26 Amɨn dɨwarɨ yokwini dakon kobogɨ yomgul, amɨn yokwi da yokwi aŋ yom do pi sigɨn aŋ. Gak da amɨn dɨwarɨ dakon gɨptɨm paŋdagaŋek gɨptɨm tedep yomgul, amɨn yokwi da jɨgɨlak gen yaŋ yomɨŋek jɨgɨ yomaŋ.
27 Amɨn yokwi dakon yokwini do dɨma ɨŋtaŋ yobi. Uŋun amɨn dɨmasi paŋpulugoki.
28 Gak da egɨp egɨp papiakon mani wɨrɨrɨkgi. Ae amɨn kɨlegɨ dakon man gat kɨsi mani dɨma mandaki dosi nandɨsat.
29 Nak jɨgɨ tepmɨyo madepsi pasat. Piŋkop, gak da nak yokwikon naŋ abɨdaŋek nak aŋmɨlɨp abi.
30 Yaŋ aŋaki nak kap yaŋek Piŋkop dakon man awɨgɨkdɨsat. Aŋek ya yaŋ iyɨŋek man madepni do yaŋ teŋteŋok abeŋ.
31 Aŋapbo Yawe da aŋpak uŋun abeŋ do but dasi galak taŋ kɨmotjak. Bulmakau baŋ paret abeŋ uŋun do madepsi dɨma galak tosok.
32 Nak Piŋkop aŋkɨsikeŋ bɨsapmon mɨŋat amɨnyo jɨgɨ paŋ da uŋun kaŋek kɨsɨk kɨsɨk akdaŋ. Ae mɨŋat amɨnyo Piŋkop wɨsɨŋ kok do pi aŋ amɨn uŋun Piŋkop da butni paŋteban akdɨsak.
33 Yawe da yo do wadak wadak aŋ amɨn dakon bɨsitni nandaŋ yomɨsak. Mɨŋat amɨni dam tebanon ekwaŋ uŋun do dɨma ɨŋtaŋ yomɨsak.
34 Kundu gat ae mɨktɨm, ae tap ɨdap gat ae tap kɨlap ae yo morap tap kagagwan ekwaŋ, ji kɨsi morap Piŋkop dakon man awɨgɨni.
