ዬሱሲ ኪቴዳዋንቱ ኦሱዋ 23:7-35 in Dawro

⁷ ጳዉሎሲ ሄዋ ያጊና፥ ፓሪሳዋቱዋ ጊዶኒኔ ሳዱቃዋናቱዋ ጊዶን ዋላሳይ ኬሲና፥ ሺቄዳ ኣሳይ ላሌቴዳ።

⁸ ኣዪሲ ጎፔ፥ ሳዱቃዋናቱ፥ «ሃይቄዳ ኣሳይ ዴንዴና፤ ኪታንቻይካ ኣያናይካ ባዋ» ያጌዲኖ፤ ፓሪሳዋቱ ቃሲ ላዑካ ዴዒያዋ ኣማኒኖ።

⁹ ዎልቃማ ዋላሳይ ዴንዴዳ፤ ፓሪሳዋቱዋ ባጋፔ ሙሴ ሂጊያ ታማርሲያዋንቱ ዴንዲ ኤቂዴ፥ «ሃ ቢታኒያ ቦላ ኣይኔ ባላ ዴሚቤይኮ፤ ኣው ኣያናይ ዎይ ኪታንቻይ ሃሳዬናን ኣጌና» ያጊዴ ፓሉሜቴዲኖ።

¹⁰ ዋላሳይ ዳሪና፥ ኦላ ካፑ ጳዉሎሳ ኡንቱንቱ ሜንꬄሬꬃኔንቶኔ ጊ ያዪዴ፥ ባሬ ዎታዳራቱ ዎꬊዴ፥ ኡንቱንቱ ጊዶፔ ኣ ኤሌካ ኬሲዴ፥ ባሬንቱ ዴዒያሳ ኣፋና ማላ ኣዛዜዳ።

¹¹ ሄ ቃማ ጎዳይ ጳዉሎሳ ማታን ኤቂዴ፥ «ጳዉሎሳ፥ ኔኒ ታው ዬሩሳላሜን ማርካቴዳዋዳን፥ ሮሜንካ ማርካታናው ቤሴ፤ ሚና፤ ኣይኔ ባዋ» ያጌዳ።

¹² ዎንቲሳ ጋላሲ፥ ኣዪሁዳቱ ጳዉሎሳ ዎꬋና ጋካናሲ፥ ሜናዳኒኔ ኡሼናዳን፥ ጫቄቲዴ ጊጌቴዲኖ።

¹³ ጳዉሎሳ ቦላ ሄዋ ማቄቴዳ ኣሳቱ ኦይታሙዋፔ ዳሪኖ።

¹⁴ ኡንቱንቱ ቄሳቱዋ ካፓቱዋኮኔ ጪማቱዋኮ ዪዴ፥ «ኑኒ ጳዉሎሳ ዎꬋና ጋካናሲ፥ ኣይኔ ባሬናዳን፥ ጊጌቲ ኡቴዶ።

¹⁵ ሄዋ ዲራው፥ ሂንቴንቱኔ ሺቄዳ ኣሳይ ጳዉሎሳባ ጌሺዴ ቢዲያዋ ማላቲዴ፥ ኦላ ካፑ ኣ ሂንቴንቱኮ ዱጌ ዎꬃና ማላ ኦቺቴ፤ ኑኒ ኢ ሃ ሺቃናፔ ካሴና ኣ ዎꬋናው ጊጊ ኡቴዶ» ያጌዲኖ።

¹⁶ ሺን ጳዉሎሳ ሚቻቲ ናዓይ ሄ ማቁዋ ሲሴዳ ዎዴ፥ ቢዴ ዎታዳራቱ ዴዒያሳ ጌሊዴ፥ ጳዉሎሳው ኦዴዳ።

¹⁷ ጳዉሎሲ ፄታቱዋ ካፓቱዋፔ ኢቱዋ ፄሲዴ፥ «ሃ ናዓ ኦላ ካፑዋኮ ኣፋ፤ ኣዪሲ ጎፔ፥ ኦላ ካፑዋሲ ኢ ኦዲያዌ ዴዔ» ያጌዳ።

¹⁸ ሄዋ ዲራው፥ ፄታቱዋ ካፑ ናዓ ኦላ ካፑዋኮ ኣፊዴ፥ «ቃሾ ጎሌን ዴዒያ ጳዉሎሲ፥ ሃ ናዓይ ኔው ኣዬንቶ ኦዲያባይ ዴዒያ ዲራው፥ ታና ባሬኮ ፄሲዴ፥ ኣ ኔኮ ኣሃናዳን፥ ታና ዎሴዳ» ያጌዳ።

¹⁹ ኦላ ካፑ ናዓ ኩሺያ ኦይቂዴ፥ ዱማ ጋፃ ኬሲዴ፥ «ኔኒ ታው ኦዳናባይ ኣዬ?» ያጊዴ ኦቼዳ።

²⁰ ናዓይ ኦላ ካፑዋሲ፥ «ኣዪሁዳቱ ጳዉሎሳባ ካሴፔ ሚኒሲ ኦቺያዋ ማላቲዴ፥ ኔኒ ሺቁዋ ኣ ኡቲሳናዳን፥ ኔና ዎንቲ ዎሳናው ዞሬታ ቃቼዲኖ።

²¹ ሺን ኔኒ ኡንቱንቱ ጊያዋ ሲሶፓ፤ ኣዪሲ ጎፔ፥ ኦይታሙዋፔ ዳሪያ ኣሳቱ ጳዉሎሳ ዎꬋና ጋካናሲ፥ ቁማ ሜናዳኒኔ ሃꬃ ኡሼናዳን፥ ጫቄቲዴ ጌሜቲ ኡቲዴ ኣ ናጊኖ፤ ኔኒ ጊያዋ ሲሳናው ሃዒካ ጊጌቲ ኡቲዴ ናጊኖ» ያጌዳ።

²² ሄዋ ዲራው፥ ኦላ ካፑ ናዓ፥ «ሃ ዬዉዋ ኔኒ ታና ኤሪሴዳዋ ኦሲኔ ኦዶፓ» ያጊዴ ኣዛዜዳዋፔ ጉዪያን፥ ኣ ዬዴዳ።

²³ ኦላ ካፑ ፄታቱዋ ካፓቱዋፔ ላዑዋ ፄሲዴ፥ «ቂሳሪያ ባናው፥ ላዑ ፄቱ ዎታዳራቱዋ፥ ላፑን ታሙ ፓራ ኦይቄዳ ኣሳቱዋኔ ላዑ ፄቱ ቶራንቻቱዋ ቃማፔ ሄዙ ሳቲያን ጊጊሲቴ፤

²⁴ ጋዲያ ሞዲያ ፊሊኪሳኮ ጳዉሎሳ ሳሮቴꬃን ጋꬃናው ቶጊሲያ ሜሂያኔ ጊጊሲቴ» ያጊዴ፥ ኡንቱንታ ኣዛዜዳ።

²⁵ ኦላ ካፑ ሃዋዳን ጊያ ዳቢዳቢያ ፃፌዳ።

²⁶ «ቃላዉዴዮሳ ሉሲዮሳፔ፤ ጋዲያ ሞዲያ ቦንቼቴዳ ፊሊኪሳ! ሳሮቴꬃይ ኔው ጊዶ።

²⁷ ኣዪሁዳቱ ሃ ቢታኒያ ኦይቂዴ ዎꬋና ሃኒሺን፥ ሮሜ ካታማ ኣሳ ኢ ጊዴዳዋ ኤራዴ፥ ዎታዳራቱዋና ጋካዴ ኣ ኣሻዲ።

²⁸ ኡንቱንቱ ኣ ኣዪሲ ሞቴዲኖንቶ ኤራናው ኮያዴ፥ ዱጌ ኡንቱንቱ ሺቁዋሲ ኣ ኣፋዲ።

²⁹ ኡንቱንቱ ባሬንቱ ሂጊያባ ኢ ኦቼዳዋሲ ኣ ሞቴዳዋፔ ኣቲን፥ ኣ ዎꬊሲያ ዎይ ቃሺሲያ ሞቶ ጊዴና።

³⁰ ኡንቱንቱ ሃ ቢታኒያ ቦላ ማቄቲ ኡቴዳ ዚጊሪሳይ ታና ጋኪና፥ ታኒ ሄ ማንዒያንካ ኣ ኔኮ ዬዳ ኣጋዲ፤ ኣ ሞቲያዋንቱካ ቢዴ፥ ኔ ሲንꬃን ሞታና ማላ ኦዳዲ፤ ሳሮ ዴዓ» ያጌዳ።

³¹ ሄዋ ዲራው፥ ዎታዳራቱ ኣዛዜቴዳዋዳንካ ጳዉሎሳ ኣኪዴ፥ ቃማ ኣንቲጳፂሪሳ ጋꬄዲኖ።

³² ዎንቲሳ ጋላሲ ኣናና ባና ማላ ፓራ ቶጎ ኣሳቱዋ ዎꬂዴ፥ ጌዲያን ቢያዋንቱ ጉዬ ዎታዳራቱ ዴዒያሳ ሲሜዲኖ።

³³ ፓራዋንቱ ቂሳሪያ ጌሊዴ፥ ዳቢዳቢያ ጋዲያ ሞዲያዎ ኢሚዴ፥ ጳዉሎሳ ኣ ሲንꬃ ኣꬄዲኖ።

³⁴ ጋዲያ ሞዲያዌ ዳቢዳቢያ ናባቤዳዋፔ ጉዪያን፥ ጳዉሎሲ ሃቃ ኣዉራጃ ኣሴንቶ ኣ ኦቼዳ፤ ኪልቂያ ኣሳ ኢ ጊዴዳዋ ኤሬዳ ዎዴ፥

³⁵ «ታኒ ኔባ ኔና ሞቲያዋንቱ ዪያ ዎዴ ሲሳና» ያጊዴ፥ ዎታዳራቱ ሄሮዲሳ ካዉቴꬃ ጎሌን ኣ ናጋና ማላ ኣዛዜዳ።

⁷ Phawuloosi hewaa yaagina, Parisaawatuwaa giddoninne Saduqaawanatuwaa giddon walassay kesina, shiiqeedda asay laaletteedda.

⁸ Ayissi gooppe, Saduuqaawanatuu, “Hayqqeedda asay denddenna; kiitanchchaykka ayyaanaykka baawa” yaageeddino; Parisaawatuu qassi laa77uukka de7iyaawaa ammaniino.

⁹ Wolqqaama walassay denddeedda; Parisaawatuwaa baggappe Muse higgiyaa tamaarssiyaawanttu denddi eqqiide, “Ha bitaniyaa bolla aynne balaa demmibeykko; aw ayyaanay woy kiitanchchay haasayennan aggenna” yaagiide palumetteeddino.

¹⁰ Walassay darina, olaa kaappuu Phawuloosa unttunttu menthereethanenttonne gi yayyiide, bare wottaaddaratuu wodhdhiide, unttunttu giddoppe A ellekka kesiide, barenttu de7iyaasaa afana mala azazeedda.

¹¹ He qamma Goday Phawuloosa matan eqqiide, “Phawuloosaa, neeni taw Yeerusalaamen markkatteeddawaadan, Roomenkka markkattanaw bessee; minna; aynne baawa” yaageedda.

¹² Wonttissa gallassi, Ayihudatuu Phawuloosa wodhana gakkanaassi, meennaadaaninne ushennaadan, caaqettiide giigetteeddino.

¹³ Phawuloosa bolla hewaa maqqetteedda asatuu oytamuwaappe dariino.

¹⁴ Unttunttu qeesatuwaa kaappatuwakkonne cimatuwaakko yiide, “Nuuni Phawuloosa wodhana gakkanaassi, aynne baarennaadan, giigetti utteeddo.

¹⁵ Hewaa diraw, hinttenttunne shiiqeedda asay Phawuloosabaa geeshshiide biddiyaawaa malatiide, olaa kaappuu A hinttenttukko duge wothana mala oochchite; nuuni I haa shiiqanaappe kasenna A wodhanaw giigi utteeddo” yaageeddino.

¹⁶ Shin Phawuloosa michchatti na7ay he maqquwaa siseedda wode, biide wottaaddaratuu de7iyaasaa geliide, Phawuloosaw odeedda.

¹⁷ Phawuloosi xeetatuwaa kaappatuwaappe ittuwaa xeesiide, “Ha na7aa olaa kaappuwaakko afa; ayissi gooppe, olaa kaappuwaassi I odiyaawe de7ee” yaageedda.

¹⁸ Hewaa diraw, xeetatuwaa kaappuu na7aa olaa kaappuwaakko afiide, “Qasho gollen de7iyaa Phawuloosi, ha na7ay new ayentto odiyaabay de7iyaa diraw, taana barekko xeesiide, A neekko ahanaadan, taana woosseedda” yaageedda.

¹⁹ Olaa kaappuu na7aa kushiyaa oyqqiide, dumma gaxaa kessiide, “Neeni taw odanabay ayee?” yaagiide oochcheedda.

²⁰ Na7ay olaa kaappuwaassi, “Ayihudatuu Phawuloosabaa kaseppe minissi oochchiyaawaa malatiide, neeni shiiquwaa A utissanaadan, neena wontti woossanaw zoretaa qachcheeddino.

²¹ Shin neeni unttunttu giyaawaa sisoppa; ayissi gooppe, oytamuwaappe dariya asatuu Phawuloosa wodhana gakkanaassi, qumaa meennaadaaninne haathaa ushennaadan, caaqettiide geemetti uttiide A naagiino; neeni giyaawaa sisanaw ha77ikka giigetti uttiide naagiino” yaageedda.

²² Hewaa diraw, olaa kaappuu na7aa, “Ha yewuwaa neeni taana erisseeddawaa oossinne odoppa” yaagiide azazeeddawaappe guyyiyan, A yeddeedda.

²³ Olaa kaappuu xeetatuwaa kaappatuwaappe laa77uwaa xeesiide, “Qiisaariyaa baanaw, laa77u xeetu wottaaddaratuwaa, laappun tammu paraa oyqqeedda asatuwaanne laa77u xeetu tooranchchatuwaa qammaappe heezzu saatiyaan giigissite;

²⁴ gadiyaa mooddiyaa Filikisakko Phawuloosa sarotethaan gathanaw togissiyaa mehiyaanne giigissite” yaagiide, unttuntta azazeedda.

²⁵ Olaa kaappuu hawaadan giyaa dabidaabbiyaa xaafeedda.

²⁶ “Qalawudeyoosa Luusiyoosappe; gadiyaa mooddiyaa bonchchetteedda Filikisaa! Sarotethay new gido.

²⁷ Ayihudatuu ha bitaniyaa oyqqiide wodhana hanishshin, Roome katamaa asa I gideeddawaa eraade, wottaddaratuwaanna gakkaade A ashshaaddi.

²⁸ Unttunttu A ayissi mooteeddinontto eranaw koyyaade, duge unttunttu shiiquwaassi A afaaddi.

²⁹ Unttunttu barenttu higgiyaabaa I oochcheeddawaassi A mooteeddawaappe attin, A wodhissiyaa woy qashissiyaa mooto gidenna.

³⁰ Unttunttu ha bitaniyaa bolla maqqetti utteedda zigirissay taana gakkina, taani he man77iyankka A neekko yeddaa aggaaddi; A mootiyaawanttukka biide, ne sinthan mootana mala odaaddi; saro de7a” yaageedda.

³¹ Hewaa diraw, wottaaddaratuu azazetteeddawaadankka Phawuloosa akkiide, qamma Anttiphaaxiriisa gatheeddino.

³² Wonttissa gallassi aananna baana mala paraa toggo asatuwaa wothiide, gediyaan biyaawanttu guyye wottaaddaratuu de7iyaasaa simmeeddino.

³³ Paraawanttu Qiisaariyaa geliide, dabidaabbiyaa gadiyaa mooddiyaawoo immiide, Phawuloosa A sintha aatheeddino.

³⁴ Gadiyaa mooddiyaawe dabidaabbiyaa nabbabeeddawaappe guyyiyan, Phawuloosi haqa awuraajjaa asentto A oochcheedda; Kilqqiyaa asa I gideeddawaa ereedda wode,

³⁵ “Taani nebaa neena mootiyaawanttu yiyaa wode sisana” yaagiide, wottaaddaratuu Heroodisa kawutethaa gollen A naagana mala azazeedda.