26 Chora chënga cachiñe tmojatantjá: —¿Nts̈amo tcmënjama? ¿Nts̈amo cha tënjama chacmotsabinÿnama ca?
27 Y cha tojanë́jua: —Ya tcbonjáuyana y ndoñe ches̈matoyeuná. ¿Ndáyeca cachiñe s̈mojtsebos̈e jatuenama? ¿Ts̈ëngaftángnaca s̈mojtsebos̈e chabe ústonënga jtsemnama ca?
28 Chora chënga cha tmojtsanóyenguango y tmojaniyana: —Acna canÿe chabe ustoná cojtsemna, pero bënga ndoñe; bëngna Moisesbe ústonënga fsëndmëna.
29 Bënga fsëndë́tats̈ëmbo, Bëngbe Bëtsá Moisésbioye tbojanatsëtsama, pero chë boyabásabiama ndoñe queftsátstats̈ëmbo ni mo ndë́mocana cha tojabama ca —chënga imojtsichamo.
30 Chora chë boyabása tojanë́jua: —¡Nts̈amo chca nántsemna! Ts̈ëngaftanga ndoñe s̈montsetáts̈ëmbo ndë́mocana cha tojabama; pero chas̈uabinÿnama cha tonjama.
31 Bënga ts̈abá mondë́tats̈ëmbo, bacna soyënga amënga Bëngbe Bëtsá ndoñe queondbátayaunanama. Chana, nÿe chábioye adorayá y nts̈amo cha tojtsebos̈cá amábioye joyeunayana.
32 Quem luare jobojáts̈ama orscana ndocna te quenaisótats̈ëmbo canÿe jtaná onÿnanabiama ndánaca cha chabotsabinÿnama tojë́ftsemama.
33 Quem boyabása, Bëngbe Bëtsabe ichmoná chabe soyënga jamama ndoñe tontsemnëse, tondaye nantsobena jamama ca —chë ents̈á tojánayana.
34 As chë fariseunga tmojaniyana: —¡Ndayá! Aca tcojanonÿná orscana, corente bacna soyënga amá tcomnëse, ¿nts̈amo mora bënga s̈cochjátabuatambaye ca? Y chora chë judiëngbe enefjuana yebnents̈ana cha tmojtanábocna.
35 Chë jtaná tmojtanábocnama Jesús tojanuena ora, tojána cha janguanguama. Tbojáninÿena ora tbojaniyana: —¿Aca Bëngbe Bëtsá Ents̈á tbojanbemábeñe quecojtsos̈buaché ca?
36 Y cha tbojanjuá: —¿Taita, nda cha yojtsemna, as ats̈e chábeñe jtsos̈buáchiyama ca?
37 As Jesús tbojaniyana: —Aca ya tconjinÿe; chë ácaftaca entsoyebuambná cha entsemna ca.
38 Chora, chë boyabása Jesúsbents̈e tojanoshaments̈é jëtschuayama y tbojaniyana: —Ats̈be Utabná, aíñe sëntsos̈buaché ca.
39 Chora Jesús chë ents̈anga tojanë́yana: —Ats̈e quem luaroye tijabo ndayá ents̈anga jinÿanÿiyama nts̈amo cachënga Bëngbe Bëtsabe soyëngama imojuabnama. Chë Bëngbe Bëtsabe soyëngama ndosertánënga, chë soyënga ats̈e chanjínÿanÿiye ora, mo jtanëna shnanëngcá mochántsemna; y chë Bëngbe Bëtsabe soyëngama corente imotáts̈ëmbo ca juabnayëngna chanjínÿanÿiye, nÿe bats̈á Bëngbe Bëtsabe soyëngama imotats̈ëmbuama. Y chca, chënga, masna mo jtanëngcá mochántsemna y ndoñe mo chë jinÿama obenëngcá.
40 Básefta fariseunga Jesúseftaca imojtsemnënga chca tmojanuena ora, cha tmojaniyana: —Ndegombre bënga ndoñe mo jtanëngcá queftsátsmëna ca.
41 Chora Jesús tojanë́jua: —Ts̈ëngaftanga Bëngbe Bëtsabe soyëngama ndëtats̈ëmbënga s̈mojtsemna ca, y ndegombre chë soyëngama ndoñe cmontsë́sertana ca s̈mojobuambase, ndayá s̈mojtsamcá Bëngbe Bëtsá mo bacna soyënga cuenta ndoñe queochátonÿaye. Pero ts̈ëngaftanga corente Bëngbe Bëtsabe soyëngama cmojtsë́sertana ca s̈mojtsichámësna, Bëngbe Bëtsá ndoñe queochatobenaye ts̈ëngaftangbe bacna soyëngama jáperdonana ca —Jesús tojanë́yana.
