ዬሱሲ ኪቴዳዋንቱ ኦሱዋ 12:2-18 in Dawro

² ዮሃኒሳ ኢሻ ያዪቆባ ማሻን ዎꬊሴዳ።

³ ሄዌ ኣዪሁዳቱዋ ናሼቼዳዋ ቤዒዴ፥ ጉጂ ጴፂሮሳካ ኦይቄዳ፤ ሄዌ ማጋጌ ኡኪꬃ ባላ ቦንቺያ ጋላሳቱዋና።

⁴ ጴፂሮሳ ኦይቂዴ ቃቼዳ። ፓሲጋ ባላ ቦንቺያ ጋላሳቱዋፔ ጉዪያን፥ ጋዴ ኣሳ ሲንꬃ ኣꬃናው ቆፒዴ፥ ኦይዱ ኦይዱ ዎታዳራቱ ኣ ናጋናዳን፥ ታማኔ ኡሱፑን ዎታዳራቱዋሲ ኣꬂዴ ኢሜዳ።

⁵ ሄዋ ዲራው፥ ጴፂሮሲ ቃሾ ጎሊያን ናጌቴ፤ ሺን ዎሳ ጎሌ ኣሳይ ኣው ሚኒሲዴ ፆሳ ዎሴ።

⁶ ሄሮዲሴ ጴፂሮሳ ኣሳ ሲንꬃ ኣꬃናው ቆፓናፔ ካሴ ቃማ፥ ጴፂሮሲ ላዑ ሳንꬃላታን ቃሼቲዴ፥ ላዑ ዎታዳራቱዋፔ ጊዱዋን ጌሚዒሼዳ፤ ናጊያዋንቱካ ቃሾ ጎሌ ፔንጊያን ኤቂዴ ናጊኖ።

⁷ ኣኬኬናን ዴዒሺን፥ ጎዳ ኪታንቻይ ሄዋን ኤቂ ኣጌዳ፤ ቃሾ ጎሌንካ ፖዑ ፖዒ ኣጌዳ። ኪታንቻይ ጴፂሮሳ ሚዪያ ዴቺ ቤጎꬂዴ ኣ፥ «ኤሌ ዴንዳ» ያጌዳ፤ ሄ ማንዒያንካ ሳንꬃላታይ ኣ ኩሺያፔ ዎꬊ ኣጌዳ።

⁸ ኪታንቻይ ኣ፥ «ኔ ሱሪያ ዳንጫ፤ ኔ ጫማካ ዎꬃ» ያጊና፥ ጴፂሮሲ ሄዋዳን ኦꬄዳ፤ ኪታንቻይ፥ «ኔ ማዩዋ ማያዴ ታና ካላ» ያጌዳ።

⁹ ጴፂሮሲ ቃሾ ጎሊያፔ ኬሲዴ፥ ኪታንቻ ካሌዳ፤ ኣው ሳፃ ቤዒያዋ ማላቴዳፔ ኣቲን፥ ኪታንቻይ ኦꬂያባይ ቱማ ጊዴዳዋ ኤሪቤና።

¹⁰ ኪታንቻይኔ ጴፂሮሲ ኮይሮ ዎታዳራፔኔ ላዔንꬆ ዎታዳራፔ ኣꬊዴ፥ ካታማ ኣፊያ ቢራታ ፔንጊያኮ ጋኬዲኖ፤ ፔንጊካ ኡንቱንቶ ባሬካ ዶዬቲ ኣጌዳ፤ ኡንቱንቱ ኬሲዴ ኢቲ ኦጊያና ቢሺን፥ ኪታንቻይ ኤሌካ ጴፂሮሳፔ ሻኬቲ ኣጌዳ።

¹¹ ጴፂሮሲ ባሬና ጋኬዳባ ኣኬኪዴ፥ «ታና ጎዳይ ባሬ ኪታንቻ ኪቲዴ፥ ሄሮዲሳ ኩሺያፔኔ ኣዪሁዳ ኣሳይ ናጊ ኡቴዳ ኡባባፔ ኣሼዳዋ ሃዒ ቱሙ ኤራዲ» ያጌዳ።

¹² ኢ ሄዋ ኣኬኬዳ ዎዴ፥ ጮራ ኣሳይ ኢቲፔ ሺቂዴ ፆሳ ዎሲያሳ፥ ማርቆሳ ጊያ ዮሃኒሳ ዳዪ ማይራሚ ሶይ

¹³ ቢዴ ፔንጊያን ፄሲና፥ ኢቲ ሮዶ ጊያ ኣሺካራታ ዶያናው ያዱ።

¹⁴ ሮዳ ጴፂሮሳ ቃላ ጊዴዳዋ ኤሬዳ ዎዴ፥ ባሬና ናሼቺና፥ ፔንጊያ ዶዬናን ጉዬ ዎፃዴ፥ ጴፂሮሲ ካሬን ኤቄዳዋ ኣሳሲ ኦዳዱ።

¹⁵ ኣሳይ ኢዞ፥ «ሃኔ፥ ኔኒ ጎያ» ያጌዳ። ሮዳ ጴፂሮሳ ጊዴዳዋ ጌሻዴ ኦዳዱ። ኡንቱንቱ፥ «ሄዌ ኣ ኪታንቻ» ያጌዲኖ።

¹⁶ ሺን ጴፂሮሲ ካሬን ፄሲዴ ኣጌናን ኢፂና፥ ኣሳይ ካሪያ ዶዪ፥ ኣ ቤዒዴ ማላሌቴዲኖ።

¹⁷ ሺን ኡንቱንቱ ጮዑ ጋና ማላ፥ ጴፂሮሲ ባሬ ኩሺያን ፆርሲዴ፥ ጎዳይ ቃሾ ጎሊያፔ ኣ ዎቲ ኬሴዴንቶ፥ ኡንቱንቶ ቆንጪሲ ኦዲዴ፥ «ሃዋ ያዪቆባሲኔ ኢሻቱዋሲ ኦዲቴ» ጊዴ፥ ኬሲ ሃራሳ ቤዳ።

¹⁸ ሳዓይ ዎንቴዳ ዎዴ፥ ጴፂሮሲ ሃቃ ቢዲጌዴንቶ ጊና ዎታዳራቱዋ ጊዶን ዳሮ ዋላሳይ ኬሴዳ።

² Yohaannisa ishaa Yayiqooba mashshaan wodhisseedda.

³ Hewe Ayihudatuwaa nashechcheeddawaa be7iide, gujji Phexiroosakka oyqqeedda; hewe Maagage Ukithaa Baalaa bonchchiya gallassatuwana.

⁴ Phexiroosa oyqqiide qachcheedda. Paasigaa Baalaa Bonchchiya gallassatuwaappe guyyiyan, gade asaa sintha aathanaw qoppiide, oyddu oyddu wottaaddaratuu A naaganaadan, tammanne usuppun wottaaddaratuwaassi aathiide immeedda.

⁵ Hewaa diraw, Phexiroosi qasho golliyaan naagettee; shin woosa golle asay aw minissiide Xoossaa woossee.

⁶ Heroodise Phexiroosa asaa sintha aathanaw qoppanaappe kase qamma, Phexiroosi laa77u santhalataan qashettiide, laa77u wottaadaratuwaappe gidduwan gemi77isheedda; naagiyaawanttukka qasho golle penggiyaan eqqiide naagiino.

⁷ Akeekennaan de7ishshin, Godaa kiitanchchay hewaan eqqi aggeedda; qasho gollenkka poo7uu poo7ii aggeedda. Kiitanchchay Phexiroosa miyyiyaa dechchi beegothiide A, “Elle dendda” yaageedda; he man77iyankka santhalatay A kushiyaappe wodhdhii aggeedda.

⁸ Kiitanchchay A, “Ne suriyaa dancca; ne caammaakka wotha” yaagina, Phexiroosi hewaadan ootheedda; kiitanchchay, “Ne mayuwaa mayyaade taana kaalla” yaageedda.

⁹ Phexiroosi qasho golliyaappe kesiide, kiitanchchaa kaalleedda; aw saxaa be7iyaawaa malateeddappe attin, kiitanchchay oothiyaabay tuma gideeddawaa eribeenna.

¹⁰ Kiitanchchaynne Phexiroosi koyro wottaaddaraappenne laa7entho wottaaddaraappe aadhdhiide, katamaa afiyaa birataa penggiyaakko gakkeeddino; penggiikka unttunttoo barekka dooyetti aggeedda; unttunttu kesiide itti ogiyaanna biishshin, kiitanchchay ellekka Phexiroosappe shaaketti aggeedda.

¹¹ Phexiroosi barena gakkeeddabaa akeekiide, “Taana Goday bare kiitanchchaa kiittiide, Heroodisa kushiyaappenne Ayihuda asay naagi utteedda ubbabaappe ashsheeddawaa ha77i tumu eraaddi” yaageedda.

¹² I hewaa akeekeedda wode, cora asay ittippe shiiqiide Xoossaa woossiyaasaa, Marqqoossa giyaa Yohaannisa dayi Mayraami soy

¹³ biide penggiyaan xeesina, itti Roodo giyaa ashikkaratta dooyyanaw yaaddu.

¹⁴ Rooda Phexiroosa qaalaa gideeddawaa ereedda wode, barena nashechchina, penggiyaa dooyyennan guyye woxxaadde, Phexiroosi karen eqqeeddawaa asaassi odaaddu.

¹⁵ Asay izo, “Hanne, neeni gooyaa” yaageedda. Rooda Phexiroosa gideeddawaa geeshshaade odaaddu. Unttunttu, “Hewe A kiitanchchaa” yaageeddino.

¹⁶ Shin Phexiroosi karen xeesiide aggennaan ixxina, asay kariyaa dooyyi, A be7iide maalaletteeddino.

¹⁷ Shin unttunttu co77u gaana mala, Phexiroosi bare kushiyan xorssiide, Goday qasho golliyaappe A wooti kesseeddentto, unttunttoo qonccissi odiide, “Hawaa Yayiqoobassinne ishatuwaassi odite” giide, kesi harasaa beedda.

¹⁸ Sa7ay wontteedda wode, Phexiroosi haqa bidiggeeddentto giina wottaaddaratuwaa giddon daro walassay keseedda.