3 Pɑɑ lɑ pǝ tǝnɑ mpi n kɑ́ kɛɛsɩ-wɛɣɛ cokǝle pɑɑsǝnɑʋ tɔm tɑɑ tɔ. Amɑ pǝ fɛɩ sɩ pɑ́ tokinɑ Ɩsɔ pʋlʋpʋ yɑɑ kɔtɑɣɑ tǝlɑtɛ. Pǝ́ tɑɑ kɔɔ nɑ mpɛ yɑɑ mǝ tɑɑ nɔɣɔlʋ sɩ.
4 Pɑ tike pɑɑ sǝŋnɑ-mɛɣɛ Ɩsɔ cokǝle tǝmlɛ tɑɑ. Cɑɣɑlʋ nɔɣɔlʋ ɩ kɑɑ kpǝtǝnɑ.
5 Ɩlɛnɑ mɩɩ pɑɑsǝnɑ tǝ nɑ kɔtɑɣɑ tǝlɑtɛ. Ɩlɛ mɑ pɑ́ɑ́nɑ́ kɑɑ tɑsɑ huuu kɛ Ɩsɛɣɛlɩ nyǝ́mɑ tɔɔ.
6 Mɑ lǝsɑ mǝ tɑɑ kɛ́ mǝ tɛɛtʋnɑɑ Lefii nyǝ́mɑ. Ɩlɛnɑ mɑ tɑɣɑnɩ-mɛɣɛ wɛɣɛ hɑʋ sɩ, pɑ́ lɑ tǝmlɛ kɛ Ɩsɔ cokǝle tɑɑ.
7 Amɑ Alɔŋ, nyɑnɑ nyɑ́ lʋlʋɣʋ nyǝ́mɑ mɩɩ lɑ mǝ kɔtʋɣʋ tǝmlɛ kɛ kɑtɛ tɑɑ kɑtɛ tǝcɑɣɑlɛ tɑɑ, kɛ́ pʋʋɣʋ kʋkɑɣɑʋ wɑɑlɩ. Mɑ́ hɑɑkǝnɑ-mɛɣɛ lonte ntɛ́. Ye yʋlʋ kɛ yem kpǝtǝnɑ tǝnɑ, ɩsɩɩ pɑ kʋ-ɩ.
8 Ḿpʋ́ɣʋ́ Tɑcɑɑ tɔmɑ Alɔŋ sɩ: Nyɑnɑ nyɑ́ lʋlʋɣʋ nyǝ́mɑ ɩ́ tǝnnɑ kɔtɑsɩ nsi Ɩsɛɣɛlɩ nyǝ́mɑ hʋlɑɑ sɩ sɩ kɛ́ mɑ nyǝnsɩ tɔɣɔ tɑm tɔɔ.
9 Kɑtɛ tɑɑ kɑtɛ nyǝm mpi pɑ tɑ nyɑɣɑsɩ kɔkɔ, nɑ pɩɩ pǝsɩ mǝ nyǝm kɛ Ɩsɛɣɛlɩ nyǝ́mɑ kʋcɔɔʋ, nɑ pɑ kʋhɑʋ, nɑ pɑ ɩsɑɣɑtʋ hɩɩsʋɣʋ kɔtɑɣɑ, nɑ pɑ tɑsǝkǝlɛ tɑɣɑnʋɣʋ nyǝŋkɑ tǝnɑ ŋkɑ pɑɑ lɑ-m tɔɣɔlɔ. Wontu kɑtɛ nyǝntʋ ntɩ tǝ pǝsǝɣɩ mǝ nɑ mǝ piyɑ mǝ nyǝm kɛ́.
