1 Ngeni ewe mi emweni chon köl: Echö än Tafit köl. Äm Samol mi Lapalap, ewe king a pwapwa ren om manaman, a fokun ingeiti om alilis ngeni pwe a win.
2 Ka fang ngeni mochenin letipan, nge kosap amwöchü seni mine a tüngor.
3 Pun ka etiwa i ren feiöch mi chomong, ka pwal isetä won möküran epa mwärämwär seni kolt mi mürina.
4 A tüngor manau me reöm, nge en ka fang ngeni, ka alangatama ränin manauan tori feilfeilachök.
5 An ling a lapalap, pun ka alisi pwe a win. Ka awora ngeni iteüöch me iteföüla.
6 Ewer, ka fokun afeiöchü ren feiöch esemüch, ka apwapwai ren om nonom ren.
7 Pun ewe king a anomu an apilükülük won ewe Samol mi Lapalap, nge ren än Ewe mi Unusen Tekia tong ellet esap tongeni mwökütüküt.
8 Ewe king epwe liapeni chon pälüeni meinisin, epwe liapeni chokewe mi oput i.
9 Lupwen epwe wareto, epwe aroserela usun eu ekkei a kenala mettoch. Ewe Samol mi Lapalap epwe ärirela lon an lingeringer, nge ekkei epwe fisirela.
10 Epwe arosala mwirimwirir seni won fanüfan, pwe esap wor eman epwe chüen manau.