9 Y ayan tin e war chenobꞌ: —Jax e winic era, chenobꞌ. Y ayan e inmojr xeꞌ chenobꞌ: —Majax jaxir, pero lar uwirnar, chenobꞌ. Pero jaxir che: —Nen, che e winic xeꞌ tajpem ani unacꞌut.
10 Y ayan tin e cay uyubꞌiobꞌ tuaꞌ e winic y chenobꞌ: —¿Y tucꞌa ache tuaꞌ uyubꞌiet iyeron? che cora winicobꞌ era.
11 Y che e winic: —Jax inteꞌ winic xeꞌ ucꞌabꞌa Jesús xeꞌ ugoro e anam tama unacniut y uyaren: “Quiqui poco unacꞌoit tama e pila xeꞌ ucꞌabꞌa Siloé.” Y nen ixien inche bꞌan cocha uyaren. Y conda cꞌapa impoqui unacniut, eꞌron niut, che e winic era xeꞌ tajpem ani unacꞌut.
12 Entonces ubꞌna tuaꞌ e winic era y arena: —¿Y tiaꞌ turu e winic xeꞌ utzꞌacpes unacꞌoit coner? che e gente era. Y jaxir che: —Nen machi innata tiaꞌ turu, che e winic.
13 Entonces uqꞌuechiobꞌ ixin e winic era xeꞌ tajpem ani unacꞌut tut e fariseobꞌ.
14 Pues jax inteꞌ día tuaꞌ e jiriar conda chena tunor era umen e Jesús; que uche e anam tuaꞌ utzꞌacpes e winic xeꞌ tajpem ani unacꞌut.
15 Entonces e fariseobꞌ cay uyubꞌiobꞌ tuaꞌ e winic que tucꞌa uche que uyubꞌi eꞌron coner. Y jaxir che: —Anam ugoro tama unacniut y uchien impoqui y umen era cay eronen, che e winic.
16 Entonces cay ojron cora fariseobꞌ y chenobꞌ: —Pues chequer ticoit que e Jesús majax ebꞌetbꞌir umen e Dios cocha machi acꞌupseyan tut e día tuaꞌ e jiriar, che e fariseobꞌ era. Pero ayan e inmojr fariseobꞌ ubꞌan xeꞌ chenobꞌ: —Jay jax ani inteꞌ ajmabꞌambꞌanir ma cocha erer uche inteꞌ nuxi milagro cocha era, che e inmojr era. Y tamar era cay uxere ubꞌobꞌ tamar e Jesús.
17 Entonces cay uyubꞌiobꞌ otronyajr tuaꞌ e winic xeꞌ tajpem ani unacꞌut y chenobꞌ: —¿Y tucꞌa abꞌijnu net upater tin e utzꞌacpes unacꞌoit? che e nuquir winicobꞌ era. Y jaxir che: —Nen inware que jax inteꞌ profeta, che e winic.
18 Pero e nuquir winicobꞌ machito ucꞌupsiobꞌ que e winic era tajpem ani unacꞌut. Y tamar era ixin upejcobꞌ utata y utuꞌ e winic
19 y uyubꞌiobꞌ tuobꞌ y che: —¿Isitz ca era? ¿Tajpem ca ani unacꞌut conda cuxpa? ¿Y tucꞌa uche tuaꞌ uyubꞌi eꞌron coner? che e nuquir winicobꞌ era.
