1 Dewit dakon bɨsit kɨnda. Yawe, nak wadak wadak amɨn, do bɨsitno nandaŋek aŋpulugoki do nandɨsat.
2 Yokwikon naŋ abɨdaŋaki dɨma kɨmokgeŋ, nido nak gak naŋ goldat. Nak oman amɨngo, gak naŋ nandaŋ gadaŋ gamɨsat, do aŋpulugoki.
3 Amɨn Tagɨno, nak gɨldat kɨnda kaloŋ gak do bɨsit asat, do nak do bupmɨ nandaŋ nabi.
4 Amɨn Tagɨ, nak gak dogɨn bɨsit asat, do oman amɨngo nak do kɨsɨk kɨsɨk nabi.
5 Amɨn Tagɨ, gak tagɨsisi, dɨwarɨnin wɨrɨrɨk nimɨsal. Gak mɨŋat amɨnyo bɨsit gayaŋ uŋun but dasi galak taŋ yomɨsal.
6 Yawe, gak bɨsitno do mɨrak pakyaŋsi yopbi. Nak do bupmɨ nandaŋ nabi do yaŋ tɨdosot. Yaŋ ɨlɨtno nandaki.
7 Nak gak do yaŋ tɨdosot bɨsapmon aŋpulugosol, do jɨgɨ pakeŋ bɨsapmon gak do bɨsit abeŋ.
8 Amɨn Tagɨ, piŋkop gak yombem dɨ mɨni. Gak da kɨsi morap yapmaŋdal. Ae amɨn kɨnda da wasok tapmɨmɨ toŋ asal uŋudeŋ kɨnda arɨpmɨ dɨma asak.
