Juan 7:24-50

²⁴Amo xetlajuscörucö sa lo que tli pane niese, cache xetlajuscörucö ca yectelestle.

²⁵Yecuöquenu quejtoöya seque tli oyeya de ciudad de Jerusalén: ―¿Amo yaja ini nönca öque quetiemojtecate para quemectisque?

²⁶Hua xequejtacö tlajtlajtojteca ixmantete hua amo tli quelfea. ¿Quie beles tlötlajtoönejme ye ocasojcömatque de melöhuac, tlö yaja ini icaca Cristo öque Deus oquixpejpenque?

²⁷Cache ini tlöcatl, tecmate de cöne icaca; hua cuöc huölös Cristo öque Deus oquixpejpenque nionöque amo quemates de cöne yebitz.

²⁸Yecuöquenu tzajtzihuaya Jesús cuöc tlamachtiloöya ipa teopantle bieye. Quejtuloöya: ―Naja nenniechixomate, hua nenquemate de cöne neca. Hua amo onehuöla por nopörte de naja mismo. Cache niechhualtitlanque öque melöhuac iloac, hua yejuatzi amo nentieixomate nemejua.

²⁹Naja netieixomate, ipampa de yejuatzi neca hua yejuatzi niechhualtitlanque.

³⁰Por inu quenequeya tieasesque. Pero nionöque amo omöya tiepa, ipampa ayemo aseya tieura.

³¹Hua meyactie de inu giente omoneltocaque tieca hua quejtoöya: ―Tlö huölösquiöne ocsente que uyesquiöne Cristo, abele quechihuasquea cache bejbeye tietzöbeme, que tli quechihualo ini nönca tlöcatl.

³²Hua inu fariseos oquecajque quiene giente tlajtlajtoöya de yejuatzi; hua jefes de teopexcötzetzi hua fariseos oquentitlanque policías ma tieasecö.

³³Hua Jesús oquejtojque: ―Sa oc tepetzi oncö nemotlac neyes, hua sötiepa neyös tietlac öque niechhualtitlanque.

³⁴Nenniechtiemusque, hua amo nenniechniextisque. Hua cöne naja neyes, nemejua abele nenyösque.

³⁵Yecuöquenu joriojte oquejtojque sente ca ocsente: ―¿Cöne iyös ini nönca para amo tecniextisque? ¿Beles iyös intzölö inu ocseque tli uyajque intzölö griegos, para quenmachtis griegos?

³⁶¿Tli quejtusneque inu tlajtule tli oquejto: “Nenniechtiemusque, hua amo nenniechniextisque. Hua cöne naja neyes, nemejua abele nenyösque”?

³⁷Cache pa sölúltimo tunale, inu bieye tunale de yelfetl, Jesús onequetzaluc hua tzajtzihuac. Oquejtojque: ―Tlö canajyeca ömeque, ma huöla ca naja hua ma ötle.

³⁸Öque moneltoca ca naja, ipa mochihuas quieme quejtoa teotlajtule, que de ijtecopa quisasque quieme ötlacme de ötzintle tli quetiemaca nemelestle.

³⁹(Ini nönca oquejtojque de tieEspíritu de Deus, pues innochtie tli moneltocaque tieca Jesús tieselisquea tieEspíritu Deus. Pues ayemo hualiloöya Espíritu ipampa Jesús ayemo oqueselejque tietlaniexteles.)

⁴⁰Yecuöquenu seque de inu meyactie giente tli oquecajque ini nönca tlajtule, quejtoöya: ―De melöhuac ini nönca ica inu tlayulepante tli huölösquea.

⁴¹Ocseque quejtoöya: ―Yaja ini nönca icaca Cristo öque Deus oquixpejpenque. Ocseque quejtoöya: ―Pos amo. ¿De Galilea huölös Cristo?

⁴²¿Amo quejtoa teotlajtule nele Cristo huölös de itech ixenöchpelhua rey David, hua de ipa Belén, de inu puieblo cöne nemeya David?

⁴³Hua ca inu mocöcamapanabiöya giente tiepampa yejuatzi.

⁴⁴Seque de yejua quenequeya tieasesque; cache nionöque amo omöya tiepa yejuatzi.

⁴⁵Hua inu policías ohuölajque intlac jefes de teopexcötzetzi hua inca fariseos. Hua yejua oquenmelfejque: ―¿Tlica amo nenquehualecaque?

⁴⁶Policías onöhuatque: ―Ayec otlajtlajto ocsente tlöcatl quiename ini nönca tlöcatl.

⁴⁷Yecuöquenu fariseos onöhuatque: ―¿Nuyejque nemejua nemiechcajcayö?

⁴⁸¿Beles nenquepensöroa que ye omoneltocaque ca yaja seque de tejua tli tetlötlayecönque hua tefariseos?

⁴⁹Cache ini nöncate giente que amo quemate inu ley hua moneltoca ca inu tlöcatl, yejua cate malditos.

⁵⁰Hua Nicodemo, öque antes uya tietlac Jesús, oyeya intzölo, pues yaja oyeya sente de inu fariseos. Yaja oquemelfe: