10 Lon fansoun mochomoch echök ekewe aramasangau resap chüen nom. Inamwo are kopwe küttafichiir lon lenier, nge resap nom ikenan.
11 Nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.
12 Ekewe aramasangau ra rawangauei ewe chon pwüng o afochofoch ngeni.
13 Nge ewe Samol a takiri ekewe aramasangau, pun a silei pwe a arap ränin ar mäla.
14 Ekewe aramasangau ra üttawu nöür ketilas o emeia nöür likapich, pwe repwe afeiengaua ekewe mi wöüngau me mwelele, repwe pwal niela chokewe mi föri mine a pwüng.
15 Nge repwe mäla ren püsin nöür ketilas, nge ar likapich epwe kup.
16 Än eman chon pwüng pisek mi chokükün a mürina seni wöün ekewe aramasangau meinisin.
17 Pun pöchökülen ekewe aramasangau epwe wesila, nge ewe Samol mi Lapalap epwe alisi ekewe chon pwüng.
18 Ewe Samol mi Lapalap a tümwünü ekewe aramas esap wor ar tipis, repwe chök fafanü fanüer tori feilfeilachök.
19 Lon fansoun feiengau resap küna säw, nge lon ränin lengita epwe somwola ener mongö.
20 Nge ekewe aramasangau repwe rosola. Ekewe chon oputa ewe Samol mi Lapalap ra usun chök lingen ekewe pön ira mi morola lon ekewe mälämäl, repwe moropöküla usun och ötüöt.
21 Ewe aramasangau a liwinimang, nge esap tongeni amusasefäli. Nge ewe chon pwüng a kirikiröch o fangafangöch.
22 Pun chokewe mi feiöch me ren ewe Samol mi Lapalap repwe fanüeni ewe fanü, nge chokewe mi anümamau me ren Kot repwe kärila.
23 Ewe Samol mi Lapalap a emweni eman aramas won ewe al epwe fetal won, a pwal anüküchara i, pun a pwapwa ren.
24 Are epwe tur, esap turuchapala, pun ewe Samol mi Lapalap a kamwöch pöün.
25 Seni me lom, lupwen ngang üa eman alüal, tori iei üa chinlap, üsap küna mwo eman chon pwüng epwe sachawun, ika nöün kana repwe tütüngorfetal ener mongö.
26 Ewe chon pwüng a fangafangöch o mwütätä pisekin ngeni aramas, nge nöün kana ra wään feiöch ngeni aramas.
27 Kopwe sü seni mine a ngau o föri mine a mürina, mürin kopwe nonomöch lon ewe fanü fän kinamwe.
28 Pun ewe Samol mi Lapalap a efich mine a pwüng, esap likitala nöün kewe mi allükülük. Ewe Samol mi Lapalap a tümwünü ekewe chon pwüng tori feilfeilachök, nge mwirimwirin ekewe aramasangau repwe kärila.
