Juan 6:30-46

³⁰Kuya l̈ok ga tjl̈ẽ ba kong ga «Tjawa mär ber l̈öng bop go wl̈o ga woydërwa ga l̇l̇ëbo ĩydëba l̇l̇ëm wl̈eniyo shäryëp borwa kong, ĩnwa wl̈o. ¿L̇l̇ëye shäryëp ga pjl̈ú?

³¹Borwa tjl̈apgaga tek dënashko so l̈öng kjok dogro no l̇l̇ëmshko ga maná uara l̈ok eshko, tak pjang Sbö tjl̈õkwo go sorë l̈i eni. Tjl̈ẽ ga “Dl̈i twara ba kong kjok dogo dwayo”» l̈e.

³²Kuya ga tjl̈ẽ ba kong l̈ok ga «Pjãy wotjl̈ĩk ga dl̈i l̈ëmi l̈öng l̈i twaga Moisésdë bomi kong kjok dogo dwayo l̈ëmi. Gueniyo l̈ër bomi kong jl̈õkoyo ga e eni l̇l̇ëme. E twaga bor Datarë bomi kong. Dl̈i jl̈õkoyo ter tjwe kjok dogo dwayo twaga l̈i e.

³³Dl̈i twe l̈i, kjl̈ara ichak Sbörë ter shrono shäng kjok dogo dwayo, nopga l̈öng kjok ëre kjing go ie ber l̈öng së ĩyado ba tjok wl̈o l̈i e» l̈e.

³⁴Eni ga tjl̈ẽ l̈ok ba kong ga «Tjl̈apga, dl̈i l̈ëp shäng l̈i twos borwa kong ĩyado» l̈e.

³⁵Kuya ga tjl̈ẽ ba kong l̈ok ga «Dl̈i, e uoromi ga pjãy ie ber l̈öng së ĩyado Sbö tjok wl̈eniyo l̈i, e tja. Ëye tjwe ber bor tjok wl̈o, ga mär bor go ga ber pjl̈irö ame, e ber wodogro ame bakoe.

³⁶Gueniyo tja ĩnomi ëmdë ga pjãy mär bor go l̇l̇ëm, l̈oror bomi kong sorë l̈i eni.

³⁷Nopga twara Data Sbörë beno bor kong kës l̈i, e tjwe ber tjeng bor tjok wl̈o. Ga ëye tjwe ber bor tjok wl̈o ga wl̈okjrër uunkong, “L̇l̇ëme” l̈ër ë kong l̇l̇ëme.

³⁸»Tja ter shrono shäng kjok dogo dwayo, l̇l̇ëbo shäryër bor woshko wl̈o l̇l̇ëme. Tja ichara bor Datarë shrono shäng l̇l̇ëye woyde ga shäryër l̈e l̈i, e shäryotë.

³⁹Ga l̇l̇ëye woyde bor ichagarë l̈i, e ëre: Kjok pjir dbaryoshko ga nopga twara beno tjeng bor kong kës l̈i woshrër iröng obi, jer kjl̈ara l̇l̇ëm wl̈o.

⁴⁰Woyde bor Datarë ga ëye ba Wa ëre tjl̈õkwo kjrë, ga mär bor go ga ber l̈öng së ĩyado ba tjok. Eni ga epga woshrër uunkong iröng obi kjok pjir dbaryo l̈ishko» l̈e.

⁴¹Kuya judíoga l̈öng l̈irë ga Jesús l̈ãywara l̈ok owa, «Dl̈i ter shrono kjok dogo dwayo l̈i tja» l̈ara l̈i kjĩshko.

⁴²Tjl̈ẽ l̈ok ëng kong ga «¿Domer kjwe Jesús l̇l̇ëmdo? ¿Data José l̇l̇ëmdo? Ba data, mekë, e miydërwa pjl̈úe. ¿“Tja ter shrono shäng kjok dogo dwayo” l̈e sorëro?» l̈e.

⁴³Kuya Jesúsdë ga tjl̈ẽ ba kong l̈ok ga «Tja l̈ãywëmi ëng kong eni kjër l̇l̇ëme.

⁴⁴Tja ichaga Data Sbörë. Ga ëye ichara ber bor tjok wl̈o l̇l̇ëm ga tjwe ber bor tjok wl̈o ga äe. Gueniyo ëye tjwe ber bor tjok wl̈o ga woshrër iröng obi kjok pjir dbaryo l̈ishko.

⁴⁵Tjl̈õkwo tara Sbö tjl̈õkwo l̈aga tek dënashko so kjl̈ararë beno pjang eni: “L̇l̇ono ga nopga uunkong pĩya Sbörë om go.” Eni ga ëye Data Sbö tjl̈õkwo kuno, ga l̇l̇ë l̈okl̈o miydara ga tjwe ber tjeng bor tjok uunkong.

⁴⁶»Data Sbö, e ĩga ërë l̇l̇ëme. Gueniyo to ter ba shwoy dwayo ërera omĩno eröe.