3 Ra akkeni chönawer pwe a ken usun chönawen eman serepenit, nge ar kapas a usun chök poisonun serepenit.
4 Ai Samol mi Lapalap, kopwe epeti seniei ekewe aramasangau. Kopwe tümwünüei seni aramas mi mwäneson, chokewe mi rawangauaei pwe üpwe chepetek.
5 Aramas mi lamalamtekia ra aopala eu sär fän itei, ra ameresala ar kewe chew o soni ar kewe likatup aropen ewe al pwe repwe liapeniei.
6 Üa kapas ngeni ewe Samol mi Lapalap, “En ai Kot.” Ai Samol mi Lapalap, kopwe aüselinga ai kewe tüngor pwe kopwe ümöümöch ngeniei.
7 Ai Samol mi Lapalap ai Kot, en chon angasaeila mi pöchökül, ka epeti seniei feiengau lon maun.
8 Ai Samol mi Lapalap, kosap mwütätä mochenin ekewe aramasangau, kopwe atai ar kewe rawangau.
9 Chokewe mi pwelifeiliei ra chimwetä mökürer. Amwo ar kapasen eniweniw ngeniei epwe püsin küür.
