25 Pegdateng dan doton te Kapirnaom, kinità dan si Jesus, aw mig-insà dan, “Sir, kano ka lay dini?”
26 Timaba si Jesus, “Eneng-enengi niyo se kagi ko kenyo. Nengemahà kaw kanak kenà so nemenal kaw pineokit te kepelahan impekità ko kenyo, meneng nengemahà kaw kanak so nebesog kaw te pan impekaen ko kenyo gebenini.
27 Ikà niyo egpengemahà te kànen megkewedad te eked kenamay. Meneng pengemahà kaw te kànen eked pegkewedad aw mekebegay te pedowan wedad temanan. Yan se ibegay ko kenyo, so siaken se Timanem Migpekeotaw, aw impetaga-taga te Amay ko Timanem te siak se insogò din.”
28 Minikagi dan diyà ki Jesus, “Toledai kay aw eden se inangen day amon metoman day se ibeg te Timanem.”
29 Timaba si Jesus, “Seini se ibeg te Timanem inangen niyo. Pemenal kaw kanak, so insogò a te Timanem.”
30 Mig-insà dan heman, “Eden lay se pengilala ipekità no kenami amon memenal kay kamno? Eden lay se inangen no kenami?
31 So gebii te peg-ogpà te menge kemonaan tadon doton te kebigtilan, kinaen dan se kànen iningedanan mana, so doen kagi te Timanem insolat, ‘Binegayan din dan te kànen lekat te langit.’”
32 Minikagi si Jesus, “Eneng-enengi niyo se kagi ko kenyo. Kenà si Moises se nemegay te kànen lekat te langit, meneng Timanem se egpemegay kenyo te benal kànen lekat te langit.
33 Insogò dini lekat te langit se benal kànen ipegpemegay te Timanem, aw yan se mekebegay te kaling pedowan wedad temanan diyà te kedita te otaw.”
34 Minikagi dan, “Pengolo, begayi kay te kànen sìyan te kelikit te aldaw.”
35 Minikagi si Jesus, “Siaken se kànen mekebegay te kaling pedowan wedad temanan. Se otaw tomaking aw memenal kanak, yan se otaw eked palos bellosi aw eked heman palos kelao.
36 Meneng tapay ko inikagi kenyo, te pengkey kinità a niyo, meneng wedà kaw pa pemenal kanak.
37 Se kedita te otaw insalig te Amay ko diyà kanak, yan se otaw tomaking kanak. Pengkey sinu se otaw tomaking kanak, eked ko palos sikandin pekedasi.
38 Insogò a dini lekat te langit kenà amon inangen ko se kanak ibeg, meneng dimini a amon toloen ko se ibeg te Amay ko simogò kanak.
39 Aw seini se ibeg din, te tonggoan ko se kedita te otaw insalig din diyà kanak amon wedad metalon kandan, aw entayen ko se kedita dan te temanan aldaw.
40 Meibeg se Amay ko te begayan te kaling pedowan wedad temanan se kedita te otaw nengemahà aw nemenal kanak, aw entayen ko dan te temanan aldaw.”
41 Pegdineg te menge obanen te Judiyo kenyan, nebensi dan, so minikagi si Jesus te sikandin se kànen imbegay te Timanem kandan lekat te langit.
42 Migpebelaw-belaway dan, kagi dan, “Meneng sikandin si Jesus, aw si Jose olò se amay din. Netegahan tadon aw sinu se amay aw inay din. Yan nengà lay minikagi sikandin te insogò sikandin lekat te langit?”
43 Minikagi si Jesus, “Ikà niyo egkebensi.
44 Wedad otaw meketaking kanak singed aw onà entagen se pedowan din te Amay ko simogò kanak. Se otaw tomaking kanak, yan se entayen ko te temanan aldaw.
