17 U mpyi a jwo na Kile à jwo: “Diɲyɛŋi canzanɲyi ká nɔ, mii sí na Munaani pyi li tîge sùpyire puni ɲuŋ'i. Yii nàɲjiipyire ná yii pùceepyire sí raa Kile tùnnture yu. Mii sí naye cyêe yii nàɲjiibii na, si karigii yyaha cyêe pi na. Yii nàŋkolyeebii sí raa mii karigii ɲaa ŋɔɔyi i.
18 Sèe wi, cyire canmpyaagil'e, mii sí na Munaani pyi li tîge mii bilinambaabii ná mii bilicyeebii ɲuŋ'i. Pi sí n‑pyi mii tùnntunmii.
19 Mii sí kakyanhala yaayi yà pyi yi fworo nìɲyiŋi na, si kakyanhala kacyeeŋkii cyìi yaa ɲìŋke na, sìshange ná nage ná ŋguruge sí n‑pyi.
20 Canŋaɲyiini sí n‑kɛ̂ɛnŋɛ n‑pyi numpire. Yiŋke sí ɲáaŋa mu à jwo sìshan. Cyire puni kàntugo, Kafooŋi canmbilini sí nɔ. Li sí n‑pyi canmbwɔhɔ, sí n‑pyi canmbile ndemu sìnampe sí n‑pêe ke.
21 Ɲyɛ shin maha shin u ɲyɛ na Kafooŋi mɛge yiri ke, urufoo sí n‑shwɔ.”»
22 Ɲyɛ Pyɛri à kwɔ̀ Zhowɛli jwumpe niɲjwumpe na ke, maa núr'a jwo: «Yii, Izirayɛli shiinbii, yii niŋgyigigii pɛrɛ, yii raa núru. Yii à li cè na Nazarɛti kànhe shinŋi Yesu na mpyi sùpya, ŋgemu cye kurugo Kile à u fànhe cyêe yii na ná kabwɔhigii ná kakyanhala karigii ná kacyeeŋkii mpyiŋi i yii shwɔhɔl'e ke.
23 Ŋka nde Kile mpyi a yaa mà yyaha tíi ná u e, mà tàanna ná u karigii puni ɲcèŋi i ke, lire yii à pyi. Yii à u le shinpiibii cye e pi à kwòro cige na mà bò.
24 Ŋka Kile à u ɲùŋɔ wwû kwùŋi yapwoyi i, maa u ɲɛ̀ a yige kwùŋi i. Ɲaha kurugo yɛ li fànhe mpyi kwùŋi na u jà a u cû a yaha wani mɛ.
25 Saanŋi Dawuda à fyânha a jwo u kyaa na, u mpyi a jwo: “Mii maha na Kafooŋi ɲaa naye taan tèrigii puni i, ɲaha na yɛ u maha mpyi mii kàniŋke na, bà li si mpyi yaaga kà n‑jà mii cúnŋɔ ɲjîrige na tayyérege e mɛ.
26 Lire kurugo mii zòmbilin'à ɲî funntange na, mii jwumpe puni sí ɲyɛ funntanga jwumɔ. Mii à tɛ̀ɛn ná l'e, ali mii kwuŋkwooni kàntugo, mii cyeere sí ɲíŋɛ mii na.
27 Ɲaha kurugo yɛ Kafooŋi, mu sì ɲɛɛ mii múnaani yaha li kwôro kwùŋi numpini i mɛ. Mu mú sì ɲɛɛ ma báarapyiŋi niɲcɛnŋi yaha u fwɔ́nhɔ fanŋke e mɛ.
28 Mu à nùmpanŋke tata kuni le mii taan Mà mu yaha ná mii i, mu sí mii pyi mii i ɲî funntange na.”»
29 Ɲyɛ Pyɛri à kwɔ̀ Dawuda jwumpe niɲjwumpe na ke, maa núr'a jwo: «Mii cìnmpyiibii, yii na yaha si wuu tulyage Dawuda kani fíniŋɛ ɲjwo yii á. Tèni i u à mpe jwumpe jwo ke, u mpyi a pu jwo a wà uye na mɛ, ɲaha kurugo yɛ wuu à li cè na u à kwû, u buwuŋ'à tò. Ali niɲjaa u kwùunni na ɲyɛ naha wuu yyére.
