Juan 6:8-66 in San Blas Kuna

⁸ Geb degi, e-sapin-baid-Andrés, Simón-Pedro-e-urba, Jesúsʼga sogded:

⁹ —Wegi machigwa-wargwen cebada-madu-gwaatar wis sediid, degine, ua-burwigana wis ukabo sedibalid. ¿Ar wede unniosi? Ar dule bukidarad.

¹⁰ Geb degi, Jesús sogded: —Nabir. Dulemar be urbemar. Agine, gagan-bukidar naid. Agine, dulemar ambikusmargu, geb machergan miliatar-wilub-mergu (5,000) daklealid.

¹¹ Jesús madu-susgua, Bab-Dummadga dog-nuedye-sogsagu, e-sapinganga madu uke-uke imaksad. Geb e-sapingan dulemar-gagan-birgi-bukmaladga ukdemogad. Jesús amba deyob ua-imaksabalid, ar bule-mergu abemala, abali ega uksamalad.

¹² Bela dulemar immelesmargu, Jesús, e-sapinganga sogded: —Mer binsa mas milegega, bela gwabgusad be wemar.

¹³ Cebada-madu-gwaataled bela guchamalad-sorba, gwabgusadi garba-gwaambe-gakabo-mergu (12) wesmalad.

¹⁴ Dulemar, Jesús-madu-gwaataled-omelosad-daksamaladi, sogdemalad: “We, Bab-Dummad-gayaburba-barsoged we-napnegse-nonikoed-sunnadye.”

¹⁵ Ar Jesús, dulemar ise-ebipiar reyga-guega e-imakdanimalo-daksagu, e-iduar yarse walagwengi banguded.

¹⁶ Dad-argwategu, Jesús-sapingan, Jesús-ega-sogsadba demar-gakase aidenonimalad.

¹⁷ Urgi nakwismargu, Capernaúmʼse-namalaga mata-dummad obakdemalad. Deun, bato neg nue-mutikgusad, Jesúsʼdi amba yoggumaid.

¹⁸ Ar burwa binnasur-gormaisoggu, demar dunguded.

¹⁹ Jesús-sapingan wachi-irbogus, igi, wachi-irbaagus-gammimaladgindibe, dakarmalad, Jesús demar-birgi daniki, e-urse warmakdaniki. Deyob dakarmargu, dobguarmalad.

²⁰ Jesús e-sapinganga sogded: “Ani an daniki, mer be dobgumar.”

²¹ Geb degi, e-sapingan weligwar urgi Jesús-abindaksamalad, degine, bia na nadapmaladse warmaksamarsunnad.

²² A-banedgine, dule-bukidar Jesúsʼba-mata-obakar-gudimaladi, wisguarmalad ur-wargwen-naigusadgi unnila Jesús-sapinganbi nadmarye. Jesúsʼdi e-sapinganba urgi nadsurye.

²³ Ur-baigan-Tiberias-neggweburgi-danimaladdi, bia dulemar Bab-Jesús Babga-dog-nuedye-sogsad-sorba madu-omelosad-guchamalad-walik nagunonikid.

²⁴ Ar dulemar, Jesús-daklesur-dakargu, degi, e-sapingan-sate-dakarmargu, Jesús-amiegala, urgi Capernaúm-neggweburse nadegusmalad.

²⁵ Dulemar mata-dummad-obakar Jesús-amismargu, ega sogdemalad: —Odurdaked-saila, ¿sana wese be noniki?

²⁶ Jesús, abin-imakdegu, emarga sogded: —Napira an bemarga soged, be an-amimaladi, an-ibmar-dakledisulid-imaksadba be an-amisurmalad. Ar bemar madu-nue-immedik-guchadba be an-amimalad.

²⁷ Mas-baisursunna-bergumaladga mer be arbamar. Mas-anmarga-burba-geg-bergued-ukedga be arbamar. Ar a-masdi, sunna bemarga, Dule-Machi ukoed. Ar a-dulegine, Bab-Dummad bato e-wilub nasiksad, burba-geg-bergued nikumalagar.

²⁸ Degi, Jesús-abin sogdemarsun: —Degite, ¿ibu an imakmalosunna Bab-Dummadga ibmar-imakegar?

²⁹ Jesús, abin-imakded: —Bab-Dummadga-ibmar-imaked wedo: Bab-Dummad-bemarga-dule-barmialidgi-bengusuli gued.

³⁰ Jesús-abin sogdemalad: —Degite, ¿ibi-ibmar-wilubgan-dakledisulid be anmarga imakosunna? Adi, anmar dakega, degi, mer begi anmar benguegar, ¿Ibi-ibmar be imaksunna?

³¹ Ar anmar-dadgandi nega-dulesulidgangi maná-guchamalad. Bab-Dummad-gardagi sognaid: ‘Madu-nibneggined-gunmalaga an imaksad.’

³² Jesús amarga sogded: —Napira an bemarga soged, Moisés bemarga madu-nibneggi-danikid uksasulid. Ar an-Bab madu-nibneggi-danikid-sunnad bemarga uked.

³³ Ar Bab-Dummad-madu nibneggi-aidenonikidi, we-napnegginmaladga burba-duladi uked.

³⁴ Jesúsʼga sogdemalad: —Dummad, madu-degiid be anmarga ukdigu imake.

³⁵ Jesús, abin-sogded: —Ani an madu-burba-duladid. Ar dule anse danikile, bar gwen ukumesosulid. Ar dule an-bengusulile, bar gwen uku-uku itogosulid.

³⁶ ”An bemarga epenne bato sogsad, ibmar-dakledisulid imaksa be an-daksamar-inigwele, degite, amba be an-benmalad.

³⁷ Ar Bab bela dulemar-anga-ukedi, anba-naguega anse dagoed. Ar dule anse danikile, gwen an obanosulid.

³⁸ ”An-itolegedba ibmar-saega nibneggi an danisulid. Dule-an-barmialid-sogedba an ibmar-imakega nonikid.

³⁹ Bab-an-barmialidi we abemaid: Bela dulemar-anse-nonikidi gwen wargwensaar oyoggubisur an-abeged. Adi, ibagan-napi-naguoedgi a-dulemar an gannar odulogegar.

⁴⁰ ”Dule-an-barmialid we abemaid: Bela dulemar-E-Machi-dakoedi, degi, egi bensuli-gunonikile, burba-geg-bergued nikued. Degine, ani, ibagan-napi-naguoedgi a-dulemar an odulogoed.”

⁴¹ Degi, Judíoʼmar, Jesúsʼgi sunmakedbi guarmalad, ar ade, Jesús sogsad, ani an madu-nibneggi aidenonikidye.

⁴² Judíoʼmar Jesúsʼgi sogdemalad: —¿Ar wede Jesús, José-machisursi? Degine, e-bab, e-nan, ¿anmar mag daksursi? Ar degite, ¿ibiga sogsunna? ‘Nibneggi an aidenoniye.’

⁴³ Jesús amar-abin-imakde, sogded: —Mer be muchub-muchub angi isdar sunmakmar.

⁴⁴ Ar Bab-an-barmialid, anse-dule-dagega imaksulile, gege dule-wargwensaale anse daged. Ibagan-napi-naguoedgi, dule-anse-nonimaladdi, ani an a-dule-odulogoed.

⁴⁵ Bab-Dummad-gayaburba-barsogmalad-gardagi narmakar maid: ‘Bab-Dummad na e-igargi bela dulemar-odurdakoed.’ Isaías 54:13 ”Degisoggu, bela Bab-itosmalad, degi, egi durdaksamarbalid, anba-naguegala anse danimaloed.

⁴⁶ ”Dule-wargwensaar Bab-daksaye an sogsulid. Unnila dule-Bab-Dummadgi-danikidbi Bab-daksad.

⁴⁷ Napira an bemarga soged: Ar dule angi bensulidi, a-dule, burba-geg-bergued nikad.

⁴⁸ ”Ani an madu-burba-duladid.

⁴⁹ Ar be-dadgan nega-dulesulidgangi maná-guchamar-inigwele, bela burgwismalad.

⁵⁰ ”An bemarga madu-nibneggi-aidenonikidgi-an-sunmakedi, a-madu dule guchale, bar burgosulid.

⁵¹ Ani an a-madu-duladid, nibneggi aidenonikidid. Ar dule-wargwen a-madu-guchale, bar burgosulid, degidula sadeguoed. An madu-ukoedi, we an-sanad. We-napneg-naidgi dule-bukmalad-dula-gudiguega an-san an ukoed.”

⁵² Agi Judíoʼmar abin-abin imakarmalad, sokarmalad: “Anmar e-san-gunnegala ¿igi anmarga e-san ukosunna? Geg gued.”

⁵³ Jesús amarga sogded: —Napira an bemarga soged: Ar bemar Dule-Machi-e-san gunsulile, degine, e-abe gobsurbalile, bemar burba-dulad nikuosurmalad.

⁵⁴ Ar dule an-san gunnele, degi, an-abe gobele, a-dule burba-geg-bergued nikuodo, degine, ibagan-napi-naguoedgi, ani an a-dule odulogoed.

⁵⁵ Ar an-sana, masgunned-sunsogedid, degine, an-abe, gobed-sunsogedbalid.

⁵⁶ Ar dule-an-san-gunmalad, degi, an-abe-gobmalad, anginbi gudigumalad, degine, an egi gudigumogad.

⁵⁷ ”Ar igi Bab-dulamaid an-barmiali, degine, igi Babgi an dula gudimoga, deyobi, dule an-san-guchale, a-dule angi dula-gudii gumogoed.

⁵⁸ Ani an madu-nibneggi-aidesadid. We-madu-nibneggi-aidesadi, be-dadgan-maná-guchadyobsulid. Ar maná-gucha-inigwele, amardi amba burgwismalad. Ar dule we-madu-guchardi, bar burgosulid, degisadeguoed.”

⁵⁹ Jesús Capernaúmʼgi dulemar-odurdaksigusgu, Judíoʼmar-onmakedneggi we-ibmar sogsagusad.

⁶⁰ Bukidar-Jesúsʼba-gudimaladi weyob Jesús-soge-itosmargu, sogdemalad: “We-ibmar-sogedi gwen nollo sogsulid. ¿Ar doa eba ibsaoe?”

⁶¹ Ar Jesús na wissoggu, e-sapingan muchub-muchub we-igargi sunmaknanai, amarga sogdesun: —¿We-an-bemarga-sogedi, be isdar itomala?

⁶² Ar Dule-Machi nibneggi-mai-gusadse gannar nakwemai be dakarmalar, ¿igi be sogsamalarsunna?

⁶³ Ar Bab-Dummad-Burbabi dulagudigued uked. Dule-sandi, binsaledid. An bemarga-ibmar-sogsadi, we burba-napiragwadid, degine, dula-gudiguedbalid.

⁶⁴ Ar gwenna-gwenna bemar an-benmalad. Ar ade, Jesús gebesaila-akar bato wisid doamala e-benmala, degine, doa darba e-ukbaloe.

⁶⁵ Jesús sogded: —A-ulale, an sogsad, dule, anba-naguegala Bab anse-sedasulir, gege anse dagye.

⁶⁶ Degidgine, bukidar Jesús-sapingan Jesúsʼgi bangudmalad, bar Jesúsʼba gudigussurmalad.

⁸ Geb degi e-sapin-baid, Andrés, Simón-Pedro-e-urba, Jesúsga sogded:

⁹ —Wegi machigwa-wargwen cebada-madu-gwaatar wis sediid, degine, ua-burwigana wis ukabo sedibalid, degite, ¿ar wede unniosi, ar dule bukidarad?

¹⁰ Jesús degi sogded: —Nabir. Dulemar be urbemar. A-degi-gunanaidgine, gagan bukidar naid. Agi dulemar ambikusmargu, miliatar-wilub machergan mergu daklealid.

¹¹ Jesús madu susgua, Bab Dummadga dog-nuedye sogsagu, e-sapinganga madu uke-uke imaksad. Geb e-sapingan dulemar-gagan-birgi-bukmaladga ukdemogad. Jesús amba deyob ua-imaksabalid, ar bule-mergu abemaladba ega uksamalad.

¹² Bela dulemar immelesmargu, Jesús e-sapinganga sogded: —Bela gwabgusmalad be wemar, adi mer binsa mas milegegar.

¹³ Cebada-madu-gwaataled bela guchamalad-sorba, gwabgusmalad wesmargu, garba-gwaambe-gakabo-mergu enosmar daklealid.

¹⁴ Ar dulemar Jesús-madu-gwaataled-omelosad-daksamalad, sogdemalad: —We inso Bab-Dummad-gaya-burba-berbeged we-napnegse-nonikoed-sunnadye.

¹⁵ Ar ise-ebipiar reyga-guega e-imakdanimalo, Jesús dulemar-daksagu, e-iduar yarse walagwen banguded.

¹⁶ Dad argwategu, Jesús-sapingan demar-gakase aidenonimalad igi ega Jesús-sogsa-gusadgii.

¹⁷ Urgi nakwismargu, mata-dummad obakdemalad, Capernaumse. Deun bato neg nue mutikgusad, Jesúsdi e-sapinganse amba yo nonikid.

¹⁸ Ar burwa binnasur gormaisoggu, demar dunguded.

¹⁹ Jesús-sapingan kilómetro-atargus, igi, nergwagus gammimaladgine, dakarmalad, Jesús demar-birgi nanadani, e-urse warmakdani. Deyob dakarmargu, dobguarmalad.

²⁰ Jesús na e-sapinganga sogded: —Ani an gudii, mer be dobgumar.

²¹ Degi e-sapingan weligwar urgi Jesús-abingasmalad, degine, bia-na-nadapmaladse warmaksamarsunnad.

²² A-banedgine, dulemar-bukidar-Jesúsba-mata-obakar-gudimaladi dakarmalad unnila ur-wargwen-nai-gusadi, sate. A-urgi Jesús na e-sapinganba nakwissulid, unnila e-sapinganbi nade-gusmalad.

²³ Ur-baigandi Tiberias-neggweburgi-danimalad nagunonimalad, bia Dummad-Jesús Bab Dummadga dog-nuedye-sogsad-sorba madu-omelosad guchamaladgi.

²⁴ Ar dulemar Jesús-daklesur dakargu, degi, e-sapingan satemoga, Jesús-amiegala, urgi nade-gusmalad, Capernaumse.

²⁵ Dulemar mata-dummad-obakar Jesús-amismargu, ega sogdemar: —¿Odurdaked-saila, sana wese be noniki?

²⁶ Jesús, abin-imakdegu, emarga sogded: —Napira an bemarga soged, be an-amimaladi, an-ibmar-dakledisulid-imaksadba be an-amisurmalad, ar bemar madu-immedik-guchadba be an-amimalad.

²⁷ Mas-baisursunna-bergumaladga mer be arbamar. Be arbamar, mas anmarga burba-geg-bergued-uked-degi-sadeguoedga. Ar a-masdi sunna bemarga, ani Dule-Machi, an ukoed, ar agala Bab Dummad bato angi e-wilub nasiksad, we angi burba-geg-bergued nikumalagar.

²⁸ Degi, Jesús-abin sogdemarsun: —¿Degite, igi an imakmalosunna Bab Dummadga ibmar-imakega?

²⁹ Jesús, abin-imakde, emarga sogded: —Bab-Dummadga-ibmar-imaked wedo, Bab-Dummad-bemarga-na-dule-barmialidgi, mer agi be bengumar.

³⁰ Jesús-abin sogdemalad: —¿Degite, ibi-ibmar-wilubgan-dakledisulid be anmarga imakosunna, adi anmar dakega, begi anmar mer benguega Bab Dummad be-barmialid? ¿Ibi-ibmar be imaksunna?

³¹ ¿Bedi ibi anmarga ukosunna? Ar anmar-dadgan nega-dule-sulidgangi maná-guchamalad, ar Bab-Dummad-Garda sognaid: Ede dadganga madu-nibneggi-danikid uksaye, gunnegar.

³² Jesús amarga sogded: —Napira an bemarga soged, Moisés bemarga madu-nibneggi-danikid uksasulid, ar an-Bab madu-nibneggi-danikid-sunnad bemarga uked.

³³ Ar Bab-Dummad-madu, we-dule-nibneggi-aidenonikid, we-napnegginmaladga burba-dula-gudiguedi uked.

³⁴ Jesúsga sogdemalad: —Dummad, madu-degiid be anmarga ukdigu-sae.

³⁵ Jesús, abin-sogded: “Ani an madu-burba-duladid. Ar dule anse danikile, bar gwen ukumesosulid. Ar dule an-bengusulile, bar gwen uku-uku itogosulid.

³⁶ “Ar an bemarga epenne bato sogsamalad, ibmar-dakledisulid-imaksad be an-daksamar-inigwele, degite amba be an-benmalad.

³⁷ Ar bela Bab dulemar-anga-ukedi, anse dagoed anba naguegar. Ar dule anse danikile, gwen an barmetosulid.

³⁸ “Ar nibneggi an danikid, an-itoleged na ibmar-saega an danisulid. An nonikid, dule-an-barmialid-sogedba ibmar-imakegar.

³⁹ Bab-an-barmialid we abemaid: Bela dulemar-anse-nonikid gwen wargwensaar oyoggubisur an-abeged, adi ibagan-napi-naguoedgi a-dulemar an gannar odulogegar.

⁴⁰ “Dule-an-barmialid we abemaid: Bela dulemar-E-Machi-dakedi, degine, egi bensuli-gunonikile, burba-geg-bergued nikuoed. Degine, ani, ibagan-napi-naguoedgi a-dule an odulogoed.”

⁴¹ Degi Judiomar Jesúsgi sunmakedbi-guarmalad, ar ade Jesús sogsad: “Ani an madu-nibneggi-aidenonikidye.”

⁴² Judiomar Jesúsgi sogdemalad: —¿Ar wede Jesússursi, José-machisursi, degine, e-bab, degi, e-nan anmar mag daksursi? ¿Ar degite ibiga sogsunna, nibneggi an aidenoniye?

⁴³ Jesús amar-abin imakde, sogded: —Mer na be muchub-muchub angi istar sunmakmar.

⁴⁴ Dule-wargwensaale gege anse daged, ar Bab-an-barmialid, a anse-dagega imaksulir, ibagan-napi-naguoedgi, ani an a-dule-odulogoed.

⁴⁵ Bab-Dummad-gaya-burba-berbemalad-gardagi narmakar naid: Bab Dummad na e-igargi bela dulemar-odurdakoye. Is. 54:13 Degisoggu, bela Bab-itosmalad, degi, egi durdaksamarbalid, amar anse danimaloed anba naguegar.

⁴⁶ “Ar an sogsulid, dule-wargwensaar Bab-daksa-deeye. Suli, unnila dule-Bab-Dummadgi-danikid, abi unnila Bab-daksad.

⁴⁷ Napira an bemarga soged: Ar dule angi bengusulile, a-dule burba-geg-bergued nikad.

⁴⁸ “Ani an madu-burba-duladid.

⁴⁹ Ar be-dadgan nega-dule-sulidgangi maná guchamar-inigwele, amar bela burgwismalad.

⁵⁰ “An bemarga madu-nibneggi-aidenonikidgi an sunmakedi, a-madu dule guchale, adi geg bar burgwed.

⁵¹ Ani an madu-duladid, nibneggi-aidenonikidid. Ar dule-wargwen a-madu guchale, bar burgosulid, degi-dula-sadeguoed. An madu-ukoedi, we an-sanad. An a-madu ukoed, adi we-napneg-naidgi dulemar-bukmalad dula gudiguegar.”

⁵² Agi Judiomar na abin-abin imakarmalad, sogdemalad: —¿Ar wede anmar e-san-gunnega anmarga na e-san ukode? Adi surbali.

⁵³ Jesús amarga sogded: —Napira an bemarga soged: Ar bemar Dule-Machi-e-san-gunsulile, degine, e-abe gobsurbalile, bemar burba-dulad-satemalad.

⁵⁴ Ar dule an-san gunnele, degi, an-abe gobele, a-dule burba-geg-bergued nikado, degine, ibagan-napi-naguoedgi, ani an a-dule-odulogoed.

⁵⁵ Ar an-sana, mas-gunned-sunsogedid, degine, an-abe, gobed-sunsogedbalid.

⁵⁶ Ar dule-an-san-gunmalad, degi, an-abe-gobmalad, anginbi gudigumalad, degine, an egi gudigumogad.

⁵⁷ Ar igi Bab-dula-gudiid an-barmiali, degine, igi an Babgi an dula gudimoga, dule an-san guchale, deyob a-dule angi dula gudigumogoed.

⁵⁸ Ar ani an madu-nibneggi-aidesadid. Be-dadgan-maná-guchadyobsulid, ar amardi burgwismalad. Ar madu-nibneggi-aidesadi, dule a-madu guchardi, adi burgosulid, degi-sadeguoed.

⁵⁹ Jesús we-ibmar-sogsagusadi, Judiomar-onmaked-neggi sogsa-gusdo, deun Capernaumgi dulemar-odurdaksigusgu.

⁶⁰ Bukidar-e-sapingan Jesús weyob-soge itosmargu, sogdemalad: —We-ibmar-sogedi gwen nollo sogsulid. Degisoggu, we deyob-sogedba, ¿ar doa eba ibsaoe? Anmar eba ibsaosurmala.

⁶¹ Ar Jesús na wissoggu, e-sapingan na muchub-muchub we-igargi sunmaknanaid, amarga sogdesun: —¿Ar we-an-bemarga-sogedi, be istar itomala?

⁶² Degite, ¿igi be sogsamalarsunna, ar Dule-Machi nibneggi-bia-mai-gusadse gannar nakwemai be dakarmalar?

⁶³ Ar Bab-Dummad-Burbabi dula gudigued uked, dule-sandi binsaledid. An-bemarga-ibmar-sogsadi, we burba-napiragwadid, degine, dula gudiguedbalid.

⁶⁴ Ar bemar gwenna-gwennagwa an-benmalad. Ar Jesús bato gebesaila-akar wisid doamala e-benmala, degine, doa darba e-ukoe.

⁶⁵ Jesús sogded: —A-ulale an sogsad, dule anba naguegala gege anse dagye, ar Bab anse sedasulir.

⁶⁶ Degidgine, bukidar e-sapingan Jesús-metemalad, bar Jesúsba gudigussurmalad.