29 Timaba si Jesus, “Seini se ibeg te Timanem inangen niyo. Pemenal kaw kanak, so insogò a te Timanem.”
30 Mig-insà dan heman, “Eden lay se pengilala ipekità no kenami amon memenal kay kamno? Eden lay se inangen no kenami?
31 So gebii te peg-ogpà te menge kemonaan tadon doton te kebigtilan, kinaen dan se kànen iningedanan mana, so doen kagi te Timanem insolat, ‘Binegayan din dan te kànen lekat te langit.’”
32 Minikagi si Jesus, “Eneng-enengi niyo se kagi ko kenyo. Kenà si Moises se nemegay te kànen lekat te langit, meneng Timanem se egpemegay kenyo te benal kànen lekat te langit.
33 Insogò dini lekat te langit se benal kànen ipegpemegay te Timanem, aw yan se mekebegay te kaling pedowan wedad temanan diyà te kedita te otaw.”
34 Minikagi dan, “Pengolo, begayi kay te kànen sìyan te kelikit te aldaw.”
35 Minikagi si Jesus, “Siaken se kànen mekebegay te kaling pedowan wedad temanan. Se otaw tomaking aw memenal kanak, yan se otaw eked palos bellosi aw eked heman palos kelao.
36 Meneng tapay ko inikagi kenyo, te pengkey kinità a niyo, meneng wedà kaw pa pemenal kanak.
37 Se kedita te otaw insalig te Amay ko diyà kanak, yan se otaw tomaking kanak. Pengkey sinu se otaw tomaking kanak, eked ko palos sikandin pekedasi.
38 Insogò a dini lekat te langit kenà amon inangen ko se kanak ibeg, meneng dimini a amon toloen ko se ibeg te Amay ko simogò kanak.
39 Aw seini se ibeg din, te tonggoan ko se kedita te otaw insalig din diyà kanak amon wedad metalon kandan, aw entayen ko se kedita dan te temanan aldaw.
40 Meibeg se Amay ko te begayan te kaling pedowan wedad temanan se kedita te otaw nengemahà aw nemenal kanak, aw entayen ko dan te temanan aldaw.”
41 Pegdineg te menge obanen te Judiyo kenyan, nebensi dan, so minikagi si Jesus te sikandin se kànen imbegay te Timanem kandan lekat te langit.
42 Migpebelaw-belaway dan, kagi dan, “Meneng sikandin si Jesus, aw si Jose olò se amay din. Netegahan tadon aw sinu se amay aw inay din. Yan nengà lay minikagi sikandin te insogò sikandin lekat te langit?”
43 Minikagi si Jesus, “Ikà niyo egkebensi.
44 Wedad otaw meketaking kanak singed aw onà entagen se pedowan din te Amay ko simogò kanak. Se otaw tomaking kanak, yan se entayen ko te temanan aldaw.
45 Doen insolat te telekeliwat te kagi te Timanem, kagi din, ‘Toledaan te Timanem se kedita te otaw.’ Se kedita te otaw menenalan aw tomolò te itoladà te Amay ko, yan se tomaking kanak.
46 Wedad otaw kimità te Amay ko Timanem, meneng sebad ko se kimità kandin, aw insogò a din dini.
47 Eneng-enengi niyo se kagi ko kenyo. Doen kaling pedowan wedad temanan te kedita te otaw nemenal kanak.
48 Siaken se kànen egpemegay te kaling pedowan wedad temanan.
49 Peg-ogpà te menge kemonaan niyo kidoen te kebigtilan, nematay dan pengkey kimaen dan te mana imbegay te Timanem kandan lekat te langit.
50 Meneng sebad kemolò se kànen seini insogò den dini lekat te langit, so se kedita te otaw komaen kani, yan se otaw eked palos kematay se pedowan din.
51 Siaken se kànen insogò dini lekat te langit mekebegay te kaling pedowan. Aw komaen se otaw te kànen seini, wedad temanan te pedowan din. Se kànen seini ibegay ko, yan se onod ko, amon mekekinawà se kedita te otaw te kaling pedowan.”
52 Pegdineg te menge obanen te Judiyo kenyan, migpedindilay dan, kagi dan, “Eked sikandin pemegay te onod din kenitadon amon mekaen tadon iyan.”
53 Minikagi si Jesus, “Eneng-enengi niyo se kagi ko kenyo. Aw eked kaw kaen te onod ko, aw eked kaw heman inem te dipanog ko, wedad kaling pedowan ibegay kenyo. Siak se Timanem Migpekeotaw,
54 aw se otaw komaen te onod ko aw minem te dipanog ko, yan se otaw begayan ko te kaling pedowan wedad temanan, aw entayen ko pa sikandin te temanan aldaw.
55 Ontò mekaen se onod ko, aw ontò heman meinem se dipanog ko.
56 Se otaw komaen te onod ko aw minem te dipanog ko, yan se eg-ogpà diyà kanak, aw siak diyà kandin.
57 Insogò a te Amay ko wedad temanan din, aw doen heman pedowan ko wedad temanan lekat kandin. Iling heman kenyan se otaw komaen kanak, so yan se otaw begayan te pedowan wedad temanan pineokit kanak.
58 Seini se kànen lekat te langit. Kenà ini iling te mana, so nematay se kemonaan niyo pengkey kimaen dan kenyan. Meneng se otaw komaen te kànen seini, wedad palos temanan te pedowan din.”
59 Yan se intoladà i Jesus kidoen te simbahan te Judiyo doton te lonsod te Kapirnaom.
60 Pegdineg te menge tinoledaan i Jesus te intoladà din seini, medita kandan se migpebelaw-belaway, kagi dan, “Eked nael pemenali se intoladà din seini. Wedad besi palos otaw mekepemenal kenyan.”
61 Netegahan i Jesus te doen menge tinoledaan din nebensi te intoladà din, aw minikagi sikandin, “Nepela a so nebensi kaw te inikagi ko seini.
62 Labi pa besi se kebensi niyo aw kitaen a niyo Timanem Migpekeotaw aw megpeengat a doton te langit eg-ogpaan ko kedengan.
63 Timanem olò se mekebegay te kaling pedowan. Eked iyan keabat pineokit te pagod te otaw. Meneng se kebenalan intoladà ko kenyo, yan se lekat te Timanem aw mekebegay te kaling pedowan.
64 Doen dini kenyo eked pemenal kanak.” Yan se inikagi i Jesus so tapay din netegahan aw sinu se otaw eked pemenal, aw netegahan din heman aw sinu se otaw megtolok kandin.
65 Minikagi heman si Jesus, “Yan se doun te minikagi a diyà kenyo te wedad otaw meketaking kanak singed aw onà entagen se pedowan din te Amay ko.”
66 Lekat niyan, medita se tinoledaan timanan ki Jesus aw limengà dan te pegtaking kandin.
67 Minikagi si Jesus diyà te sìyan sempolò teg dowa tinoledaan din, kagi din, “Meibeg kaw lay heman tomanan kanak?”
68 Timaba si Simon, se doma ngadan din si Pedro, kagi din, “Pengolo, wedad palos doma tekingan day, so sebad no se egtoladà tepad te kaling pedowan wedad temanan.
69 Nemenal kay den kamno, aw netegahan day te wedad salà no aw sikona se insogò te Timanem.”
70 Minikagi si Jesus, “Pengkey pinemallì ko sikiyo sempolò teg dowa, meneng doen sebad diyà kenyo sakop i Satanas.”
71 Yan se inikagi din tepad ki Judas batà i Simon Iscariote, so pengkey si Judas se sebad diyà te sempolò teg dowa tinoledaan din, meneng sikandin se migtolok kandin.
