuwaanne wottaaddaratuwaa, “Hawanttu markkabiyaa giddon de7ana dhayooppe, hinttenttu attanaw danddaykkita” yaageedda.

³² Hewaappe guyyiyan, wottaaddaratuu wonggirii qashetteedda gaadiyaa qanxxiide, yeddii aggeeddino.

³³ Sa7ay wonttana hanishshin, Phawuloosi ubbay qumaa maana mala, hawaadan yaagiide woosseedda; “Hinttenttu hachchenna tammanne oyddu gallassaa naageeddita; qassi he ubbankka qumaa mibeykkita.

³⁴ Hewaa diraw, guutha qumaa hinttenttu maana mala, taani hinttentta woossay; ayissi gooppe, hinttenttu paxa de7anaw guutha qumaa maana koshshee; haray atto hinttenttu huuphiyaa binnanaappe ittuukka bayenna” yaageedda.

³⁵ Phawuloosi hawaa giide, ukithaa akkiide, ubbaa sinthan Xoossaa galateedda; menthi Muussaa doommeedda.

³⁶ Hewaappe guyyiyaan ubbay loythi, barenttoo qassi qumaa meeddino.

³⁷ Nuuni markkabiyaan de7iyaawanttu laa77u xeetanne laappun tammanne usuppuna.

³⁸ Unttunttu miide kaalleedda wode, caanaa zarggaa abbaan oliide markkabiyaa deexuwaa kawushisseeddino.

³⁹ Sa7ay wontteedda wode, markkabiyaan oothiyaawanttu gadiyaa eribeykkino; shin haathay goggiide abbaan geleeddasaa miyyiyaan de7iyaa shafiyaa akeekaan xeelleeddino. Barenttussi danddayettintto, markkabiyaa he shafiyaakko laagganaw barenttu qofaa qachcheeddino.

⁴⁰ Yaatiide markkabii beenna mala oyqqiyaa biratatuwaa billiide, abbaa giddo yeggeeddino; he wode, markkabiyaa koyyeeddasaa zaariide laaggiyaa mithaa qachcheedda gaadiyaa billeeddino; hewaappe guyyiyan, carkkuu markkabiyaa sinthaw sugana mala, markkabiyaa afiyaa sharaa sintha bagganna dhoqqu udiide, buussaa doommeeddino.

⁴¹ Shin markkabii ciimmuu de7iyaasaappe aadhdhiide haathaan doodetteedda sa7aa matan de7iyaa dethasaan dom77etti eqqeedda; markkabiyaassi guyye baggay beetaa sugethaan me7erettishshin, sintha baggay duge dhishettiide, qaaxxennaan ixxi aggeedda.