9 Pun ai ekipwichi imwom mi pin a küküri leüti usun ekkei, nge ekewe kapasen esit mi toruk ra pwal toriei.
10 Iwe, lupwen üa atekisonaeitiu ren ai echikefel, aramas ra asitaei.
11 Lupwen üa üföüf üf seni tuk, ra chök takiriei.
12 Ir mi mot lon asamalapen ewe telinimw ra kapasen ämängau usi, nge ekewe chon puch ra kölüei.
13 Nge ngang üa chök iotek ngonuk, ai Samol mi Lapalap. Kopwe pälüeniei, ai Kot, lon fansoun mi fich me reöm. Kopwe pälüeniei lon om tong ellet, pun ka apwönüetä om we pwon pwe kopwe amanauaei.
14 Kopwe amanauaei seni ai kokotiu lon ewe pwakak. Kopwe angasaei seni ekewe chon oputaei, pwal seni ekewe koluk mi alolol.
15 Kosap mwütätä pwe ekewe no repwe pwölüeila, kosap pwal mwüt ngeniei pwe üpwe kokotiu lon ewe lenien alolol, ika mwocholong lon peias.
16 Ai Samol mi Lapalap, kopwe pälüeniei lon om tong ellet mi mürina. Kopwe kul ngeniei lon om ümöümöch mi somwola.
17 Kosap amona mesom seni noum chon angang. Kopwe müttir pälüeniei, pun ngang üa nom lon riaföü.
18 Kopwe kaneto rei o amanauaei, kopwe angasaeila seni ekewe chon oputaei.
19 En ka silei usun ai küna turunufas, usun ai säw me ai itengau, ka pwal silei ekewe chon oputaei meinisin.
20 Ekewe kapasen turunufas ra atatakisi lelukei pwe üa nom lon apilükingau. Üa kütta ika eman epwe tongeei, nge esap wor eman, üa pwal kütta ika eman epwe achipaei, nge esap wor eman.
21 Ra uwalong poison lon enei mongö, nge lupwen üa kaka, ra aünüei finikar.
22 Amwo ar kewe kametip repwe wiliti eu likatup ngeniir, nge ar kewe chulapen mongö mi pin repwe wiliti eu sär mi awarato feiengau wor.
23 Amwo meser repwe toputop pwe resap tongeni küna mwer, kopwe pwal föri pwe sökürür epwe pwor fansoun meinisin.
24 Kopwe awarato om song wor, om lingeringer epwe toriir.
25 Amwo lenier epwe pönüla, amwo esap chüen wor eman epwe nonom lon imwer imw mangaku.
26 Pun ir ra ariaföüü ätewe en ka wichi, ra pwal alapala ar ariaföüü ätewe en ka akinasa.
