11 Nak but yokwi dakon ɨmal pasat bɨsapmon, amɨn da manji gen yaŋ namaŋ.
12 Muwut muwut tamokon amɨn da nak do yaŋba yokwi tok aŋ. Ae pakbi teban naŋek but upbal aŋ amɨn da abɨŋ nep do kap yoŋ.
13 Mani Yawe, nak gak do bɨsit asat. Piŋkop gaga nandɨsal bɨsapmon bɨsitno dakon bamɨ uŋudon nabi. Gak nak do but dasi galak taŋ namɨsal, do asi pulugaŋ nep do yagɨl uŋun do nandaŋek bɨsitno dakon kobogɨ nabi.
14 Pulugaŋ nepmaŋaki neŋak kagagwan dɨma pɨgɨ pasɨlgeŋ. Nak do yaŋba yokwi tok aŋ namaŋ amɨn da kɨsiron baŋ pulugaŋ nepmaŋaki pakbi ɨlarɨgwan dɨma pasɨlgeŋ.
15 Yum nandaŋaki pakbi da ɨgek nak dɨma wɨtjisak, ae pakbi ɨlarɨgwan dɨma pɨgɨ pasɨlgeŋ. Yum nandaŋaki bumjot gapma da nak dɨma galautjak.
16 Yawe, gak bɨsapmɨ bɨsapmɨ but dasi galak taŋ namɨŋek yo tagɨsi aŋ namɨsal. Yaŋdo, bɨsitno dakon bamɨ nabi. Bupmɨgo uŋun madepsi, do abɨŋ aŋpulugoki.
17 Nak gak dakon oman monjɨgo. Pasɨlɨkon dɨma egɨ nabi. Nak jɨgɨkon egɨsat, do bɨsitno tepmɨsi nandaŋek bamɨ nabi.
18 Nak da kapmatjok abɨŋek yokwikon baŋ yumaŋ naŋ nepbi. Uwalno da kɨsiron naŋ pulugaŋ nepbi.
19 Uwalno nak do gen yokwi yoŋ uŋun gak da nandaŋaki nayaŋ. Mano abɨŋ yɨpmaŋakwa mayaktok pasat uŋun nandɨsal.
20 Gen yokwi uŋun yaŋ namaŋ uŋun do but yokwisi nandɨsat. Aŋek tapmɨmno mɨnisi asak. Amɨn dɨ da nak dakon but bo aŋteban ani yaŋ nandagɨm, mani dɨma. Ae amɨn dɨ da nak aŋteban ak do gen tagɨ dɨ bo nayɨni yaŋ nandagɨm, mani dɨma.
21 Jap do agɨm bɨsapmon marasin yokwi baŋ namgwit. Tekno kɨbɨdaŋban wain ɨsɨpmɨ baŋgɨn nokeŋ do namgwit.
22 Jap noknok madep ak do muwutni bɨsapmon uŋun kɨsɨk kɨsɨk bɨsap da tobɨlek kɨlap da yaŋ paron depban yokwalni, ae gapmagwan maŋek tasɨk toni dakon yo yaŋ asak dosi nandɨsat.
23 Dabɨlni abɨ pɨlɨn tuk ani, aŋek yo saŋbeŋek dɨma pɨndatni. Manji paŋupbal abɨ tebai dɨma atni dosi nandɨsat.
24 Butjap sigɨn nandaŋ yomɨŋek yo yokwisi aŋ yobi. Aŋek butjapgo da aban pasɨl mudoni.
25 Kokup ekwaŋ uŋun ɨsal tosak. Ae ɨmal yutnikon amɨn kɨnda dɨma egɨpjak dosi nandɨsat.
26 Amɨn dɨwarɨ yokwini dakon kobogɨ yomgul, amɨn yokwi da yokwi aŋ yom do pi sigɨn aŋ. Gak da amɨn dɨwarɨ dakon gɨptɨm paŋdagaŋek gɨptɨm tedep yomgul, amɨn yokwi da jɨgɨlak gen yaŋ yomɨŋek jɨgɨ yomaŋ.
27 Amɨn yokwi dakon yokwini do dɨma ɨŋtaŋ yobi. Uŋun amɨn dɨmasi paŋpulugoki.
28 Gak da egɨp egɨp papiakon mani wɨrɨrɨkgi. Ae amɨn kɨlegɨ dakon man gat kɨsi mani dɨma mandaki dosi nandɨsat.
