Juan 9:14-30 in San Blas Kuna

¹⁴ Ar ade, Jesús napa olli-olli-imaksadi, degi, dule-ibyasulid-onudaksadi, obunnoged-ibagi imaksad.

¹⁵ Fariseoʼmar dule-ibyasuli-gudigusadse egisdemarmogad: —¿Igi nabir be ibya nugusa? Dule-nugusad, abin-sogded: —Jesús an-ibyagi olli mage-mage imaksad. Degi, an ibya-enuksagu, mag-atake an gunonikid.

¹⁶ Fariseoʼmar abar sogdemalad: “We-dule Bab-Dummadgi danisulid. Agala, we-dule obunnoged-ibagi dule-nudaksad.” Fariseo-baigandi sogmalad: “Ar dule isgudiile, ¿sunna ibmar-wilubgan-dakledisurmalad imaksi? Suli, geg imake.” Agala, Fariseoʼmar na abin-abin imakarmarsunnad.

¹⁷ Fariseoʼmar gannar dule-ibyasuli-gudigusadga sokarmalad: —Dule-bega-ibya-nudaksadgi, ¿igi be sogmosunna? Dule-nugusad, abin-sogded: —Andi an soged, we, Bab-Dummad-gayaburba-barsoged-duleye.

¹⁸ Ar Judíoʼmardi we-dule-ibyasuli-gudigusadi benmalad. Emidi, ibya-nikusye mag-atakye-soged benmalad. A-ulale, dule-ibyasuli-gudigusad-e-serganse gochamarsunnad.

¹⁹ Ese egisdemalad: —¿Ar we be-machi-sunnadi? ¿We, be-ibe ibyasuli-gwalulesye be sogmaladi? Ar degite, ¿ibiga emigindi nabir ataksunna?

²⁰ E-sergan sogdemalad: —Anmar wisi, we anmar-machid, ibyasuli gwalulesad.

²¹ Emigindi, mag-atakeddi an wissurmalad, ibiga nabir mag-atake. Anmar wissurbalid, doa ega nabir ibya nudaksa. Ar bato dummadsoggu, ese be egismardo, na e bemarga sogoed, doa ega ibya nudaksa.

²² Dule-ibyasuli-gudigusad-e-sergan Judío-dummagan-dobedbali, weyob sogsamalad. Ar ade, Judío-dummagan bato igar-itosmalad, dule-wargwen sogdibeye, Jesús, Bab-Dummad-dule-wargwen-barmidagoye-sogsad-duleye, Judíoʼmar-onmakedneggi onomaloye.

²³ A-ulale, dule-ibyasuli-gudigusad-e-sergan sogsamalad: “Bato dummadsoggu, ese be egismarye, doa e-onudaksa.”

²⁴ Degine, Fariseoʼmar dule-ibyasuli-gudigusadse gannar gochamargu, ese egisdemalad, ega sogdemalad: —Bab-Dummad-asabin napiragwadba be anmarga sogo, igi be nugusa. Anmardi wismalad, we-dule, dule-isganad.

²⁵ Dule-nugusad, abin-imakdegu, sogded: —An wissulid, we-dule, dule-isgudiiddibe. Unnila ibmar-soggwennaa an wisid. Iduardi, aku an atakenad, emigindi, mag an ataked.

²⁶ Fariseoʼmar gannar dule-ibyasuli-gudigusadse egichiarmarbalid: —¿Igi be-imaksa? ¿Igi-nabir bega ibya nudaksa?

²⁷ Dule-nugusad, abin-sogded: —Ar bato bega an sogsamalad. Be an-itossurmalad. ¿Degite, ibiga gannar be itobimarsunna? ¿Ar bemar e-sapinganga gubimarmosi?

²⁸ Fariseoʼmar dule-ibyasuli-gudigusadse uluarmalad, ega sogdemalad: —Bee be, Jesús-e-sapindo. Anmardi, Moisés-e-sapinganad.

²⁹ Anmardi wisid, Bab-Dummad Moisésʼga sunmaksad. We-duledi, anmar wissulid, bia daniki.

³⁰ Dule-ibyasuli-gudigusad abinsadgu, sogded: —¡Ar deyobi! ¡We-ibmar nue-aku itolegedid! Bemardi wissurmalad we-dule bia daniki, degite, angardi ibya nudaksad.

¹⁴ Deun obunnoged-ibagi Jesús napa olli-olli imaksa-gusad, dule-ibya-sulid a-ibagi onudaksa-gusad.

¹⁵ Fariseomar dule-ibya-suli-gudigusadse egisdemarmogad: —¿Igi nabir be ibya nugusa? Dule-nugusad, abin-sogded: —Jesús an-ibyagi olli mage-mage imaksad, degi, ibya an enuksagu, mag-atak an gunonikid.

¹⁶ Degi abar Fariseomar sogdemalad: —We-dule Bab Dummadgi danisulid, ar ade we-dule obunnoged-ibagi dule-nudaksad. Fariseo-baigandi sogmalad: —¿Ar dule iskudiile, we sunna ibmar-wilubgan-dakledisurmalad imakosi? Suli, geg imake. Na Fariseomar abin-abin imakarmarsunnad.

¹⁷ Degi Fariseomar gannar dule-ibya-suli-gudigusadga sokarmalad: —Dule-bega-ibya-nudaksadgi ¿igi be sogmosunna? Dule-nugusad, abin-sogded: —Andi an soged, we Bab-Dummad-gaya-burba-berbeged-duleye.

¹⁸ Ar Judiomardi we-dule-ibya-suli-gudigusad, ibya-emigindi-nikusad benmalad. A-ular dule-ibya-suli-gudigusad-e-babganse gochamarsunnad.

¹⁹ Ese egisdemalad: —¿Ar we be-machi-sunnadi, we ibya-suli gusgu gwalulesadi? ¿Ar degite ibiga emigindi nabir ataksunna?

²⁰ E-babgan sogdemalad: —Anmar wisi, we anmar-machid, ibya-suli gwalulesad.

²¹ Ar emigindi mag-atakeddi an wichurmalad, ibiga nabir mag-atake. Anmar wichurbalid, ar doa ega nabir ibya nudaksa. Ar bato dummadsoggu, ese be egismar, na e bemarga sogoed, doa ega ibya nudaksa.

²² Dule-ibya-suli-gudigusad-e-babgan Judiomar-dummagan-dobedbali weyob sogsagusmardo, ar ade Judio-dummagan bato igar-itosmalad, ar dule-wargwen sog-dibeye Jesús we-dule-Bab-Dummad-dule-wargwen-barmidagoye-sogsad-duleye, Judiomar-onmaked-neggi onomaloye.

²³ A-ulale dule-ibya-suli-gudigusad-e-babgan sogsa-gusmalad: “Bato dummadsoggu, ese be egismar, doa e-onudaksa.”

²⁴ Degine, Fariseomar dule-ibya-suli-gudigusadse gannar gochamargu, ese egisdemalad, ega sogdemalad: —Bab-Dummad-asabin napiragwadba be anmarga sogmalo igi be nugusa. Anmardi wismalad we-dule, dule-iskanad. ¿Bedi igi be sogmosunna?

²⁵ Degi, dule-nugusad, abin-imakdegu, sogded: —An wichulid, we dule-iskudiid-dibe. Unnila ibmar-soggwennaa an wisid, iduardi aku an atakenad, emigindi mag an ataked.

²⁶ Fariseomar gannar dule-ibya-suli-gudigusadse egichiarmarbalid: —¿Igi-be-imaksa? ¿Igi nabir bega ibya nudaksa?

²⁷ Dule-nugusad, abin-sogded: —Ar bato bega an sogsamalad, be an-itosurmalad. ¿Degite ibiga gannar be itobimarsunna? ¿Ar bemar e-sapinganga gubimarmosi?

²⁸ Fariseomar dule-ibya-suli-gudigusadse uluarmalad, ega sogdemalad: —Bedi Jesús-e-sapindo, anmardi Moisés-e-sapinganmalad.

²⁹ Anmardi wisid, Bab Dummad Moisésga sunmaksad, we-duledi, anmar wichulid, bia daniki.

³⁰ Dule-ibya-suli-gudigusad abinsadgu, sogded: —¡Ar deyobi! ¡We ibmar nue aku-itolegeddo, bemardi wichurmalad we-dule bia daniki, degite angardi ibya nudaksad!