ዬሱሲ ኪቴዳዋንቱ ኦሱዋ 17:2-18 in Dawro

² ጳዉሎሲ ባሬ ዶያዳንካ ያ ጌሌዳ፤ ሄዋን ሄዙ ሳምባታ ጋላሳቱዋን ፆሳ ማፃፋቱዋፔ ኣሳና ሃሳዬዳ፤

³ ኪሪስቶሲ ዋዪያ ኣካናዉኔ ሃይቁዋፔ ዴንዳናው ቤሲያዋ ኡንቱንቶ ቢሊዴ ኦዲዲኔ ቱማ ጊዴዳዋካ ኡንቱንታ ኤሪሲዴ፥ «ዬሱሲ ሃ ታኒ ሂንቴንቶ ኦዲያዌ ኪሪስቶሳ» ያጌ።

⁴ ኡንቱንቱፔ ኢቱ ኢቱ ዬዉ ቱማ ጊዴዳዋ ኣኬኪዴ፥ ጳዉሎሳናኔ ሲላሴና ጋኬቴዲኖ፤ ሃዋዳንካ፥ ፆሳሲ ጎዪኒያ ጮራ ጊሪኬ ኣሳይኔ ጮራ ቦንቼቴዳ ማጫዋንቱ፥ ጳዉሎሳናኔ ሲላሴና ጋኬቴዲኖ።

⁵ ሺን ኣዪሁዳቱ ቃናቲዴ፥ ኢቲ ኢቲ ኦሱ ባዪና ኢታ ኣሳቱዋ ቆጫፔ ሺሺዴ ካታማ ኣሳ ዋላሴዲኖ፤ ጳዉሎሳኔ ሲላሳ ኣሳኮ ኬሳና ማላ ኮዪዴ፥ ያሶና ጎሊያ ዶዴዲኖ።

⁶ ጳዉሎሲኔ ሲላሴ ኡንቱንቶ ቤቴናን ኢፂና፥ ያሶናኔ ኢቲ ኢቲ ኢሻቱዋ ካታማ ካፓቱዋኮ ኣፊዴ፥ «ሃዋንቱ ጋዲያ ኡባ ሜቶꬄዳዋንቱ፥ ሃዋካ ዬዲኖ።

⁷ ያቲና ያሶኒ ኡንቱንታ ባሬ ሶዪን ዎꬄዳ፤ ሃዋንቱ ኡባይ፥ ‹ዬሱሳ ጊያ ሃራ ካቲ ዴዔ› ጊዴ ቄሳሬ ኣዛዙዋ ሚኒሲኖ» ያጊዴ፥ ኮሻ ꬎቂሲዴ ሃሴዬዲኖ።

⁸ ሺቄዳ ኣሳይኔ ካታማ ካፓቱ ሄዋ ሲሲዴ ሜቶቴዲኖ።

⁹ ካፓቱ ያሶናኔ ሃራቱዋ ዋሲያን ቢሌዲኖ።

¹⁰ ኣማኒያዋንቱ ጳዉሎሳኔ ሲላሳ ሳዓይ ቃሚያዋኒ ኤሌካ ቤሪያ ዬዴዲኖ። ያ ጋኪዴ፥ ኣዪሁዳ ዎሳ ጎሌ ጌሌዲኖ።

¹¹ ቤሪያ ኣሳቱ ቴሴሎንቄን ዴዒያ ኣሳቱዋፔካ ኣꬊ ዶዬቶ ዎዛናይ ዴዒያ ዲራው፥ «ጳዉሎሲ ጌዳዌ ቱሜንቶኔ» ያጊዴ፥ ኡባ ጋላሲ ፆሳ ማፃፋቱዋ ታማሪዴ፥ ቃላ ኩሜንꬃ ላሞታን ኣኬዲኖ።

¹² ሄዋ ዲራው፥ ኡንቱንቱፔ ጮራቱ፥ ጊሪካቱዋፔ ቦንቼቴዳ ጮራ ማጫዋንቱኔ ጮራ ኣቱማ ኣሳቱ ኣማኔዲኖ።

¹³ ሺን ቴሴሎንቄን ዴዒያ ኣዪሁዳቱ ጳዉሎሲ ፆሳ ቃላ ቤሪያንካ ኦዴዳዋ ሲሴዳ ዎዴ፥ ቤሪያ ዪዴ፥ ኣሳ ኣናና ዋላሴዲኖ።

¹⁴ ሄዋፔ ጉዪያን፥ ኢሻቱ ኤሌካ ጳዉሎሳ ኣባ ማታን ዬዲ ኣጌዲኖ፤ ሺን ሲላሴኔ ፂሞቶሴ ቤሪያን ኣቴዲኖ።

¹⁵ ጳዉሎሳ ሞዪዜዳ ኣሳቱ ኣቴና ጋꬄዲኖ፤ ሄ ኣሳቱ ሲላሴኔ ፂሞቶሴ ባሬንቶ ዳንዳዬቴዳዋዳን፥ ኤሌካ ባሬኮ ያና ማላ፥ ጳዉሎሲ ኪቴዳ ኪታ ኣኪዴ፥ ቤሪያ ሲሜዲኖ።

¹⁶ ጳዉሎሲ ኣቴናን ሲላሳኔ ፂሞቶሳ ናጊዴ፥ ካታማን ኤቃይ ኩሜዳዋ ቤዒዴ ዪሎቴዳ።

¹⁷ ሄዋ ዲራው፥ ኣዪሁዳ ዎሳ ጎሊያን ኣዪሁዳቱዋናኔ ፆሳሲ ጎዪኒያ ኣዪሁዳ ጊዴና ኣሳቱዋና ፓሉሜቴ፤ ቃሲ ኡባ ጋላሲ ጌያን ባሬናና ጋኬቲያ ኣሳናካ ፓሉሜቴ።

¹⁸ ቃሲ ኤፒቆሮሳፔኔ ኢስፆዒኪያፔ ዬዳ ኢቲ ኢቲ ኤራንቻቱ ጳዉሎሳና ፓሉሜቴዲኖ፤ ኡንቱንቱፔ ኢቱ ኢቱ፥ «ሃ ቶፊናይ ኣያ ሃሳያናው ኮዪ?» ያጌዲኖ። ሃራቱ ጳዉሎሳ ዬሱሳባኔ ሃይቁዋፔ ኢ ዴንዴዳዋ ባሬንቶ ኦዲያ ዲራው፥ «ኦራꬃ ፆሳቱባ ኦዲያዋ ማላቴ» ያጌዲኖ።

² Phawuloosi bare dooyaadankka yaa geleedda; hewaan heezzu Sambbata gallassatuwan Xoossaa Maxaafatuwaappe asaanna haasayeedda;

³ Kiristtoosi waayyiyaa akkanawunne hayquwaappe denddanaw bessiyaawaa unttunttoo billiide odiiddinne tuma gideeddawaakka unttuntta erissiidde, “Yesuusi ha taani hinttenttoo odiyaawe Kiristtoosa” yaagee.

⁴ Unttunttuppe ittu ittuu yewuu tuma gideeddawaa akeekiide, Phawuloosannanne Sillaasenna gaketteeddino; hawaadankka, Xoossaassi goyinniyaa cora Giriike asaynne cora bonchchetteedda maccawanttu, Phawuloosannanne Sillaasenna gaketteeddino.

⁵ Shin Ayihudatuu qanaatiide, itti itti oosuu bayinna iita asatuwaa qocaappe shiishshiide katamaa asaa walasseeddino; Phawuloosanne Sillaasa asaakko kessana mala koyyiide, Yaasoona golliyaa dooddeeddino.

⁶ Phawuloosinne Sillaase unttunttoo beettennaan ixxina, Yaasoonanne itti itti ishatuwaa katamaa kaappatuwaakko afiide, “Hawanttu gadiyaa ubbaa metootheeddawanttu, hawaakka yeeddino.

⁷ Yaatina Yaasooni unttuntta bare soyin wotheedda; hawanttu ubbay, ‘Yesuusa giyaa hara kaatii de7ee’ giide Qeesaare azazuwaa minissiino” yaagiide, kooshshaa dhoqqisside haaseyeeddino.

⁸ Shiiqeedda asaynne katamaa kaappatuu hewaa sisiide metooteeddino.

⁹ Kaappatuu Yaasoonanne haratuwaa waasiyan billeeddino.

¹⁰ Ammaniyaawanttu Phawuloosanne Sillaasa sa7ay qammiyaawaani ellekka Beeriyaa yeddeeddino. Yaa gakkiide, Ayihuda woosa golle geleeddino.

¹¹ Beeriyaa asatuu Teselonqqen de7iyaa asatuwaappekka aadhdhi dooyetto wozanay de7iyaa diraw, “Phawuloosi geeddawe tumenttonne” yaagiide, ubba gallassi Xoossaa Maxaafatuwaa tamaariidde, qaalaa kumentha laamotaan akkeeddino.

¹² Hewaa diraw, unttunttuppe coratuu, Giriikatuwappe bonchchetteedda cora maccawanttunne cora attuma asatuu ammaneeddino.

¹³ Shin Teselonqqen de7iyaa Ayihudatuu Phawuloosi Xoossaa qaalaa Beeriyankka odeeddawaa siseedda wode, Beeriyaa yiide, asaa aananna walasseeddino.

¹⁴ Hewaappe guyyiyan, ishatuu ellekka Phawuloosa abbaa mataan yeddii aggeeddino; shin Sillaasenne Ximootoose Beeriyan atteeddino.

¹⁵ Phawuloosa moyizzeedda asatuu Ateenaa gatheeddino; he asatuu Sillaasenne Ximootoose barenttoo danddayetteeddawaadan, ellekka barekko yaana mala, Phawuloosi kiitteedda kiitaa akkiide, Beeriyaa simmeeddino.

¹⁶ Phawuloosi Ateenaan Sillaasanne Ximootoosa naagiidde, katamaan eeqay kumeeddawaa be7iide yiloteedda.

¹⁷ Hewaa diraw, Ayihuda woosa golliyaan Ayihudatuwannanne Xoossassi goyinniyaa Ayihuda gidenna asatuwaanna palumettee; qassi ubba gallassi geyaan barenanna gakettiyaa asaannakka palumettee.

¹⁸ Qassi Eppiqoroosappenne Isxxo7ikiyaappe yeedda itti itti eranchchatuu Phawuloosanna palumetteeddino; unttunttuppe ittu ittuu, “Ha toofiinay ayaa haasayanaw koyyii?” yaageeddino. Haratuu Phawuloosa Yesuusabaanne hayquwaappe I denddeeddawaa barenttoo odiyaa diraw, “Ooratha xoossatubaa odiyaawaa malatee” yaageeddino.