19 Kalɨpsigwan oman amɨn kabɨgo tagɨsi do dɨpmɨn yolɨgɨl, aŋek yaŋ yoyɨgɨl, “Nak da emat amɨn tagɨsi kɨnda kɨlɨ manjɨgɨm. Nak da mɨŋat amɨnyo da binapmon naŋ kɨla amɨn madep egɨpjak do abɨdagɨm. Aŋek kɨla amɨn madep dakon pelɨt kɨnda busuŋɨkon yɨpmaŋ ɨmgum.
20 Nak da oman amɨno Dewit kɨlɨ manjɨgɨm, aŋek yɨpbo ji dakon kɨla amɨn madep dagagɨt.
21 Nak tapmɨmno yɨpbo uŋun gat toktogɨsi egɨpdamal. Nak dakon tapmɨm da aban teban tokdɨsak.
22 Uwalni da emaron arɨpmɨ dɨma abɨŋ yɨpni. Ae amɨn yokwi da arɨpmɨ dɨma abɨŋ yɨpni.
23 Nak da uwalni bamaŋ yomdɨsat, aŋek amɨn nandaba yokwi taŋ ɨmni amɨn dapbo kɨmotdaŋ.
24 Nak da but dasi galak taŋ ɨmɨŋ kɨmagek uŋun gat toktogɨsi egɨpdɨsat. Uwal gat emat wamni bɨsapmon nak da aŋpulugaŋapbo pabɨŋ yopdɨsak.
25 Nak da mɨktɨmni abo tap ɨdap Mediterenian uŋudon da wasaŋek kɨŋ pakbi madep Yupretis da arɨpmon kɨkdɨsak.
26 Aŋek Dewit da yaŋ nayɨkdɨsak, ‘Gak Datno ae Piŋkopno. Gak da tɨp tebano egek toktogɨsi aŋpulugosol.’
27 Nak da manjɨko monjɨno mibɨltogɨ dagosak, ae kɨla amɨn madep mibɨltogɨ dagaŋek mɨktɨmon kɨla amɨn madep morap yapmaŋ mudosak.
28 Nak toktogɨsi but dasi galak taŋ ɨmɨŋ kɨmotdɨsat. Aŋek uŋun gat saŋbek saŋbek aŋapdo saŋbek saŋbek uŋun toktok teban taŋ wɨgɨkdɨsak.
29 Toktogɨsi uŋun da kabɨkon kɨnda da kɨla amɨn madep egɨ egɨ akdɨsak. Kundu da toktogɨsi tosok uŋun da tɨlak, uŋun da kabɨkon kɨla amɨn madep kɨnda da toktogɨsi Israel amɨn kɨla akdɨsak.
30 “Mani babɨni kabɨ nawa geno pabɨŋ yopni, ae nak dakon gen dɨma yolni kaŋ,
31 bo ae geno do manji ɨmɨŋek gen tebano dɨma guramɨtni kaŋ,
32 yokwini do nandaŋek baljokdɨsat.
33 Mani uŋun bɨsapmon kɨsi nak Dewit but dasi galak taŋ ɨmdɨsat. Aŋek dɨma yɨpmaŋ dekgeŋ, ae uŋun do yaŋ teban tok agɨm uŋun dɨma aŋsuŋ abeŋ.
34 Nak uŋun gat saŋbek saŋbek agɨmak dɨma kɨrɨŋɨkgeŋ, ae geno kulabɨk kɨnda dɨma abeŋ.
35 Nak Dewit do yaŋ teban tok agɨm. Nak telagɨsi, do top dɨmasi yosot.
36 Babɨkni kabɨ toktogɨsi egɨ wugɨkdaŋ. Gɨldat da tosok uŋun da tɨlak uŋun dakon dɨwatni da mɨŋat amɨnyo bɨsap dubagɨ kɨla akdaŋ.
37 Kanek da kundukon tosok, uŋun da tɨlak toktogɨsi yaŋ egɨ wɨgɨkdaŋ.” Uwal da kɨla amɨn madep abɨŋ yɨpgwit bɨsapmon kunam takgwit
38 Mani abɨsok kɨla amɨn madep manjɨgɨl uŋun do butjap nandaŋ ɨmɨsal. Kɨlɨ yɨpmaŋ dekgɨl, aŋek manji ɨmgul.
39 Oman amɨngo gat saŋbek saŋbek agɨmal uŋun paŋdagagɨl. Gak da kɨla amɨn madep pelɨtni mabɨ mɨktɨmon maŋek yo ɨsalɨ agɨt.
40 Gak da kokup papni dakon dam kɨlɨ tuwɨlgɨl. Yutni tebaisi uŋun kɨlɨ tasɨk tawit.
41 Mɨŋat amɨn morap kapmatjok akwaŋ uŋun da yo kabɨni kabo tɨmɨkgaŋ. Ae amɨn kapmatjok ekwaŋ da yaŋsul aŋ ɨmaŋ.
42 Gak da yum pɨndagaki uwal da emaron abɨŋ yɨpgwit. Yaŋ aŋyomɨŋaki kɨsɨk kɨsɨk awit.
43 Gak da abɨ emat amɨni emaron dɨma teban tawit, aŋek emat bɨsapmon dɨma aŋpulugagɨl.
44 Gak da abɨŋ yɨpgul da kɨla amɨn madep saŋbeŋek dɨma egɨsak, ae saŋbeŋek mɨŋat amɨnyo kɨla dɨma asak.
45 Gak da abɨ amɨn pelaŋ tepmɨsi asak, aŋek mayaktok madepsi da wutjɨŋ ɨmɨsak.
46 Yawe, gak bɨsap niaŋ da pasɨldɨsal? Toktogɨsi, ma? Bɨsap niaŋ da butjapgo kɨndap da yaŋ tebai sosak?
47 Yawe, nin bɨsap pɨsɨpmɨsok gɨn ekwamaŋ, do nandaŋ nibi. Gak da nin wasagɨl, mani mibɨlɨ mɨni ekwamaŋ da kɨmak mudokdamaŋ.
48 Namɨn da toktogɨsi egek arɨpmɨ dɨma kɨmotjak? Namɨn da tebaisi egek kɨmakbi tamokon arɨpmɨ dɨma kɨsak? Amɨn kɨnda mɨnisi.
49 Amɨn Tagɨ abɨsok nin dɨma galak taŋ nimɨsal, ma? Dewit gat yaŋ teban tok aŋek nin but dasi galak taŋ nim do yagɨl uŋun niaŋɨ?
50 Amɨn Tagɨ, oman amɨngo nak do nandaki. Amɨn da nak do yaŋsul aŋ namaŋ. Amɨn Ŋwakŋwarɨ Kabɨ dakon manji gen yokwini dakon jɨgɨ ɨmekdat.
