Juan 9:23-35

²³Por inu oquejtojque itötajua: “Ye tlöcatl icaca; xomotlajtlanelicö yaja”.

²⁴Hua ca inu, ocsajpa oquenutzque inu tlöcatl tli ixcocoxque oyeya. Oquelfejque: ―Sa Deus xetiemochamöbele. Pues tejua tecmate que nieca tlöcatl icaca tlajtlacultec lalebes.

²⁵Yecuöquenu yaja onöhuat, hua oquejto: ―Tlö lalebes tlajtlacultec, amo necmate. Pos sa ini necmate, que naja neyeya neixcocoxque, hua öxö ye netlachea.

²⁶Hua ocsajpa oquelfejque: ―¿Tli metzchibele? ¿Quiene metztlachealte?

²⁷Oquennönquele: ―Ye onemiechmolfele, hua amo nemocaquitea. ¿Tlica ocsajpa nemonequitea ma nemiechmolfele? ¿Nemonequitea nuyejque nemejuantzetzi nemobetztasque nentiemachtejcöhua de yejuatzi?

²⁸Hua ocajajuaque, hua oquejtojque: ―Taja tecaca temachtejque de yaja; cache tejua teimachtejcöhua de Moisés tecate.

²⁹Tejua tecmate que oquenunutzque Deus Moisés; cache ini nönca amo tecmate de cöne icaca.

³⁰Onöhuat inu nieca tlöcatl, hua oquemelfe: ―Melöhuac, naja nectietzöbejta ipampa nemejuantzetzi amo nemomachitea de cöne iloac ini nönca tlöcatl, hua yejuatzi oniechtlachealtejque naja.

³¹Hua tecmate que Deus amo quencaquihua tlin tlajtlaculteque. Cache tlö canajyeca tiemabelea Deus, hua quechihua tli tietlanequeles, inun quiema quecaquihua yaja.

³²Desde cuöc opie tlöltecpactle ayec omocac que canajyeca oquetlachealte sente tlöcatl tli otlöcat ixcocoxque.

³³Tlö ini nönca tlöcatl amo iloasquiöne de Deus, abele tli ayihuasquea.

³⁴Oquenönquelejque, hua oquelfejque: ―Ipan tlajtlacule de atiro otetlöcat, ¿hua taja tetiechmachtis tejua? Yecuöquenu oquetojtocaque para ayecmo quiema iyös ipa teopanme.

³⁵Oquecajque Jesús quiene oquetojtocaque; hua oqueniextejque. Oquelfejque: ―¿Tomoneltoca taja tieca öque omochi tlöcatl?